ރާއްޖޭގައި ލާމަރުކަޒީ ނިޒާމް އެންމެ ފުރިހަމަގޮތުގައި ހިންގުމާ ގުޅޭގޮތުން ބާއްވަމުންދާ ސެމިނާތަކުގެ ތިންވަނަ ސެމިނާ ހުކުރު ދުވަހު ފެށުމަށް ހަމަޖެހިއްޖެއެވެ. އއ.އުކުޅަހުގައި ބާއްވާ މިސެމިނާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބައިވެރިވެ ވަޑައިގަންނަވާނެއެވެ.
ލާމަރުކަޒީ ރާއްޖެ މި ޝިޔާރުގެ ދަށުން، "ފަނޯއްލަ ދަރުބާރު" މި ނަމުގައި ކުރިއަށްގެންދާ މި ސެމިނަރ ފެށުމަށް ހަމަޖެހިފައިވަނީ ހުކުރު ދުވަހުއެވެ. ތިން ދުވަހުގެ މުއްދަތަކަށް ކުރިއަށްދާ މިސެމިނާގައި، ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގައި ހުރި ގޮންޖެހުންތަކާއި، ޤާނޫނަށް އަހުލުވެރި ކުރުމުގެ ގިނަ މައުލޫމާތު ދެވިގެންދާނެއެވެ.
މި ސެމިނާގައި ވަޒީރުންނާއި ކަމާ ގުޅުންހުރި ތަޖުރިބާކާރުން މަޢުލޫމާތުދިނުމަށް ވަނީ ހަމަޖެހިފައެވެ. ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ޤާނޫނަށް ގެނައި އިސްލާހުތަކާއިއެކު ކައުންސިލްތަކަށް ބޮޑެތި ބާރުތަކެއް ވަނީ ލިބިދީފައެވެ. ނަމަވެސް ޤާނޫނުގެ ތެރެެއިން މިހާތަނަށް ދިމާވެފައިވާ އެންމެ ބޮޑު ގޮންޖެހުމަކީ ރަށްރަށުގެ ލޭންޑް ޔޫސް ޕްލޭން ހެދުމަށް ދިމާވެފައިވާ ދަތިތަކެވެ.
Laamarukazy siyaasathu vialres kurumuge mahaasintha 'Fanoalla Dharubaaru' ge 3 vana mahaasintha May 27 vana dhuvahu, mi authority aai @iriglobal adhi @usaid gulhigen, Aa. Ukulhahugai beyvvumah vany hamajehifai.#Fanoalladharubaaru#laamarukazukurun#baaruverirayyitheh pic.twitter.com/RRCXCOj1Qe
— Local Government Authority (@lgaMaldives) May 23, 2022
ރަށްރަށުގެ ތަރައްޤީގެ ކަންކަމާއިވެސް ގުޅިފައިވާ އެންމެ ބޮޑު އެއް ބަޔަކީ ލޭންޑް ޔޫސް ޕްލޭނަށްވާއިރު މިމަސައްކަތްްތައް މިހާރުވެސް ލަސްވެފައިވުމަކީ ރަށްރަށުގެ ކައުންސިލްތަކަށްވެސް އޮތް ބޮޑު ގޮންޖެހުމެކެވެ. ނަމަވެސް އެލްޖީއޭއިން މިހާރު މަސައްކަތް ކުރަމުންދަނީ މާލީ ބޭރުގެ އެކި ފަރާތްތަކުގެ މާލީ އެހީތެރިކަމާއިއެކުގައިވެސް މިމަސައްކަތް ވީހާވެސް އަވަހަކަށް ނިންމުމަށެވެ.
ލާމަރުކަޒީ އުސޫލުން އިދާރީ ދާއިރާތައް ހިންގުމަށް އޭރުގެ ސަރުކާރުން ޤާނޫނަށް ގެނައި ބަދަލުތަކާއި، ހިފެހެއްޓިފައިވާ އެންމެހައި ބާރުތައް ދޫކޮށްލުމަށް ޤާނޫނަށް ގެންނަންޖެހޭ މަޝްވަރާތައް ފެއްޓެވީ "ޖަޒީރާ ހޮޅުއަށި"ގެ ނަމުގައި ބޭއްވި ޚާއްސަ ފޯރަމުންނެވެ. ޤާނޫނަށް ހުށަހެޅުނު އިސްލާހުތަކާއިއެކު މަޖިލީހުގެ މެމްބަރުންގެ މަސައްކަތުން ބިލް މަޖިލީހުން ފާސްކޮށް ރައީސުލްޖުމްހޫރިއްޔާ މިބިލް ތަސްދީޤު ކުރެއްވީ 2020 ވަނަ އަހަރުގެ ޑިސެމްބަރު މަހުގެ 15 ދުވަހެއެވެ.
