ވެރިކަމަށް ވަައިގަތުމުގެ ކުރިންނާއި، އަދި ވެރިކަމަށް ވަޑައިގެންފަހުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެވަޑައިގެންނެވި ކޮންމެ ވައުދަކީ ފުއްދޭނެ ވައުދެއް ނޫންކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ސަރުކާރުން ވެފައިވާ ބައެއް ވައުދުތައް ނުފުއްދި ދިގުލައިގެން ދާތީ އެ ކަމުގެ ކަންބޮޑުވުން ފާޅުކުރެއްވައި ވިލުފުށީ ދާއިރާގެ މެމްބަރު ހަސަން އަފީފް ވަނީ މިނިސްޓަރ އަސްލަމާއި ސުވާލު ކުރައްވާފައެވެ. އަފީފްގެ ސުވާލުގައި ވިދާޅުވީ ސަރުކާރުން ވައުދުތައްވާއިރު ސަރުކާރުގެ ތެރޭގައި ކުރެވެނީ ކޮން ކަމެއްތޯ ނުކުރެވޭނީ ކޮން ކަމެއްތޯ މަޝްވަރާ ކުރެވޭތޯ އައްސަވާފައެވެ.
އަފީފްގެ ސުވާލަށް ޖަވާބު ދެއްވަމުން އަސްލަމް ވިދާޅުވީ ސަރުކާރަށް ގިނަ ވައުދު ވަނީ ވައުދު ފުއްދުމުގެ ނިޔަތުގައި ނަމަވެސް ވައުދުތައް ވެވިފައި ހުންނަނީ އެ ކަމެއްގެ ހުރިހާ ތަފްސީލެއް ބެލުމެއް ނެތި ކަމަށެވެ. އެކަމުގެ ސަބަބުން، ގިނަ ހުރަސްތަކެއް ވައުދު ފުއްދުމަށް ކުރިމަތިވާ ކަމަށް ވިދާޅުވިއެވެ.
ހުރިހާ ބޭފުޅުން ވެސް ވައުދުވެވަޑައިގެންފައި ހުންނާނެ، ގިނަ ވައުދުތައް އަޅުގަނޑުމެން ފުއްދަން. ނުފުއްދޭ ވައުދުތައް ވެސް ހުރޭ. އަނެއްހެން ރައީސުލްޖުމްހޫރިއްޔާ ކަމުގައި ވިޔަސް، އަޅުގަނޑު ގަބޫލެއް ނުކުރަން ކުން ފަޔަކުން ގެ އުސޫލު ހިނގާ ކަމަކަށް.
– އަސްލަމް ވިދާޅުވިއެވެ.
އަސްލަމް މިފަދަ ގޮތަކަށް ވިދާޅުވިއިރު، ސަރުކާރުން ރައްޔިތުންނަށް ވެފައިވާ ވައުދުތައް ނުފުއްދޭތީ އެކަމުގެ އެންމެ ގިނަ ކަންބޮޑުވުން ފާޅު ކުރާ އެއްބަޔަކީ ވެރިކަން ކުރާ އެމްޑީޕީގެ ބައެއް މަޖިލިސް މެމްބަރުންނެވެ. ޚާއްސަކޮށް ރައީސް ރައީސް ނަޝީދަށް ތާއީދު ކުރާ މެމްބަރުން ދަނީ ސަރުކާރުން ވެފައިވާ ވައުދުތައް ނުފުއްދާތީ އެކަމުގެ ކަންބޮޑުވުން ފާޅު ކުރަމުންނެވެ.
މިއަދުގެ ޖަލްސާގައިވެސް އަސްލަމާއި އެންމެ ގިނައިން ކުރެވުނު ސުވާލަކީ ބޯހިޔާވަހިކަމުގެ ސުވާލެވެ. މީގެ ތެރޭގައި މާލޭގެ ރައްޔިތުންގެ ބޯހިޔާވަހިކަމުގެ މައްސަލަ ހައްލު ކުރުމަށް ކުރަމުންދާ މަސައްކަތާއި ގުޅޭގޮތުންވެސް ވަނީ ސުވާލު ކުރެވިފައެވެ.
