މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސްކަމުގެ މަގާމުން ޝަހުބާން ފަހުމީ މިއަދު އިސްތިއުފާ ދެއްވައިފިއެވެ.
ޝަހުބާން މީޑިިއާ ކައުންސިލްގެ ރައީސްކަމުން އިސްތިއުފާ ދެއްވިކަން އިއުލާންކުރެއްވީ މިއަދު މިއަދު މޯލްޑިވްސް މީޑިއާ ކައުންސިލްގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ. އިސްތިއުފާ ދެއްވި ނަމަވެސް މޯލްޑިވްސް މީޑިއާ ކައުންސިލްގެ ރައީސްގެ ހައިސިއްޔަތުން ޝަހުބާން އިސްތިއުފާ ދެއްވަން ޖެހޭ ވަރުގެ ކަމެއް ކޮށްފައި ނުވާނެކަމަށް އޭނާ ވިދާޅުވިއެވެ.
އެމްއެމްސީގެ ގާނޫނު މިވަގުތު އޮތް ގޮތުން ކައުންސިލްގެ ރައީސް އިސްތިއުފާ ދެއްވުމަށް ކައުންސިލަށް ހުށަހެޅުއްވި ނަމަވެސް އެ ހިސާބުން އަދި މަގާމުން ވަކިވެގެން ނުދާނެއެވެ.
އެމްއެމްސީގެ ގާނޫނުގެ 18 ވަނަ މާއްދާގެ (ހ)ގައި ބުނެފައިވަނީ ކައުންސިލްގެ ރައީސް ނުވަތަ ނައިބް ރައީސް ނުވަތަ މެންބަރަކު އޭނާގެ މަގާމުން އިސްތިއުފާ ދޭން ބޭނުންވެއްޖެނަމަ ސަބަބުން ބަޔާންކޮށް ކައުންސިލަށް ފޮނުވާ ލިޔުމަކުން އިސްތިއުފާ ދެވިދާނެ ކަމަށެވެ. އަދި ކައުންސިލުން އެ އިސްތިއުފާ ގަބޫލުކުރިކަން އަންގަންދެން އެ މީހަކު އޭނާގެ ވާޖިބުތައް އަދާކުރުންމަތީ ދެމިހުންނަން ވާނެ ކަމަށެވެ. ނަމަވެސް އެ އިސްތިއުފާ ހުށަހަޅާތާ 15 ދުވަހުގެ ތެރޭގައި އިސްތިއުފާ ގަބޫލުކުރިކަން ނާންގައިފިނަމަ އެ އިސްތިއުފާ ގަބޫލުކުރީ ކަމަށް ބެލޭނެ ކަމަށެވެ.
ނޫސްތައް ރެގިއުލޭޓްކުރާ ކައުންސިލްގެ އިސްވެރިޔާގެ މަގާމުން އިސްތިއުފާ ދެއްވިއިރު، އޭނާ މަގާމުން ވަކިކުރުމަށް ރޭ ވެސް އިތުބާރު ނެތް ކަމުގެ ވޯޓު ނެގިއެވެ. އެކަމަކު، މީގެ ކުރިންނާއި ރޭ ނެގި ވޯޓުން ވެސް ޝަހުބާން ސަލާމަތްވީއެވެ. ކިންގްސް ފޮރެކްސް ޓްރޭޑިން ކުންފުނިން ގާނޫނާ ހިލާފަށް އިންވެސްޓްމަންޓް ސްކީމެއް ހަދައި އޮޅުވާލައިގެން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާކުރާ ކަމުގެ ތުހުމަތުކުރާއިރު އެ ކުންފުނީގެ ހިއްސާދާރުންގެ ތެރޭގައި ޝަހުބާނު ހިމެނެއެވެ.
