ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ އިންތިޚާބުގައި ކުރިމަތި ލެއްވުމާއި، އަދި ކުރިއަށް ދިއުމުގައި ގޮތް ނިންމުމުގެ ހުރިހާ ބާރެއް އޮތީ ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީގެ ކެނޑިޑޭޓް ޤާސިމް އިބްރާހިމްގެ އަތުގައި ކަމަށް އެމްޑީޕީގެ ރައީސް އަދި ރައީސް ޞާލިހުގެ ޒަމާންވީ އެކުވެރިޔާ މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ މެމްބަރުން ތިއްބަވާ ގްރޫޕަަކަށް އެ ޕާޓީގެ ރައީސް، ނަޝީދު ފޮނުއްވި މެސެޖެއްގައި މިގޮތަށް ވިދާޅުވީ ދެ ވަނަ ދައުރަކަށް ވާދަކުރައްވާނެކަން ރައީސް އިބްރާހިމް މުހައްމަދު ސޯލިހް އިއުލާން ކުރެއްވުމަށް ފަހު، ގާސިމާ ބައްދަލު ކުރެއްވުމުންނެވެ. އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލާއި އެމްޑީޕީގެ އިސް ބައެއް ބޭފުޅުންނާ އެކު ރައީސް އިއްޔެ ވަނީ ނުރަސްމީ ދަތުރުފުޅެއްގައި ގާސިމްގެ އުފަން ރަށް، މާމިގިއްޔަށް ވަޑައިގެންފައެވެ.
ނަޝީދު ވިދާޅުވީ ރައީސް އިބްރާހިމް މުހައްމަދު ސޯލިހް ދެ ވަނަ ދައުރަކަށް ކެންޑިޑެސީ އިއުލާން ކުރެއްވީ ސަރުކާރު ކޯލިޝަންގައި މިހާރު ހިމެނޭ ޖުމްހޫރީ ޕާޓީ އާއި އަދާލަތު ޕާޓީ ވެސް އެކުގައި ތިއްބަވާނެ ކަމަށް ނިންމަވައިގެން ކަމަށެވެ. ކުއްލިއަކަށް ގާސިމްއާ ބައްދަލުކުރެއްވުމުގެ މާނައަކީ، ނަޝީދު ވިދާޅުވި ގޮތުގައި، ޕާޓީތަކާ އެކު ގޮތެއް ނުނިންމަވައި އިއުލާން ކުރެއްވުމެވެ.
ނަޝީދު ފެކްޝަންގެ މެންބަރުން ރައީސަށް ފާޑު ވިދާޅުވަމުންދާ ދަނޑިވަޅެއްގައި ނަޝީދު މިއަދު ވިދާޅުވީ ރައީސް ސޯލިހް ވާދަކުރައްވާނެކަން އިއުލާނު ކުރެއްވީ ކޯލިޝަންގެ ބައިވެރިންނާއިއެކުގައި މަޝްވަރާ ކުރައްވާފައި ނޫން ކަމަށާއި އެހެންކަމުން މިހާރު ދެން ރައީސްގެ ކެންޑިޑެސީގެ ހުރިހާ ބާރެއް އޮތީ ގާސިމްގެ އަތުގައި ކަމަށެވެ.
މި ފެނުނީ ޖޭޕީއާ ވެސް އަދި އަދާލަތު ޕާޓީއާ ވެސް އެމްޑީޕީން މަޝްވަރާކޮށްފައި ނުވާކަން. ރައީސްގެ ކެންޑިޑެސީ އިއުލާން ކުރެއްވުމާ އެކު ފުރާވަޑައިގަތުމަށް ޖެހިވަޑައިގަތީ މާމިގިއްޔަށް، އެހެނަސް ޖޭޕީ އަދި ގޮތެއް ނިންމިތަނެއް ނުފެނޭ. މިހާރު ރައީސުލްޖުމްހޫރިއްޔާގެ ކެންޑިޑޭސީގެ އުންމީދު އެއްގޮތަކަށްވެސް ކުރިއަށްދާނީ ޖޭޕީ ނިންމާ ގޮތެއްގެ މައްޗަށް.
– ނަޝީދު ވިދާޅުވިއެވެ.
ނަޝީދު ވިދާޅުވީ އެމްޑީޕީގެ ރިޔާސީ ކެންޑިޑޭޓަކު މިހާތަނަށް އެޕާޓީން ނިންމާފައިނުވާ ކަމަށެވެ. އެކަމަކު ރިޔާސީ ޓިކެޓުގެ އުންމީދުގައި ކޮންމެ ބޭފުޅަކަށް ވެސް މަސައްކަތް ކުރެއްވުމުގެ ފުރުސަތު އޮތް ކަމަށާއި ރައީސް ސޯލިހް ނޫން އިތުރު ބޭފުޅުން ވެސް އެމްޑީޕީން ކުރިމަތިލައްވާނެ ކަމަށް ވިދާޅުވިއެވެ. މީގެ ކުރިން ނަޝީދު ވެސް ވަނީ ރިޔާސީ ރޭހުގައި ނުކުންނަވާނެކަން އިއުލާނު ކުރައްވާފައެވެ.
މިހާރު ރައީސްގެ ކެންޑިޑެސީގެ އުއްމީދު އެއްގޮތަކަށް ވެސް ކުރިއަށް ގެންދެވޭނީ ޖޭޕީ ނިންމާ ގޮތެއްގެ މައްޗަށް. އަޅުގަނޑު ދެކޭ ގޮތުގައި 2023 ގެ ރިޔާސީ ކެންޑިޑޭޓް އެމްޑީޕީން އަދި ނުނިންމާ. ނަމަވެސް ކެންޑިޑެސީގެ އުއްމީދުގައި ހުރިހާ ބޭފުޅުންނަށް ވެސް މަސައްކަތް ކުރެއްވޭނެ. ރައީސުލްޖުމްހޫރިއްޔާ ނޫން ކެންޑިޑޭޓުން ވެސް ނުކުންނަވާ.
– ނަޝީދު ވިދާޅުވިއެވެ.
ރައީސް ވިދާޅުވި ގޮތުގައި ދެ ވަނަ ދައުރަކަށް އެމަނިކުފާނު ވާދަކުރައްވަނީ، އެމްޑީޕީއަށް ވެރިކަން ލިބެން އޮތީ އެ މަގުން ކަމަށް ވާތީއެވެ. އެމްޑީޕީން ވެސް އެކަނި ވާދަކޮށްގެން އިންތިހާބު ކާމިޔާބު ކުރެވޭނެ ގޮތެއް އަދި ނެތް ކަމަށާއި އެހެންކަމުން ޕާޓީ އާއި ގައުމަށް ވެސް ފައިދާ އޮތީ އެމަނިކުފާނު ނުކުންނަވައިގެން ކަމަށް މިދިޔަ ބުދަ ދުވަހު ވިދާޅުވިއެވެ.
އެމްޑީޕީ އަށް ވެރިކަން ބޭނުން ކަމަށް ވާ ނަމަ އަޅުގަނޑު މިހިރީ ޗޮއިސްއަކަށް.
– ރައީސް ވަރަށް ތިލަކޮށް ވިދާޅުވެފައިވެއެވެ.
2023 ގައި ރައީސްގެ ރަނިން މޭޓުކަން ވެސް ގާސިމަށް ހުށަހަޅުއްވާފައިވާ ކަމަށް ސިޔާސީ ބައެއް ބޭފުޅުން ވަނީ ތުހުމަތު ކުރައްވަމުންނެވެ. އެކަމަކު، ޖޭޕީން ވަނީ އެ ތުހުމަތުތައް ދޮގުކޮށްފައެވެ.
One Response
މިނޫސްވެރިން މިލިއާ ޚަބަރު ފެނުމުން މަމިހުންނަނީ ދެފާކާރިކުރަން ވެސް އުދަގު ވެފައި