ކުރީގެ ރައީސް ޢުބްދުﷲ ޔާމީންގެ ގެކޮޅުގައި ދަމާފައިހުރި ބެނާއެއް ނެގުމަށް ކޯޓު އަމުރު ހޯދުމަށް އިންވެސްޓިގޭޝަން އޮފިސަރެއްގެ ލޮގްއިން ބޭނުކޮށްގެން ކްރައިމް އިންވެސްޓިގޭޝަން ކޮމާންޑްގެ ހެޑް އެސިސްޓަންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ކޯޓު އަމުރަށް ދުނުކަމަށް ބުނެ ދިޔަރެސް ނޫހުން އާންމުކޮށްފައިވާ މައުލޫމަތު ފުލުހުން ދޮގު ކޮށްފިއެވެ.
މި ޚަބަރު ދޮގުކޮށް ފުލުހުން ނެރެފައިވާ ނޫސް ބަޔާނުގައި ވިދާޅުވެފައި ވަނީ، ދިވެހި ފލުހުންގެ ޚިދުމަތުގައި ކޯޓު އަމުރަށް އެދުމުގެ އުސޫލު ހަމަޖެހިފައި އޮންނަނީ އިންވެސްޓިގޭޝަން އޮފިސަރު އެދުމުން އެ އިންވެސްޓިގޭޝަން އޮފިސަރެއްގެ ސޕަވައިޒަރު އެޕްރޫވް ކުރުމުން ކޯޓު އަމުރު ރިކުއެސްޓު ކޮމްޕިއުޓަރ ސިސްޓަމުން ޖެނެރޭޓުވާ ގޮތަށް ކަމަށެވެ. މިގޮތުން މި މައްސަލައިގައިވެސް ކޯޓުއަމުރު ރިކުއެސްޓު ޖެނެރޭޓު ކޮށްފައިވަނީ އިންވެސްޓިގޭޝަން އޮފިސަރު ރިކުއެސްޓު ކުރުމުން ސުޕަވައިޒަރު އެޕްރޫވް ކުރުމުން ކަމުގައިވެސް ފުލުހުން ބުނެފައި ވެއެވެ.
އޭގެ އިތުތަށް ފުލުހުންގެ ފަރާތުން ހާމަ ކޮށްފައިވާ ގޮތުގައި، ދިޔަރެސް ނޫހުގައި ލިޔެފައިވާ މިއާޓިކަލްގައި، ފުލުހުންގެ މީޑިއާއާ މިކަމާ ގުޅޭގޮތުން ސުވާލުކުރުމުން ޖަވާބު ދީފައި ނުވާކަމަށް ބުނެފައިވާތީ، މި ބަޔާނުގައި ފުލުހުން ވިދަޅުވެފައިވަނީ، މިކަމާ ގުޅޭ ސުވާލެއް 2022 މެއި 27 ވީ ހުކުރު ދުވަހުގެ ހެނދުނު 10:11 އެހައިކަންހާއިރު ވަޓްސްއަޕް މެދވެރިކޮށް ފޮނުވާފައި ވާކަމުގައެވެ. އެހެންނަމަވެސް، ނޫސްވެރިންނަށް މައުލޫމާތު ދިނުމަށް ދެ ފޯން ނަންބަރު ކަނޑައެޅިފައި ވީ ނަމަވެސް، އެއިން އެއްވެސް ނަންބަރަކަށް ގުޅުމަކާ ނުލައި އަދި ފޮނުވި މެސެޖު ލިބުނުކަންވެސް ޔަގީން ކުރުމަކާ ނުލައި، އޭގެ ކުޑަ ވަގުތުކޮޅެއް ފަހުން، ފުލުހުންގެ ފަރާތުން ޖަވާބެއް ނުލިބުނު ކަމަށްބުނެ ނޫހުގައި މި އާރޓިކަލް ޕަބްލިޝް ކޮށްފައި ވާކަމުގައެވެ.
ފުލުހުން ވިދާޅުވެފައި ވަނީ، ދިވެހި ފުލުހުންގެ ޚިދުމަތުން ނޫސްވެރިން ބޭނުންވާ މައުލޫމާތު ފޯރުކޮށްދިނުމަށް ހަމަޖައްސާފައިވާ ގޮތްތައް ބޭނުން ކޮށްގެން
މިކަމާ ގުޅޭ ސައްހަ މައުލޫމާތު ހޯދުމަށް އެކަށީގެންވާ ގޮތެއްގައި މަސައްކަތް ކޮށްފައި ނުވާ ކަމުގައެވެ. އަދި ފުލުހުން ވަނީ، އެ މުވައްސަސާގެ މަސައްކަތްތަކާއި ގުޅޭގޮތުން މިފަދަ ދޮގު މައުލޫމާތު ނުފެތުރުމަށް އިލްތިމާސް ކޮށްފައެވެ.
