ފީފާ ވޯލްޑް ކަޕުގައި މި ފަހަރު ދެކުނު އެމެރިކާ ސަރަހައްދުން އެކުއެޑޯއަށް ކުޅެވޭކަން ޔަގީންވެއްޖެއެވެ.
މިކަން ޔަގީންވީ ޗިލީއިން ފީފާއަށް ހުށައެޅި މައްސަލަ ބޭރުކޮށްލުމާއެކުއެވެ. ޗިލީން ވަނީ ދެކުނު އެމެރިކާ ސަރަހައްދުގެ ކޮލިފައިންގ ގިނަ މެޗްތަކުގައި އެކުއެޑޯ ޓީމަށް ކުޅުނު ބައިރަން ކަސްޓީޔޯ އަކީ އަސްލު ކޮލަމްބިއާގެ ރައްޔިތެއް ކަމަށާއި، އޭނާގެ އުމުރުވެސް އޮޅުވާލާފައިވާކަމަށް ބުނެ ފީފާއަށް މައްސަލަ ހުށަހަޅާފައެވެ.
މިމައްސަލަ އާއި ގުޅޭގޮތުން ފީފާއިން ހާމަކުރިގޮތުގައި އެކުއެޑޯ އާއި ދެކޮޅަށް ހުށަހަޅަފައިވާ މައްސަލައިގެ ހުރިހާ ކަމަކަށް ބެލުމަށްފަހު އިތުރަށް ކުރިއަށް ނުގެންގޮސް މައްސަލަ ނިންމާލާކަމަށެވެ. ނަމަވެސް ޗިލީން ބޭނުންނަމަ ފީފާގެ އެޕީލް ކޮމެޓީއަށް އެޕީލް ކުރުމުގެ ފުރުސަތު އޮންނާނެކަމަށްވެސް ފީފާއިން ހާމަކުރެއެވެ.
މިނިންމުމާއެކު ކުރިއަށް އޮތް ވޯލްޑް ކަޕްގެ ގްރޫޕް އޭގައި މުބާރާތް ބާއްވާ ޤައުމު ޤަތަރާއި ސެނެގާލް އަދި ނެދަލަންޑްސް އާއެކު އެކުއެޑޯ ހިމެނޭނެކަންވަނީ ޔަގީންވެފައެވެ. އަދި އެކުއެޑޯގެ އެފްއޭއިން ހާމަކުރިގޮތުގައި މިއީ އިންސާފުވެރި ނިންމުމެއްކަމަށާއި އެކަމާއި މުޅި ޤައުމު އުފާކުރާކަމަށެވެ.
ޗިލީގެ ފުޓްބޯލް ފެޑެރޭޝަނުން ހާމަކުރިގޮތުގައި އެފަރާތުން އެޕީލް ކުރާނެކަމަށާއި އަދި މައްސަލަ ކޯޓް އޮފް އާބިޓްރޭޝަން ފޯ ސްޕޯޓްއަށް ވެސް ހުށަހަޅާނެކަމަށެވެ. ޗިލީން ހާމަކުރާގޮތުގައި އެކުއެޑޯގެ ކްލަބެއް ކަމަށްވާ ބާސެލޯނާއަށް ކުޅޭ ކަސްޓީޔޯ ވަނީ އޭނާގެ އުފަންދުވަހުގެ ސެޓްފިކެޓް އޮޅުވާލާފައެވެ.
މިގޮތުން އޭނާއަކީ 25 ޖުލައި 1995 ވަނަ އަހަރު ކޮލަމްބިއާގެ ޓުމާކޯއަށް އުފަން ރައްޔިތެއް ކަމަށާއި 10 ނޮވެމްބަރު 1998 ވަނަ އަހަރު އެކުއެޑޯގެ ގެނެރަލް ވިޔަމިލް ޕްލަޔާސްއަށް އުފަން ރައްޔިތެއް ނޫން ކަމަށް ޗިލީއިން ހާމަކުރެއެވެ. ނަމަވެސް އެކުއެޑޯއިން ހާމަކުރިގޮތުގައި ކަސްޓިޔޯ ޤައުމީ ޓީމަށް ނެގުމުގެ މާކުރިން އޭނާ ނިސްބަތްވާ ޤައުމުގެ ކަންތައް ބަލާފައިވާނެ ކަމަށެވެ.
