މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ ފާއިތުވެދިޔަ އަހަރުގެ ފާއިދާއިން ހިއްސާއަކަށް 60 ލާރި ބަހަން، ކުންފުނީގެ ހިއްސާ ދާރުންނަށް ހުށަހަޅަން ކުންފުނީގެ ބޯޑުން ނިންމައިފިއެވެ.
މިނިންމުން ކުންފުނީގެ ބޯޑުން ނިންމާފައިވަނީ މިމަހުގެ 18ވަނަ ދުވަހު ބޭއްވި ބޯޑުގެ ބައްދަލު ވުމުގައެވެ. އަދި މި ނިންމުން ތަންފީޒު ވެގެން ދާނީ، ކުންފުނީގެ އަހަރީ އާންމު ޖަލްސާ އަށް ހުށަހަޅާ، ހިއްސާ ދާރުންގެ ތާއީދު ލިބިއްޖެ ނަމައެވެ.
އެމްޓީސީއަކީ ފަތުރުވެރިކަން ކުރިއެރުވުމަށް ސަރުކާރުން އުފެއްދި ކުންފުންޏެކެވެ. އަދި އެކުން ފުނި އުފެދިގެން އައުމަށްފަހު ކުރީ ކޮޅުގައި ހިއްސާ ދާރުންނަށް ބޮޑު ފައިދާއެއް ލިބުނުނަމަވެސް އޭގެ ފަހުން ދިގު މުއްދަތެއް ވަންދެން ކުންފުންޏަށް ބޮޑެތި ގެއްލުންތަކަކާއި ކުރިމަތިކާން ޖެހިފައެވެ. އަދި އެއަށްފަހު ޖެހިގެން އައި 11 އަަހަރު ވަންދެން ހިއްސާ ބަހާފައެއް ނުވެއެވެ. 11 އަހަރަށްފަހު ފުރަތަމަ ފަހަރަށް ހިއްސާ ބަހާފައިވަނީ 2020 ވަނަ އަހަރުއެވެ. އެއަހަރު ބަހާފައިވަނީ ހިއްސާއަކަށް 50 ލާރިއެވެ. އަދި ޖެހިގެން އައި އަހަރު ހިއްސާއަކަށް 70 ލާރި ބަހާފައި ވެއެވެ.
ފާއިތުވި 3 އަަހަރުވެސް ފާހަގަވެގެން ގޮސްފައިވަނީ އެމްޓީޑީސީއަށް ފައިދާ ވެފައިވާ 3 އަަހަރު ކަމުގައެވެ. މީގެ ތެރެއިންވެސް ކުންފުންޏަށް އެންމެ ބޮޑު ފައިދާއެއް ވެފައިވަނި ފާއިތުވެދިޔަ އަހަރުއެވެ. މިގޮތުން ކުންފުނީގެ ހިސާބުތައް ދައްކާފައިވާ ގޮތުން، ފާއިތުވެދިޔަ އަހަރު ނިމުނު އިރު ނަގުދު ފައިސާގެ ގޮތުގައި ކުންފުނީގައި 4.8 މިލިއަން ޑޮލަރު ހުއްޓެވެ.
ކުންފުނީގެ ހަރު މުދަލާއި އިންވެސްޓުމަންޓު ތަކުގެ އަގަކީ 98 މިލިއަން ޑޮލަރެވެ.
