އެމެރިކާގެ ކުރީގެ ފަސްޓް ލޭޑީ ހިލަރީ ކްލިންޓަން އެމެރިކާއިން ޔޫއެންއަށް ކަޑައަޅާ ސަފީރަކަށް އައްޔަން ކުރުމަށް އެމެރިކާގެ އިންތިޚާބީ ރައީސް ޖޯ ބައިޑްންގެ އިންތިގާލީ ޓީމުން ވިސްނަމުންދާ ކަމަށް މީޑިއާ ރިޕޯޓްތައް ބުނަން ފަށައިފިއެވެ.
ވޮޝިންޓަން ޕޯސްޓުން ބައިޑްންގެ ޓަރާންސިޝަން ޓީމުގެ އިސް އޮފިޝަލަކާ ހަވާލާދީ ރިޕޯޓުކޮށްފައިވާ ގޮތުގައި ޔޫއެންގައި އެމެރިކާ ތަމްސީލު ކުރާ އެމްބެސެޑަރަކަށް ހިލަރީ ހަމަޖެއްސުމަށް ބައިޑްން ވިސްނަވަމުންދަނީ، ޓްރަމްޕްގެ ދައުރުގައި ބައިނައަގުވާމީ މަސްރަހުގައި ގެއްލިގެން ގޮސްފައިވާ އެމެރިކާގެ މަގާމާއި ހައިސިއްޔަތު އަބުރާ އިއާދަކުރުމަށް އެންމެ އެކަށީގެންވާ ޗޮއިސްއަކީ ހިލަރީ ކްލިންޓަންކަމަށް ބައިޑްން ދެކެވަޑައިގަންނަވާތީއެވެ.
ޔޫއެންއަށް ހިލަރީ ކްލިންޓަން އައްޔަން ކުރުމަށް ބައިޑްން ވިސްނަވަމުން ގެންދަވާކަމުގެ ޚަބަރުތައް ފެތުރެމުންދަނީ، އިންތިޚާބީ ރައީސެއްގެ ހައިސިއްތުންވެސް، ގެއްލިގެން ގޮސްފައިވާ އެމެރިކާގެ މަގާމް ދުނިޔޭގެ ލީޑަރުންގެ ކުރިމަތީގައި އަލުން ނެގެއްޓުމުގެ މަސައްކަތް ބައިޑްން ފައްޓަވާފައި ވަނިކޮށެވެ. އިންތިޚާބު ކާމިޔާބު ކުރެއްވުމަށްފަހު އެމެރިކާގެ ޚާރިޖީ ސިޔާސަތާ ގުޅޭގޮތުން ބައިޑްން ވިދާޅުވެފައިވަނީ "މިއީ އެމެރިކާގެ އެބުރި އައުމެއް. އަލުން އެމެރިކާ މިއޮތީ ކުޅެން ދަޑަށް އަރާ" މިހެންނެވެ.
2016 ވަނަ އަހަރު އެމެރިކާގެ ރައީސްކަމަށް ޓްރަންޕްއާޢީ ވާދަކޮށް ހިލަރީއަށް ވަނީ ނާކާމިޔާބުވެފައެވެ. އެ އިންތިޚާބުގައި ހިލަރީ ނާކާމިޔާބީއާ ކުރިމަތިލައްވަން ޖެހިވަޑައިގެންނެވި ނަމަވެސް، ޕޮޕިއުލާ ވޯޓުން ހިލަރީ ޓަރަމްޕްގެ މައްޗަށް 3 މިލިއަން ވޯޓުން ކުރި ހޯއްދެވިއެވެ. އެހެންނަމަވެސް އިލެކްޓޯރަލް ވޯޓުން ކުރި ހޯއްދަވާ ރިޔާސީ އިންތިޚާބު ކާމިޔާބު ކުރެއްވީ ޑޮނަލްޑް ޓްރަމްޕެވެ.
2016 ވަނަ އަހަރުގެ ރިޔާސީ އިންތިޚާބުގެ ނާކާމިޔާބީއަށްފަހު ހިލަރީ ވެގެންދިޔައީ ޓަރަމްޕަށް އެންމެ ބޮޑަށް ފާޑު ވިދާޅުވުމުގައި ދެމިހުންނެވި އެއް ބޭފުޅާކަމުގައެވެ. އަދި އަބަދުވެސް ހިލަރީ ވިދާޅުވަމުން ގެންދެވީ، އިންތިޚާބުން ބަލިވުމުގައ،ި ރަޝިޔާއިން އެ އިންތިޚާބުގެ ހެކްކޮށް ނަތީޖާއާއި ކުޅުމަށް ކުރިމަސައްކަތް މުހިންމު ދައުރެއް އަދާކޮށްފައިވާ ކަމުގައެވެ.
2016 ވަނަ އަހަރުގެ ނާކާމިޔާބީއަށްފަހު، ލީބިޔާގެ ބެންގާޒީގައި ހުރި އެމެރިކާގެ ކޮންސިއުލޭޓަށް 2011ވަނަ އަހަރު ދިން ޓެރަރިސްޓަ ހަމަލާގައި ހިލަރީ ކްލިންޓަންގެ އިހުމާލެއް އޮތްތޯ ބެލުމަށް އެމެރިކާގެ ކޮންގްރެސްއަށް ހާޒިރުކޮށް ސުވާލުކުރެވުނުވެ. އަދި ހިލަރީއަށް ފާޑުވިދާޅުވާ ފަރާތްތަކުން މިހަލާގެ ޒިންމާ އެކަމަނާ އުފުއްލަވަން ޖެހޭކަމަށް އަބަދުވެސް ބުނަމުން ދެއެވެ.
ޚަބަރުތައް ބުނާގޮތުގައި، ބައިޑްން ގެންދަވަނީ، އޭނާގެ ކުރީގެ ޗީފް އޮފް ސްޓާފް ސްޓީވް ރިޝެޓި، ކުރީގެ ޑެލާވަރ ސެނެޓަރ ޓެޑް ކުފްމަން އަދި ކުރީގެ ނޭޝަނަލް ސެކިއުރިޓީ އެޑްވައިޒަރ ޓޮމް ޑޮނިލަންވެސް ބައިޑްންގެ ސަރުކާރުގެ މަތީ މަގާމްތަކަށް ހަމަޖެއްސުމަށް ވިސްނަވަމުންނެވެ.
