ޖައްމޫ ކަޝްމީރުގެ ހަނގުރާމަވެރި ލީޑަރު ޔާސީން މާލިކް އުމުރަށް ޖަލަށްލާން، އިންޑިއާގެ ދިއްލީގެ ޚާއްސަ ކޯޓަކުން މިއަދު ހުކުމް ކޮށްފިއެވެ. އޭނާގެ މައްޗަށް އުމުރު ދވަހުގެ ޖަލު ހުކުމެއް އިންޑިއާގެ ދިއްލީގެ ކޯޓުން އިއްވާފައިވަނީ، ޓެރަރިޒަމަށް އޭނާ ފަންޑު ކުރުމުގެ ކުށް ސާބިތު ވުމާއި ގުޅިގެންނެވެ.

ޔާސިން މާލިކްއަކީ ކަޝްމީރުގައި ވަކިވެގަތުމަށް ހަނގުރާމަ ކުރަމުން އަންނަ ޖަމާއަތެއް ކަމުގައިވާ ޖައްމޫ އެންޑް ކަޝްމީރު ލިބަރޭޝަން ފްރޮންޓު (JKLF)ގެ ލީޑަރެވެ. ޖައްމޫ އެންޑް ކަޝްމީރު ލިބަރޭޝަން ފްރޮންޓްއަކީ އިންޑިއާއިން މަނާ ކޮށްފައިވާ ހަނގުރާމަވެރި ޖަމާއަތެކެވެ.

މާލިކްވަނީ، އޭނާގެ މައްޗަށް ކުރެވިފައިވާ ތުހުމަތުތަކަށް އިންކާރު ނުކުރާނެކަމަށް ކޯޓުގައި ވިދާޅުވެފައެވެ. މި ތުހުމަތުތަކުގެ ތެރޭގައި އޭނާ ޓަރަރިޒަމަށް ފަންޑު ކުރުމުގެ ކުށާއި، ޖައްމޫ އެންޑް ކަޝްމީރުގެ ރައްޔިތުން އިންޑިއާއިން ވަކި ކުރުމަށް މަސައްކަތް ކުރުމުގެ ކުށްވެސް ހިމެނެއެވެ. އޭނާގެ މައްޗަށް ދައުވާ ކޮށްފައިވަނީ، ގާނޫނާއި ޚިލާފް އަމަލްތައް ހިންގުން މަނާކުރާ ގާނޫނުގެ ދަށުންނާއި، އަދި އިންޑިއާގެ ގާނޫނުލް އުގޫބާތުގައި ޓެރަރިޒަމާއި އަދި ދައުލަތާއި ދެކޮޅަށް ބަޢާވާތް ކުރުން މަނާކުރާ މާއްދާތަކުގެ ދަށުންނެވެ.

ޝަރީޢަތުގެ އެންމެ ފަހު މަރުހަލާގައި މާލިކް ކޯޓުގައި ވިދާޅުވެފައިވަނީ، އޭނާއާއި ދެކޮޅަށް ކޮށްފައިވާ ދައުވާތަކާއި ދެކޮޅަށް އޭނާ ޗެލެންޖު ކުރަން ބޭނުން ނުވާ ކަމުގައެވެ.

މި ޝަރީއަތުގައި އިންޑިއާގެ ނޭޝަނަލް އިންވެސްޓިގޭޓިވް އޭޖެންސީންވަނީ މާލިކްގެ މައްޗަށް މަރުގެ އަދަބު ދިނުމަށް ވަކާލާތު ކޮށްފައެވެ. އަދި މާލިކް ކޯޓުގައި ވިދާޅުވެފައިވަނީ، އޭނާއާއި ޓަރަރިޒަމްއާއި ގުޅުން އޮތްކަމަށް އިންޑިއާގެ ނޭޝަނަލް އިންވެސްޓިގޭޓިވް އޭޖެންސީއަށް ކޯޓުގައި ސާބިތު ކޮށްދެވިއްޖެނަމަ، ދަން ޖައްސާ މަރާލުމަށް ކޯޓުން އޭނާގެ މައްޗަށް ހުކުމް ކުރުމާމެދު އޭނާގެ އެއްވެސް އިއުތިރާޒެއް ނެތްކަމުގައެވެ. އަދި އޭނާ ވިދާޅުވެފައިވަނީ ކޯޓުން އޭނާ އެދޭނެ އެއްވެސް ކަމެއް ނެތްކަމަށާއި، ގޮތް ނިންމާނީ ކޯޓުން ކަމުގައެވެ.

ޝަރީއަތުގައި އޭނާވަނީ ގާނޫނީ ވަކީލެއްގެ ބޭނުން ކުރުމަށް ދެކޮޅު ހައްދަވާފައެވެ. އޭގެ ނަތީޖާއެއްގެ ގޮތުން ކޯޓުންވަނީ އޭނާގެ ފަރާތުން ވަކާލާތު ކުރާނޭ ވަކީލަކު އައްޔަން ކޮށްފައެވެ. ކޯޓުން އައްޔަންކުރި ވަކީލު ކޯޓުގައި އެދިފައިވަނީ، އޭނާގެ މައްޗަށް އަންނަން އޮތް އެންމެ ކުޑަ ހުކުމް ކަމުގައިވާ، އުމުރު ދުވަހުގެ ޖަލުހުކުމް އޭނާގެ މައްޗަށް އިއްވާ ދިނުމަށެވެ.

ޔާސީން މާލިކްއަކީ ޖަންމޫ ކަޝްމީރު އިންޑިއާއި ޕާކިސްތާނުންވެ މިނިވަން ވުމަށް ވަކާލާތު ކުރަމުންއައި ހަނގުރާމަވެރި ޖަމާއަތް ޖައްމޫ ކަޝްމީރީ ލިބަރޭޝަން ފްރޮންޓުގެ ލީޑަރެވެ. މި ޖަމާއަތް އުފެދިގެން އައުމާއެކީ ވަނީ ކަޝްމީރު ވެލީގައި އިންޑިއާއި ދެކޮޅަށް ހަގުރާމަ ކޮށްފައެެވެ. އެހެންނަމަވެސް، މާލިކް ވަނީ 1994ވަނަ އަހަރު ހަމަނުޖެހުންތައް ދޫކޮށް، މައްސަލައަށް ސުލްހަވެރި ހައްލެއް ހޯދުމަށް ތާއީދު ކުރަން ފަށާފައެވެ.

އިންޑިއާގެ ފުލުހުން އޭނާ ހައްޔަރު ކޮށްފައިވަނީ 2017ވަނަ އަހަރުއެވެ.