ސަރުކާރުގެ ވިޔަފާރި ކުންފުނި، ސްޓޭޓް ޓްރޭޑިން އޯގަނައިޒޭޝަނަށް މިދިޔަ އަހަރު ލިބުނު ފައިދާއިން ހިއްސާއަކަށް 65ރ. މަގުން 73.2 މިލިއަން ރުފިޔާ ބަހަން މިހާރު ކުރިޔަށްދާ އަހަރީ އާންމު ޖަލްސާގައި ފާސްކޮށްފިއެވެ.
އެސްޓީއޯއިން މިގޮތަށް ފާސްކޮށްފައިވަނީ އެކުންފުނިން ބޭއްވި 2021 ވަނަ އަހަރުގެ އަހަރީ އާއްމު ޖަލްސާގައި ބައިވެރިވި ހިއްސާދާރުންގެ ވޯޓުންނެވެ. މިދިޔަ އަހަރު އެސްޓީއޯއިން ބަހާފައިވަނީ ހިއްސާއަކަށް 60 ރުފިޔާއެވެ. އެހެންކަމުން މިއަހަރުގެ އަދަދަކީ މިދިޔަ އަހަރާއި އަޅާބަލާއިރު 5 ރުފިޔާގެ އިތުރުވުމެކެވެ. 2020 ވަނަ އަހަރު ބަހާފައިވަނީ 58 ރުފިޔާއެވެ.
އެސްޓީއޯ ކުންފުނީގެ އާމްދަނީ އާއި ޖުމްލަ ފައިދާ ރެކޯޑް އަދަދުތަކަށް އިތުރުވި ނަމަވެސް، މުޅި ގްރޫޕަށް ލިބުނު ސާފު ފައިދާ އާމްދަނީގެ ނިސްބަތުން ދަށެވެ. މިހެން ދިމާވި މައިގަނޑު ސަބަބަކީ ފިޝަރީޒް ސެކްޓާއިން އަހަރުގެ ކުރީކޮޅު ލިބުނު ގެއްލުންތައް ފޫބައްދަން ޖެހުމުން ކަމަށް ކުންފުނީގެ އަހަރީ ރިޕޯޓުގައި ފާހަގަކޮށްފައިވެއެވެ.
އަހަރީ އާއްމު ޖަލްސާގައި އެސްޓީއޯ އޮޑިޓް ކުރަން ޕްރައިސް ވޯޓާ ހައުސް ކޫޕާސް އައްޔަން ކުރަން ވަނީ ފާސްކޮށްފައެވެ. އަދި ކުންފުނީގެ އާންމު ހިއްސާދާރުންގެ ފަރާތުން ޑިރެކްޓަރުންގެ ބޯޑަށް 2 ފަރާތަކުން ވަނީ ކުރިމަތިލާފައެވެ. ހިއްސާދާރުންގެ ވޯޓާއެކު މި މަޤާމަށް ހޮވުނީ ވ. ޝެހެނާޒް މަންޒިލް، ސައީދެވެ. ކުރިން މި މަޤާމްގައި ހުންނެވީ، ހ. މޮސްކޯގެ، އައިމިނަތު ރުޝްމާއެވެ.
އެސްޓީއޯގެ ސަބްސިޑިއަރީތަކުގެ ގޮތުގައި ނުވަ ކުންފުންޏެއް ދަނީ ހިންގަމުންނެވެ. އެއީ، އެލައިޑު އިންޝުއަރެންސް، ފިއުލް ސަޕްލައި މޯލްޑިވްސް (އެފްއެސްއެމް)، މޯލްޑިވް ގޭސް، މޯލްޑިވްސް ސްޓްރަކްޗަރަލް ޕްރޮޑަކްޓްސް، މިފްކޯ، ރޭސުޓް މޯލްޑިވްސް ސިމެންޓް، މޯލްޑިވްސް ސްޓޭޓް ޝިޕިން އަދި އެސްޓީއޯ ސިންގަޕޯއެވެ.
މިދިޔަ އަހަރަކީ ވެސް އެސްޓީއޯގެ އާމްދަނީ ރެކޯޑް އަދަދަކަށް އުފުލުނު އަހަރެކެވެ. އެގޮތުން މުޅި އަހަރުގެ ތެރޭގައި އެ ކުންފުނީގެ ސަބްސިޑަރީ ހިމެނޭގޮތަށް އެސްޓީއޯ ގްރޫޕަށް 11.2 ބިލިއަން ރުފިޔާ ލިބުނެވެ. މިއީ އޭގެ ކުރީ އަހަރަށް ވުރެ 32 ޕަސެންޓު އިތުރު އަދަދެކެވެ.
