ބަންގްލަދޭޝްގެ ޗިޓަގޮންގ ސިޓީގެ ކައީގައި، ކޮންޓެއިނަރުތަކުގައި އެއްޗިހިތަކެއް ރައްކާ ކޮށްފައިހުރި ގުދަނެއް ގޮވާ، 49 މީހަކު މަރުވެ އެތައް ސަތޭކަ ބަޔަކު ޒަޚަމް ވެއްޖެއެވެ.
ސިޓަކުންޑާ ކިޔާ ސަރަހައްދެއްގައި ހުރި ޝިޕިން ކޮންޓެއިނަރުތަކެއް ތަކެއް ގޮވާ، މުޅި ސަރަހައްދުގައި އަލިފާން ރޯވުމާއި ގުޅިގެން މި އަލިފާންތައް ނިއްވުމަށްޓަކާ އެސަރަހައްދަށް ވަނީ އެތައްސަތޭކަ ބަޔަކު ޖަމާވެފައެވެ.
ލޯކަލް މީޑިއާތަކުން ހާމަ ކޮށްފައިވާ ގޮތުގައި މި ސަރަހައްދުގައި ހުރި ބައެއް ކޮންޓެއިނަރުތަކަކީ ކެމިކަލްތައް ރައްކާ ކޮށްފައި ހުރި ކޮންޓެއިނަރު ތަކެކެވެ.
ބަންގްލަދޭޝްގައި އިންޑްސްޓްރިއަލް ސަރަހައްދުތަކުގައި އަލިފާން ރޯވުމަކީ އާންމު ކަމެކެވެ. އަދި މިފަދަ ހާދިސާތައް އާންމު ގޮތެއްގައި ހިގާފައި ހުންނަނީ ރައްކާތެރިކަމުގެ ގޮތުން އަޅާންޖެގޭ ފިޔަވަޅުތަކުގެ ދޯދިޔާވުމުގެ ސަބަބުންނެވެ.
މިހާދިސާގައި އަނިޔާވެފައިވާ ގިނަ މީހުންގެ ހާލު ސީރިއަސްވުމާއި ގުޅިގެން، މަރުވާ މީހުންގެ އަދަދު މަތިވެގެން ދިއުމަކީ އެކަށީގެންވާ ކަމެއްކަމުގައި އޮފިޝަލުންވަނީ ވިދާޅުވެފައެވެ.
ލޯކަލް މީޑިއާތަކުން ރިޕޯޓު ކޮށްފައިވާ ގޮތުގައި، މި ސަރަހައްދުގެ ހޮސްޕިޓަލްތަކަށް ފަރުވާ ހޯދަން ގޮސްފައިވާ މީހުންގެ ގިނަ ކަމުން، ސަރަހައްދުގެ ހޮސްޕިޓަލްތައް ވަނީ ތޮށްޖެހިފައެވެ. އަދި ފަރުވާދޭ ފަރާތްތަކުން ވަނީ ލޭ ހަދިޔާކުރުމަށް އާންމުންނަށް އިލްތިމާސް ކޮށްފައެވެ. އޭގެ އިތުރުން، އަނިޔާވި ބައެއް މީހުން މިހާރުވަނީ ވެރިރަށް ޑާކާއަށް ބަދަލު ކުރެވިފައެވެ.
މި ސަރަހައްދުގައި އަލިފާން ރޯވެފައިވަނީ ބަންގލަދޭޝްގެ ގަޑިން ހޮނިހިރު ދުވަހުގެ 21:00ގައެވެ. އަދި އަދި އަލިފާން ރޯވުމާއެކު ގިނަ އަދަދެއްގެ އަލިފާން ނިއްވާ މީހުންނާއި ވޮލަންޓިއަރުންވަނީ އަލިފާން ނިއްވުމަށްޓަކާ ސަރަހައްދަށް ޖަމާވެފައެވެ.
އަދި މި ގުދަން ގޮވާފައިވަނީ، މި ތަނުގައި ރޯވެފައިވާ އަލިފާން ނިއްވުމަށް ގިނަ އަދަދެއްގެ ބަޔަކު ހަރަކާތްތެރިވަމުން ދަނިކޮށެވެ. މި ގޮވުން ގޮވުމާއެކު، އަލިފާން ނިއްވަމުން ދިޔަ އެތައް ބައެއްގެ ގައިގައި ރޯވެ، ތަކެއްޗާއި މީހުންވަނީ ޖައްވުގެތެރެއަށް ބުރައިގެން ގޮސްފައެވެ.
މި ގޮވުމުގެ ސަބަބުން، އަލިފާން ނިއްވުމަށް މަސައްކަތް ކުރަމުންދިޔަ 5 މީހަކު މަރުވެ އެތައް ބަޔަކަށް ވަނީ އަނިޔާ ވެފައެވެ. އަދި އެތައްބަޔަކު ވަނީ ގެއްލިފައެވެ. މީގެ ތެރޭގައި ހާދިސާ ކަވަރު ކުރަމުންދިޔަ ނޫސްވެރިންނާއި އަދި އެނޫން އެތައް ބަޔަކުވެސް ހިމެނެއެވެ.
މިގޮވުމުގެ އަޑު 30 ނުވަތަ 40 ކިލޯ މީޓަރު ދުރަަށް އިވިފައިވާ ކަމަށް ބައެއް ފަރާތްތަކުން ބުނެފައި ވެއެވެ.
