70ގެ އަހަރުތަކުގައި ބޮލީވުޑްގައި ރަސްކަންކުރި ފިލްމު "އާނަންދު" ގެ ރީމޭކެއް ހަދަން ތައްޔާރުވެއްޖެއެވެ.
1971 ވަނަ އަހަރުގެ ހިޓް ފިލްމް "އާނަންދު"ގެ ލީޑުން ފެނިގެންދިޔައީ ބޮލީވުޑްގެ ދެ ސުޕަރ ސްޓާރުންކަމަށްވާ ރާޖޭޝް ކަންނާއާ އަމީތާބު ބައްޗަންގެ އިތުރުން ސުމިތާ ސަންޔަލްއެވެ.
މި ފިލްމުގައި ރާޖޭޝް ކަންނާއާ އެކު އަމިތާބު ފެނިގެންދިޔައިރު އެދުވަސްވަރަކީ އަމީތާބު ބޮލީވުޑުގައި ފައިތިލަ ސާބިތުކުރުމަށް މަސައްކަތް ފަށައި ފިލްމުތަކުގެ ލީޑުން ފެންނަން ފެށި ދުވަސްވަރެވެ.
ފިލްމް "އާނަންދު" ރީމޭކް އުފެއްދުމުގެ މަސައްކަތް އިއުލާންކޮށްފައިވަނީ އޮރިޖިނަލް ފިލްމުގެ ޕްރޮޑިއުސަރ އެންސީ ސީއްޕީގެ ކާފަ ދަރިއެއްކަމަށްވާ ސަމީރް ރާޖް ސިއްޕީ އާއި ވިކްރަމް ކައްކަރު ގުޅިގެންނެވެ. ޕްރޮޖެކްޓް މިހާރު ސްކްރިޕްޓިންގެ ސްޓޭޖްގައި އޮތްއިރު ފިލްމު ޑައިރެކްޓް ކުރާނެ ފަރާތެއް އަދި މިހާތަނަށް ކަނޑައަޅާފައެއް ނުވެއެވެ. ނަމަވެސް ފުރަތަމަ ފިލްމުވެސް ޑައިރެކްޓްކުރި ހިރިޝިކޭޝް މުކަރުޖީގެ ބައިވެރިވުން ރިމޭކްގައިވެސް އޮންނާނެ ކަމަށް ބެލެވެއެވެ.
ފިލްމު އިއުލާން ކުރުމާއެކު ގިނަ ބަޔަކުގެންދަނީ މިކަމާ ޝުޢޫރު ފާޅުކުރަމުންނެވެ. އެގޮތުން ގިނަ މީހުން ވަނީ މިކަމާ ދެކޮޅަށް ވާހަކަ ދައްކާފައެވެ. އަދި އެފަދަ ލެޖެންޑަރީ މަސައްކަތަކަށް ހުތުރުއަރުވަން މަސައްކަތް ނުކުރުމަށް ގިނަބަޔަކު ގެންދަނީ ބުނަމުންނެވެ. މީގެ އިތުރުން ފިލްމުގެ ލީޑަށް ބައެއް ތަރިންގެ ނަންތައްވެސް ބައެއް މީހުން ވަނީ ސޯޝަލް މީޑިއާގައި ހުށަހަޅާފައެވެ.
ގިނަ އެވޯޑްތަކެއް އުފުލާލާފައިވާ "އާނަންދު" ޑައިރެކްޓަރ ހިރިޝިކޭޝް މި ފިލްމު ޝޫޓްކޮށް ނިންމާފައިވަނީ އެންމެ 28 ދުވަހުގެ ތެރޭގައެވެ. ގްލުޒާރުގެ ސްކްރީން ޕްލޭއަކަށް ހަދާފައިވާ މި ފިލްމުގެ ބައެއް ޑައިލޮގްތަކާއި ބައެއް ލަވަތައްވެސް ހަދައިދީފައިވަނީ ގުލްޒާރެވެ. ފިލްމުގެ ލަވަތަކުގެ ތެރެއިން "ކަހީ ދޫރް ޖަން ދިން ޑަލް ޖާއޭ" އަކީ ވަރަށް މަޝްހޫރުވެގެންދިޔަ ލަވައެކެވެ.
