ޗައިނާއިން ޓައިވާންއާއި ދެކޮޅަށް ބާރުގެ ބޭނުން ނުކުރާނެކަން ކަށަވަރު ކުރުމަށް، އެހެން ގައުމުތަކާއެކީ އެމެރިކާ ދެމިއޮންނާނޭ ކަމަށާއި، ޗައިނާއިން ޓައިވާނާއި ދެކޮޅަށް ހަތިޔާރުގެ ބޭނުން ކޮށްފިނަމ، ޓައިވާނުގެ ދިފާއުގައި އެމެރިކާއިން ބާރުގެ ބޭނުން ކުރާނޭކަމުގައި އެމެރިކާގެ ރައީސް ޖޯ ބައިޑްން ވިދާޅު ވެއްޖެއެވެ.
ޖަޕާނަށް މިހާރު ކުރައްވަމުން ގެންދަވާ ދަތުރުފުޅުގައި، ޖަޕާނުގެ ބޮޑުވަޒީރު ކިޝިޑާއާއިއެކު ބޭއްވެވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ޓައިވާންގެ ދިފާއުގައި ބާރުގެ ބޭނުން ކުރައްވާނެކަމަށް ބައިޑްން ވިދާޅުވި ވިދާޅުވުން ފާހަގަވެގެން ގޮސްފައިވަނީ، ޓައިވާނަށް ޗައިނާއިން ހަމަލާ ދީފި ހާލަތެއްގައި ބާރުގެ ބޭނުންކުރާނޭކަމަށް ސާފުކޮށް ހާމަނުކޮށް، އެމެރިކާއިން އެތައް ޒަމާނެއް ވަންދެން ދަމަހައްޓަމުން އައި ސިޔާސަތައް އައި ބޮޑު ބަދަލެއްގެ ގޮތުގައެވެ.
މި ނޫސްވެރިންގެ ބައްދަލުވުމުގައި ބައިޑްންވަނީ ޓައިވާންއާއި، ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި އެއްފަދަ ކޮށްފައެވެ. ނަތީޖާއެއްގެ ގޮތުން ޗައިނާއިންވަނީ ބައިޑްންގެ މިވާހަކަތަކާއިމެދު ރުޅިވެރިކަން ފާޅު ކޮށްފައެވެ.
ބައިޑްގެ މި ދަތުރުފުޅަކީ، އެމެރިކާގެ ރައީސްގެ ހައިސިއްޔަތުން އޭނާ އޭޝިއާއަށް ކުރައްވަމުން ގެންދަވާ ފުރަތަމަ ދަތުރުފުޅެވެ.
ބައިޑްންގެ މި ވާހަކަފުޅުތަކަށްފަހުވެސް އޭނާ ވިދާޅުވެފައިވަނީ، ޓައިވާންއާއި ގުޅޭގޮތުން އެމެރިކާގެ ސިޔާސަތަށް ބަދަލެއް ނާންނަކަމުގައެވެ. އެހެންނަމަވެސް، އަސްކަރީ އެހީތެރިކަން ފޯރުކޮށްދީގެން ޓައިވާން ދިފާއު ކޮށޭދޭނެކަމަށް ވިދާޅުވެ ޖަޕާންގައި ބައިޑްން ދެއްކެވި ވާހަކަފުޅަކީ މިމޭރުމުން އޭނާ ފަހަަކަށް އައިސް ވާހަކަ ދެއްކެވި ދެވަނަ ފަހަރެވެ.
ޗައިނާއިން ޓައިވާނަށް އަސްކަރީ ހަމަލާ ދީފި ހާލަތެއްގައި ޓައިވާންގެ ދިފާޢުގައި ބާރުގެ ބޭނުންކުރާނެކަން އެމެރިކާއިން ފާއިތުވެދިޔަ ތަނުގައި ސާފުބަހުން ބުނެފައެއް ނުވެއެވެ.
ޗައިނާއިން ދެކެމުންދަނީ ޓައިވާންއަކީ ވަކިވެގަނެގެން އުޅޭ އެގައުމުގެ ސަރަހައްދެއްގެ ގޮތުގައެވެ.
ޓައިވާންއާއި ޗައިނާއާއި ވަކިވެފައިވަނީ ޗައިނާގެ އަހުލީ ހަގުރާމާގައި 1948ވަނަ އަހަރުއެވެ. އެހެންނަަމަވެސް އެއަށްފަހު، ޓައިވާނަކީ އަލުން އެގައުމުގެ ބަޔަކަށް ހެދުމަށް ބާރުގެ ބޭނުން ކުރަންޖެހިއްޖެ ހާލަތެއްގައި ބާރުގެ ބޭނުން ކުރާނެކަމުގެ އިންޒާރު އަބަދުވެސް ޗައިނާއިން އަންނަނީ ދެމުންނެވެ.
އަދި ޓައިވާނުން ބައިނަލްއަގުވާމީ އެއްވެސް ކަމެއްގައި ބައިވެރިވުން ޗައިނާއިން އަބަދުވެސް އަންނަނީ ދެކޮޅު ހަދަމުންނެވެ.
