ފާއިތުވެދިޔަ މަހު ވެއްޓުނު ޗައިނާ އީސްޓާންގެ ފްލައިޓްގެ ބްލެކް ބޮކްސްގެ ޑާޓާތަކުން ދައްކާ ގޮތުގައި ބޯޓުގެ ކޮކްޕިޓްގެ ތެރޭގައި ހުރި މީހަކު އެބޯޓު ގަސްތުގައި ވައްޓާލާފައިވާކަމަށް ބެލެވޭކަމުގައި އެންމެ ފުރަތަމަ ކުރެވިފައިވާ ތަހުގީގުތަކާއި ހަވާލާދީ ދަ ވޯލް ސްޓްރީޓް ޖާރނަލްއިން ރިޕޯޓު ކޮށްފިއެވެ.
29،000 ފޫޓު މަތިން، ޗައިނާގެ ކުންމިންގ އިން ގުއާންޒޯއަށް ދަތުރުކުރަމުން ދަނިކޮށް ވެއްޓުނު ބޮއިންގ 800-737 މަރުކާގެ މި ބޯޓު ވެއްޓުމުގެ ހާދިސާގައި 132 ޕެސެންޖަރުންނާއި ބޯޓުގެ ހުރިހާ ކުރޫންވަނީ މަރުވެފައެވެ. އަދި މިއީ ފާއިތުވެދިޔަ އަހަރުތަކުގައި ޗައިނާގައި ހިގާފައިވާ އެންމެ ހިތާމަވެރި މިފަދަ ހާދިސާއެވެ.
ތަހުގީގުކުރާ ފަރާތްތަކާއި ހަވާލާދީ ޖާރނަލްއިން ރިޕޯޓު ކޮށްފައިވާ ގޮތުގައި، ގެއްލުން ލިބިގައިވާ، ފްލައިޓް ޑާޓާ ރެކޯޑަރުން ދައްކާ ގޮތުގައި ފްލައިޓްގެ ކޮންޓްރޯލްއަށް ކޮންމެވެސް މީހަކު ފޮނުވާފައިވާ އޯޑަރުތަކުގެ ސަބަބުން ފަލައިޓްގެ މިސްރާބު މިބާއި ދިމާލަށް ސީދާ ކޮށްފައިވެއެވެ.
"ފްލައިޓްއިން އަމަލު ކޮށްފައިވަނީ، ކޮކްޕިޓްތެރޭގައި ހުރި މީހަކު އަމަލު ކުރުމަށް ފްލައިޓަށް އަންގާފައިވާ ގޮތަށް،" ފުރަތަމަ ކުރިޔަށް ގެންދެވުނު ތަހުގީގުތަކުގައި ހަރަކާތްތެރި ވެފައިވާ، އެމެރިކާގެ ބައެއް އޮފިޝަލުންނާއި ހަވާލާދީ ޖާރނަލްއިން ރިޕޯޓު ކޮށްފައި ވެއެވެ.
ބޯޓު ވެއްޓުނު ސަރައްދުން ފެނުނު ފްލައިޓް ޑާޓާ ރެކޯރޑަރާއި ކޮކްޕިޓްގެ ވޮއިސް ރެކޯޑަރ ބޯޓު ވެއްޓުނު ސަރަހައްދުން ހޯދާ، ތަހުލީލު ކުުރުމަށްޓަކާ އެމެރިކާގެ ވޮޝިންޓަންގ ޑީސީގައި ހުންނަ ޔޫއެސް ނެޝަނަލް ޓްރާންސްޕޯޓު ސޭފްޓީ ބޯޑު (NTSB)އަށް ފޮނުވިފައި ވާކަމަށްވެސް ޗައިނާގެ ސްޓޭޓް މީޑިއާއިން ކުރިން ބުނެފައި ވެއެވެ.
ޖާރނަލްއިން ރިޕޯޓު ކޮށްފައިވާ ގޮތުގައި ތަހުގީގު ޓީމުގައި ހިމެނޭ އެމެރިކާގެ އޮފިޝަލުން ބަލަމުންދަނީ، ބޯޓު ވެއްޓުމުގެ ހާދިސާގައި ހިމެނިގެން ގޮސްފަައިވާ ޕައިލެޓްގެ ދައުރަކީ ކޮބައިތޯ ބެލުމަށެވެ. އަދި ތަހުގީގު ކުރާ ފަރާތްތަކާއި ހަވާލާދީ ޖާރނަލްއިން ރިޕޯޓު ކޮށްފައިވާ ގޮތުގައި، ކޮންމެވެސް މީހަކު ގަދަކަމުން ކޮކްޕިޓްތެރެއަށް ވަދެގަނެ، ބޯޓު ވައްޓާލުމަކީވެސް އެކަށީގެންވާ ކަމެކެވެ.
ވެއްޓުނު މި ބޯޓުގައި މެކޭނިލަން ނުވަތަ ޓެކްނިކަލް އެއްވެސް މައްސަލައެއް ހުރިކަމެއް ޗައިނާގެ އިންވެސްޓިގޭޝަން ޓީމުން މިހާތަނަށް ހާމަކޮށްފައެއް ނުވެއެވެ. ޗައިނާ އީސްޓަންގެ ފަރާތުން ޖާރނަލްއަށް ފޮނުވާފައިވާ ސްޓޭޓްމަންޓުގައި ބުނެފައިވަނީ، އެއަރކްރަފްޓްގައި އެއްވެސް މައްސަލައެއް ހުރިކަމުގެ އެއްވެސް ހެއްކެއް މިހާތަނަށް ފެނިފައި ނުވާކަމުގައެވެ. އަދި އެއަރލައިނުން ޖާރނަލްއަށް ބުނެފައިވަނީ، ބޯޓު ދުއްވަމުންދިޔަ ޕައިލެޓުންގެ ސިއްޙީ އަދި އާއިލީ މައްސަލައެއްވެސް ހުރިކަމަށް ފާހަގަ ކުރެވިފައި ނުވާކަމަށާއި، އަދި އެމީހުންގެ މާލީ ހާލަތުވެސް ހުރީ ރަގަޅަށް ކަމުގައެވެ.
"ރަސްމީ ނޫންގޮތަށް ހީކޮށް ދައްކާ ހުރިހާ ވާހަކައަކީވެސް މި އެކްސިޑެންޓުގެ ތަހުގީގަށް އަސަރު ކޮށްފާނެ ކަންކަން، އަދި ތަހުގީގަށް ލިބިގެންދާނެ ކުރިއެރުމަށްވެސް ހުރަސްއެޅި، އަދި މުޅި އޭވިއޭޝަން އިންޑަސްޓްރީއަށް ނޭދެވޭ އަސަރު ކުރުމަކީ އެކަށިގެންވާ ކަމެއް،" އެއަރލައިން ބުނެފައި ވެއެވެ.
