ފީފާ ވޯލްޑް ކަޕުގެ ޔޫރަޕް ސަރަހައްދުގެ ކޮލިފައިން ޕްލޭއޮފުގެ ފައިނަލުން ޔޫކްރެއިން ޖާގަ ހޯދައިފިއެވެ.
ޕްލޭއޮފް ފައިނަލުން ޔޫކްރެއިން ޖާގަ ހޯދީ ސެމީ ފައިނަލްގައި ސްކޮޓްލަންޑާއި ބައްދަލުކުރި މެޗް 3-1 ގެ ނަތީޖާއަކުން ކާމިޔާބުކޮށްގެންނެވެ. ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔޫކްރެއިނުންނެވެ. މިމެޗް ފެށުމުގެ ކުރިން ޔޫކްރެއިން އާއެކު ސްކޮޓްލަންޑް އޮތްކަން ހާމަކޮށްދިނުމުގެ ގޮތުން ވަނީ ހަރަކާތްތަކެއް ހިންގާފައެވެ. އެގޮތުން ޔޫކްރެއިންގެ ގައުމީ ސަލާމް ކިޔުމުގައި ސްކޮޓްލަންޑްގެ ރައްޔިތުންވެސް ބައިވެރިވެފައިވެއެވެ.
މި މެޗްގެ ފުރަތަމަ ލަނޑު މެޗްގެ 33 ވަނަ މިނެޓްގައި ކާމިޔާބުކޮށް، މެޗްގެ ލީޑު ނެގީ ޔޫކްރެއިނުންނެވެ. މި ލަނޑު އެޓީމަށް ޖަހައިދިނީ އަންދްރޭ ޔާމަލެންކޯއެވެ. އަދި ދެވަނަ ހާފްގެ ކުޅުން ފެށިތާ ހަވަނަ މިނެޓްގައި ރޯމަން ޔަރެމްޗުކް ވަނީ ޔޫކްރެއިންގެ ލީޑު ފުޅާކޮށްދީފައެވެ.
މި މެޗްގައި ސްކޮޓްލަންޑުން ކާމިޔާބުކުރީ ހަމައެކަނި ލަނޑު މެޗްގެ 79 ވަނަ މިނެޓްގައި ޖަހާދިނީ ކަލުމް މެކްގްރެގާއެވެ. މި ލަނޑާއެކު ސްކޮޓްލަންޑުން އިތުރު ހިތްވަރަކާއެކު މެޗްގެ ނަތީޖާ ހަމަހަމަ ކުރެވެތޯ މަސައްކަތް ކުރި ނަމަވެސް، އެޓީމަށް އެކަން ވާގޮތެއް ނުވިއެވެ. އެއާއެކު މެޗްގެ އިތުރު ވަގުތުގައި ޔޫކްރެއިންގެ އާޓެމް ޑޮވްބީކް ލަނޑެއް ޖަހައި، އަނެއްކާވެސް މި މެޗްގައި ޔޫކްރެއިންއަށް ދެ ލަނޑުގެ ލީޑެއް ނަގާދީފައެވެ.
މި ކާމިޔާބީއާއެކު ޕްލޭއޮފް ފައިނަލަށް ޔޫކްރެއިން ދަތުރުކުރިއިރު، ފައިނަލްގައި ޔޫކްރެއިން ބައްދަލުކުރާނީ ވޭލްސްއާއެވެ. އެ މެޗު ކުޅޭނީ އަންނަ އާދީއްތަ ދުވަހުގެ ރޭއެވެ.
