ރިޔާސީ އިންތިޚާބުގެ މަޝްވަރާތަކެއް ކުރުމަށް ރައީސް ޞާލިހު މިއަދު ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި ބައްދަލު ކުރައްވަން މާމިއްޔަށް ކުރައްވާ ދަތުރާއި ގުޅިގެން ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) ސުވާލުތަކެއް އުފައްދަވައިފިއެވެ.
ގާސިމްގެ އުފަން ރަށް، މާމިގިއްޔަށް މިއަދު ހެނދުނު ވަޑައިގަތުމުން ރައީސަށް މަރުހަބާ ދެންނެވީ ރަތް ދޫލައިންނެވެ. ގާސިމްއާ އެކު ގިނަ ބަޔަކު އެއާޕޯޓު ސަރަހައްދަށް އެއްވެސް އެ މަރުހަބާގައި ބައިވެރިވިއެވެ.
ރައީސް ޤާސިމާއި ބައްދަލު ކުރައްވަނީ ނިމިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި ރިޔާސީ އިންތިޚާބުގައި ވާދަ ކުރައްވާނެކަން އިއުލާން ކުރެއްވުމަށް ފަހުއެވެ. ރައީސް ގަބޫލުކުރައްވާ ގޮތުގައި ރާއްޖޭގައި ދެން ވެސް އެއް ޕާޓީއަކުން އެކަނި ނުކުމެ އިންތިހާބު ކާމިޔާބެއް ނުކުރެވޭނެއެވެ. އެމަނިކުފާނު ވިދާޅުވީ އެމްޑީޕީ އިސްވެ އޮވެ ކޯލިޝަނަކާ އެކު 2023 ގެ އިންތިހާބު އެމަނިކުފާނަށް ކާމިޔާބުކުރެއްވޭނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.
ރައީސްގެ ދަތުރާއި ގުޅޭގޮތުން ޓޮމް ވިދާޅުވީ މިއީ ޤާސިމް އިބްރާހިމް ރިޔާސީ އިންތިޚާބަށް ކުރައްވާ އުންމީދު ނިމުމަކަށް ގެނައުމަށް ކުރެވޭ މަސައްކަތެއް ކަމަށެވެ. މިބައްދަލުވުމުގައި ރައީސް ޞާލިހު ވަނީ ރަނިން މޭޓްކަން ޤާސިމް ހުށަހަޅުއްވާފައިކަމަށާއި، އެމްޑީޕީގެ ރައީސް އަދި ރައީސް ޞާލިހުގެ ޒަމާންވީ އެކުވެރިއާއަށް ރަނިން މޭޓްކަންވެސް ހައްގު ނުވަނީތޯ ޓޮމް ވަނީ ސުވާލު އުފައްދަވާފައެވެ.
ޖުމްހޫރީޕާޓީގެ ލީޑަރުގެ ރިޔާސީ އުއްމީދު ނިމުމަކަށް ގެނެސް، ރައީސް ސޯލިހުގެ ރަނިންމޭޓްކަން މިވަނީ ހުށަހަޅާފައި. އެމްޑީޕީގެ ރައީސް، ރައީސް ނަޝީދުއަށް، ރައީސް ސޯލިހުގެ ރަނިންމޭޓްގެ މަޤާމުވެސް ހައްޤުނުވަނީ ދެއްތޯ؟
– ޓޮމްގެ ޓުވީޓުގައި ވިދާޅުވިއެވެ.
ޤާސިމް އިބްރާހިމަކީ މިވެރިކަން ގެނައުމުގައި އެންމެ މުހިންމު ދައިރެއް އަދާކޮށް، ވެރިކަން ދެމެހެއްޓުމުގައިވެސް އެންމެ މުހިމު ދައުރެއް އަދާ ކުރައްވާ އެއް ލީޑަރެވެ. ޖޫމްހޫރީ ޕާޓީން ވަނީ ރިޔާސީ އިންތިޚާބުގައި ވާދަކުރާނެކަމަށް މީގެ ކުރިން އިއުލާން ކޮށްފައެވެ. ނަމަވެސް މިބައްދަލުވުމުގައި ދެޕާޓީގެ އިސް ބޭފުޅުން ވާދަ ކުރައްވާއިރު، މިބައްދަލުވުމަށްފަހު ކަންކަން ބަދަލުވުމުގެ ފުރުސަތު ބޮޑުކަމަށް ގިނަ ބަޔަކު ދެކެއެވެ.
ރިޔާސީ އިންތިޚާބުގައި ރައީސް ޞާލިހު ވާދަ ކުރައްވާއިރު، ރައީސް ނަޝީދުވެސް ވަނީ އިންތިޚާބުގައި ވާދަ ކުރައްވަނެކަމަށް އިއުލާން ކުރައްވާފައެވެ.
