ޝަރުޢީ ދާއިރާއާއި ކޯޓުތަކު ޚަބަރުތައް ކަވަރކުރާ ނޫސްވެރިންނަށް އަމާޒުކޮށް ޚާއްސަ މަސައްކަތު ބައްދަލުވުމެއް މޯލްޑިވްސް މީޑިއާ ކައުންސިލުން ފަށައިފިއެވެ.
އިސްކަންދަރު ކޮށީގައި އެއްދުވަހުގެ މުއްދަތަށް ހިންގާ މި މަސައްކަތު ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން މީޑިއާ ކައުންސިލުގެ ރައީސް، ޞަހުބާން ފަހުމީ ވިދާޅުވީ، ރާއްޖޭގައި ކޯޓުތަކާއި ޝަރުޢީ ދާއިރާގެ ކަންކަން ކަވަރކުރުމުގައި ހަރަކާތްތެރިވާ ނޫސްވެރިން މަދުކަމަށެވެ. އަދި ނޫސްވެރިކަމުގެ ދާއިރާގައި މިހާރު ގިނައީ ވަރަށް ޒުވާން ނޫސްވެރިންކަމަށާއި، އެހެންކަމުން ޝަރުޢީ ދާއިރާއަށް ނޫސްވެރިން ތަމްރީންކޮށް، ޚަބަރާއި މަޢުލޫމާތު ގެނެސްދިނުމުގައި ޤާނޫނީ އޮނިގަނޑުގެ ތެރެއިން ނޫސްވެރިން މަސައްކަތްކުރުމަށް ބާރުއެޅުމަކީ މުހިއްމުކަމެއްކަން އޭނާ ފާހަގަކުރެއްވިއެވެ.
ޞަހުބާން ވިދާޅުވީ، ޝަރުޢީ ދާއިރާއާއި ކޯޓުތަކުގެ ދާއިރާގެ އިތުރުންވެސް އެކި ދާއިރާތަކުން ނޫސްވެރިން ތަމްރީންކުރުމަށް ކައުންސިލުން މަސައްކަތްކުރަމުންދާކަމަށެވެ. އެގޮތުން ރާއްޖެއާއި ރާއްޖޭން ބޭރުން ނޫސްވެރިން ތަމްރީންވުމުގެ ފުރުޞަތުތައް ފަހިކޮށްދިނުމަށް މަސައްކަތް ކުރަމުންދާކަމަށް ޞަހުބާން ވިދާޅުވިއެވެ.
ކޯޓް ރިޕޯޓިންގ ވޯކްޝޮޕުގައި ކޯޓުގައި ހިނގާ މައްސަލަތައް ކުރިއަށްދާގޮތާއި، މަރުޙަލާތަކާއި، އަޑުއެހުންތަކަށް ހާޟިރުވެ ރިޕޯޓްކުރުމުގައި މީޑިއާތަކާއި ނޫސްވެރިން ސަމާލުކަންދޭންވީ ކަންތައްތަކާއި، ކޯޓުތަކުގައި ވަކާލާތުކުރާ ފަރާތާއި، ޤާނޫނީ ވަކީލުންނާއި މީޑިއާއާއެކު ބާއްވަންޖެހޭ ގުޅުމާބެހޭ މަޢުލޫމާތު ދޭނެކަމަށް މީޑިއާ ކައުންސިލުން ބުންޏެވެ.
މި މަސައްކަތު ބައްދަލުވުން ކުރިއަށްގެންދިއުމުގެ މަޤްޞަދަކީ ނޫސްވެރިންނަށް ސުލޫކީ މިންގަނޑު ހިފެހެއްޓުމަށް ބާރުއެޅުމާއި، ޤާނޫނީ މަރުޙަލާތައް ކިޔުންތެރިންނަށް ސާފުކޮށްދިނުމުގެ ހުނަރުތައް ދަސްކޮށްދިނުންކަމަށެވެ. އަދި ތަޙުޤީޤު މަރުހަލާގައި ރިޕޯޓްކުރުމުގައި ގެންގުޅެންޖެހޭ މައިގަނޑު އަސާސްތައް ދަސްކޮށްދިނުމާއި، ޖިނާޢީ މައްސަލަތަކުގެ ޚަބަރާއި މަޢުލޫމާތު ޝާޢިޢުކުރުމުގައި ސަމާލުކަންދޭންވީ ކަންކަން ދެނެގަތުމެވެ.
މި މަސައްކަތު ބައްދަލުވުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، ޖުޑީޝަލް ސަރވިސް ކޮމިޝަނާއި، ޕްރޮސެކިއުޓަރ ޖެނެރަލްގެ އޮފީހާއި، ބާ ކައުންސިލް އޮފް މޯލްޑިވްސްގެ ފަރާތުން ސެޝަންތައް ނަގައިދިނުމަށް ހަމަޖެހިފައިވެއެވެ. އަދި މޯލްޑިވްސް ޕޮލިސް ސަރވިސްގެ ފަރާތުން ސެޝަނެއް ނަގައިދިނުމަށް ހަމަޖެހިފައިވާއިރު، ޝަރުޢީ ދާއިރާގެ ޚަބަރުތައް ކަވަރކުރުމުގެ ތަޖުރިބާ ލިބިފައިވާ ނޫސްވެރިއެއްވެސް މި ވޯކްޝޮޕުގައި ސެޝަން ނަގައިދޭނެކަމަށް އެމްއެމްސީން ބުންޏެވެ.
