ބައިނަލްއަގުވާމީ ބަންކަރިންގެ ހިދުމަތާއެކު ތެޔޮ ސްޓޯރޭޖެއް އިހަވަންދިއްޕޮޅުގައި ތަރައްޤީކުރުމަށް ނިންމާފައިވާކަމަށް އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެއެވެ.
އެސްޓީއޯގެ އަހަރީ އާއްމު ޖަލްސާގައި މިރޭ ވާހަކަ ދައްކަވަމުން އަމުރު ވިދާޅުވީ ރާއްޖެ އޮންނަ އެއް ޑިގްރީގެ ލޮކޭޝަންއަކީ ތަފާތު މަގެއް ކަމަށާ، އެތަނުގެ ފައިދާ ހޯދަން ޖެހޭ ކަމަށެވެ.
އެ ސަރަހައްދަކު ނެތް މާގިނައިން ހިދުމަތް ދެވޭނެ ގޮތެއް. އަޅުގަނޑުމެންގެ މަގުސަދަކީ ސްޓްރެޓެޖިކް ސްޓޯރޭޖާއެކީގައި އިންޓަނޭޝަނަލް ބަންކަރިންއަށް ދިއުން. ފުރަތަމަ މަސައްކަތް ކުރަނީ ފްލޯޓިން ސްޓޯރޭޖަކާއެކު މަަސައްކަތް ފަށަން. އެކަން ކޮށްފިނަމަ ރާއްޖޭގެ އިގްތިސޯދަށް ވަރަށް ބޮޑު ބަދަލެއް އަންނާނެ.
– އަމްރު ވިދާޅުވިއެވެ.
އަމްރު ވިދާޅުވީ ރާއްޖެ އޮންނަ ލޮކޭޝަންގެ ގޮތުން އިހަވަންދިއްޕޮޅު ސަރަހައްދުން ކޮންމެ ދުވަހަކުވެސް 300އަށްވުރެ ގިނަ އާގުބޯޓު ދަތުރުކުރާ ކަމަށެވެ. އެހެންކަމުން މި ބޯޓުތަކަށް އަމާޒްކޮށްގެން ބައިނަލްއަޤްވާމީ ބަންކަރިންގެ ޙިދުމަތްތައް ދިނުމަށް ނިންމާފައިވާކަމަށް އަމްރު ވިދާޅުވިއެވެ.
ރާއްޖެ މި އޮންނަ ލޮކޭޝަންއަކީ ވަރަށްވެސް ތަފާތު ލޮކޭޝަނެއްކަން. ތިޔަބޭފުޅުންނަށް ފެންނާނެ ރަތް ކުލައާއި ފެހި ކުލައިގެ ރޮނގުތަކެއް ދާތަން. އެއީ އެންމެ އުތުރު. އެތާ ކައިރިން ލާފަ، ދުވާލަކު މައްޗަށް 300 އަށްވުރެ ގިނަ އާގުބޯޓު އެބަ ދަތުރުކުރޭ. އެ ސަރަހައްދުގައި ނެތް މާގިނައިނެއް އެއަކަށް ސާވިސް ދެވޭނެ ގޮތެއް. އަޅުގަނޑުމެންގެ ވިސްނުމަކީ ސްޓްރެޓިކް ސްޓޯރޭޖާ އެކީގައި އިންޓަނޭޝަނަލް ބަންކަރިންއަށް ދިއުން.
– އަމްރު ވިދާޅުވިއެވެ.
އިހަވަންދިއްޕޮޅުގައި "އައިހެވަން"ގެ ނަމުގައި ކުރީ ސަރުކާރުން ބޮޑު މަޝްރޫއެއް ހިންގަން މަސައްކަތް ކުރިއެވެ. އެތައް ބިލިއަން ޑޮލަރެއްގެ މި މަޝްރޫއުގައި ވެސް ބަންކަރިން އާއި ޓޫރިޒަމްގެ ފެސިލިޓީ އަދި ޑިއުޓީ ފްރީ ޒޯން ފަދަ ޒަމާނީ ހިދުމަތްތައް ދޭން ރޭވިއެވެ.
