އިންޑިއާގެ މަޝްހޫރު ލަވަކިޔުންތެރިންގެ ތެރޭގައި ހިމެނޭ ޝާންތަނައު މުކަރްޖީ (ޝާން) އައި ރާއްޖޭގައި ބޮޑު މަޝްހޫރު ކަމެއް ހޯދާފައިވާ ލަވަކިޔުންތުންތެރިޔާ މަރިޔަމް އުނޫޝާއާއެކު ކިޔަވާފައިވާ ލަވަ ނެރެފިއެވެ.
ބީޗް ވައިބެއް ގެނެސްދޭ "ދިލް އުޅެޔާ" މި ލަވައަކީ ރެގޭ ޕޮޕް މިއުޒިކަށް ތައްޔާރުކޮށްފައިވާ ލަވައެކެވެ. ލަވައިގެ މެލޮޑީގައި ދިވެހި ބޮޑުބެރުގެ ބައެއް އަޑުތައްވެސް ހިމަނާފައިވެއެވެ. ލަވައިގެ މިއުޒިކް ހަދާފައިވަނީ ގަނޭޝް ސުރްވޭ އަދި ރާއްޖޭގެ މަޝްޙޫރު މިއުޒިކް ޕްރޮޑިއުސަރ ބާރޗީއެވެ. ހިންދީ، ޕަންޖާބު އަދި ދިވެހި ބަސް ހިމަނައިގެން ތައްޔާރުކޮށްފައިވާ މި ލަވަ ކޮމްޕޯސްކޮށްފައިވަނީވެސް ޝާން އަމިއްލައަށެވެ.
މި ލަވަ އެއްކޮށް ޝޫޓްކޮށްފައި ވަނީ ކްރޮސްރޯޑްސް އާއި ދެ ރިސޯޓްގައެވެ. މި ލަވައިގެ ބޮޑުބައި ޝާން އާއި އުނޫޝާ ކިޔަނީ ހިންދީ ބަހުންނެވެ. އެހެން ނަމަވެސް ލަވައިގައި ކޮންމެވެސް ވަރަކަށް ދިވެހި ބައިތައް ހިމަނާފައި ވެއެވެ. އުނޫޝާ އާއި ޝާންވެސް ދިވެހި ބައިތައް ލަވައިގައި ކިޔައެވެ. މިއީ އެހުންތެރިންނާއި ބެލުން ތެރިންނަށް ބޮޑު ސަޕްރައިޒަކަށް ވާނެ ކަން ޔަގީނެވެ. ލަވައިގެ ދިވެހި ލިރިކްސް ލިޔެފައި ވަނީ އަހްމަދު އަބްދުލް ޣަނީ (ތޭރާ)އެވެ.
ލަވައިގެ ވީޑިއޯއިން ރާއްޖޭގެ ހިތްގައިމުކަމާއި، ގުދުރަތީ މުއްސަނދިކަން ކިތަންމެ ފުރިހަމައެއްކޮށްވެސް ފެނިގެންދެއެވެ. މިލަވައިގެ މަންޒަރުތައް ނަގާފައިވަނީ ކްރޮސް ރޯޑްގެ ހާޑް ރޮކް ހޮޓަލްގައެވެ. ލަވައިގެ ވީޑިއޯއިން ޝާން ފިޔަވާ ދެން މުޅިންހެން ފެނިގެންދަނީ ދިވެހިންނެވެ. އެގޮތުން ލަވައިގައި ހަރަކާތްތެރިވާ ބެކްގްރައުންޑް ޑާންސަރުންނާއި ބޭންޑް މެންބަރުންގެ ގޮތުގައި ފެނިގެންދަނީ ހުސް ދިވެހި ފަންނާނުންނެވެ.
One of the best thing that came up during #MaldivesSportsAward was the idea of producing a song with a Maldivian,happy to get this opportunity to our talented singer @unoosha.
Thank you @singer_shaan bhai for this great opportunity to a Maldivian artist & for promoting Maldives. https://t.co/raDGBAKFYz— Ahmed Mahloof (@AhmedMahloof) June 10, 2022
މި ލަވައިގެ ވާހަކަތައް ކިޔާދީ އިންޑިއާގެ ނޫހަކަށް ދިން އިންޓަރވިއުގައި ޝާން ވަނީ އުނޫޝާގެ ހުނަރަށް ވަރަށް ބޮޑަށް ތަޢުރީފުކޮށްފައެވެ. އެގޮތުން މި ލަވައިގައި ހިމެނޭ ހިންދީ ބައި އުނޫޝާ ގެނެސްދީފައިވަނީ ވަރަށް މޮޅަށްކަން އޭނާ ފާހަގަކުރިއެވެ. އަދި އުނޫޝާއާއެކު މަސައްކަތްކުރުމަށް ލިބުނު މި ފުރުޞަތުގައި އޭނާގެ މޮޅުކަން ތަޖުރިބާކުރެވި، ހައިރާންކޮށްލިކަމަށް ޝާން ބުނެފައިވެއެވެ.
ޝާންއާއެކު މަސައްކަތްކޮށްލުމުގެ ފުރުޞަތު ލިބުމުން އުނޫޝާވެސް ހުރީ ވަރަށް އުފަލުންނެވެ. އަދި މި ފުރުޞަތު އޭނާއަށް ދިންކަމަށްޓަކާ ޝާންއާއި ޝާންގެ ޓީމަށް އުނޫޝާ ވަނީ ޝުކުރު އަދާކޮށްފައެވެ.
