ރައްޔިތުންގެ މަޖިލީހުގެ ރައީސް އަދި ކުރީގެ ރައީސް ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާއި ގުޅިގެން ދަޢުވާ އުފުލާފައިވާ މީހުންގެ ޝަރީޢަތުގެ އަޑުއެހުން ކެންސަލްކޮށްފިއެވެ.
މިއަދު ހެނދުނު 09:00އަށް ތައާވަލުކޮށްފައިވާ އަޑުއެހުން ކެންސަލްކުރީ ޖަލުގައި ތިބި ދައުވާ ލިބޭ މީހުން ކޯޓަށް ޙާޒިރު ނުކުރެވިގެންކަމަށް ކްރިމިނަލް ކޯޓުން ބުންޏެވެ. މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުގައި ތިބި މީހުން ޝަރީޢަތަށް ޙާޒިރުނުކުރެވުނީ މޫސުން ގޯސްވެ ކަނޑުގަދަވުމުގެ ސަބަބުންކަމަށް ކޯޓުން ވަނީ ބުނެފައެވެ.
މިއަދުގެ އަޑުއެހުން ކެންސަލްވުމާއި ގުޅިގެން އަންނަ ހޮނިހިރު ދުވަހު އަޑުއެހުން ބާއްވަން މަސައްކަތްކުރަމުން އަންނަކަމަށް ކްރިމިނަލް ކޯޓުން ވިދާޅުވިއެވެ. މިދޔަ އަހަރުގެ މޭ 6 ވަނަދުވަހު ދިން ނުރައްކާތެރި ޓެރަރިސްޓް ހަމަލާއާއި ގުޅިގެން ދިހަ މީހެއްގެ ޝަރީއަތް މިވަގުތު ކޯޓުގައި ކުރިއަށްދެއެވެ. އެ ދިހަމީހުންގެ ތެރެއިން މިއަދުގެ އަޑުއެހުމަށް ތައާވަލުކުރީ މި މައްސަލާގެ ތުހުމަތު ކުރެވޭ ތަހްނީމް އަހުމަދާއި، މުޖާޒު އަހުމަދާއި، އިސްހާގުއާއި، ފަހުމީ އަލީއާއި، އަލީ ހައިޝަމްއާއި، ފަހުމީ އަލީއާއި، މުހައްމަދު ނާޒިމްގެ މައްޗަށް ޝަރީޢަތް ހިންގުމަށެވެ.
ރައީސް ނަޝީދަށް ދިން ހަމަލާއާއި ގުޅިގެން މިހާތަނަށް ކުށް ސާބިތުވެފައިވަނީ އަހްމަދު އަދުހަމް މައްޗަށެވެ. އޭނާއަކީ ނަޝީދަށް ދިން ހަމަލާގައި ބޮން ގޮއްވާލި މީހާއެވެ. އޭނާގެ މައްޗަށް ކޯޓުން ވަނީ 23 އަހަރުގެ ޖަލު ހުކުމެއް އިއްވާފައެވެ.
ރައީސް ނަޝީދު އަވަހާރަކޮށްލަން ދިން ޓެރެރިސްޓް ހަމަލާގެ ޝަރީއަތްތައް އޮބްޒާވުކުރުމުގެ ފުރުސަތު އެމަނިކުފާނުގެ ވަކީލުންނަށް ދިނުމަށް ކްރިމިނަލް ކޯޓުން ނިންމާފައިވެއެވެ.
