އެޑިއުކޭޝަން މިނިސްޓަރ ޑރ.އައިޝަތު ޢަލީ ޤާނޫނު އަސާސީއާއި ޚިލާފުވެއްޖެކަމަށް ކަނޑައަޅައިދިނުމަށް މަންދުކޮލެޖުގެ ޗެއަރމަން އިބްރާހީމް އިސްމާޢީލް (އިބުރާ) ހުށައެޅި މައްސަލާގައި މިއަދަށް ތައާވަލުކުރި އަޑުއެހުން ކެންސަލްވެއްޖެއެވެ. މާލޭހައި ޕްރައިވެޓް ލިމިޓެޑުން އެޑިއުކޭޝަން މިނިސްޓަރ ޑރ.އާއިޝަތު އަލީއަށް ދައުވާ ކުރީ މަންދު ކޮލެޖަށް ބަދަލުގެ ގޮތުގައި ދައުލަތުން ދައްކަން ޖެހޭ 15 މިލިއަން ރުފިޔާ ދިނުމަށް ސިވިލް ކޯޓުން އެންގި މުއްދަތު ފަހަނައަޅާ ދިއުމަށްފަހު އެ ފައިސާ ދިން މައްސަލަގައެވެ.
މިއަދު 10 ޖަހާއިރަށް ތައާވަލުކުރި ޝަރީޢަތުގެ އިބްތިތާޢީ އަޑުއެހުން ކެންސަލްވީ މިނިސްޓަރަށް ޗިޓު ރައްދު ނުވެގެންކަމަށް ސިވިލް ކޯޓުން ބުންޏެވެ. އަދި މި މައްސަލަ އަލުން ތައާވަލުކުރަނީ ކޮން އިރަކަށްކަމެއް ނުބުނެއެވެ.
މަންދު ކޮލެޖް ހިންގުމަށް ކުރީގެ އެމްއީއެސް އިމާރާތް ދޫކޮށްފައިވަނިކޮށް 2015 ވަނަ އަހަރު ސަރުކާރުން ވަނީ އެ އެއްބަސްވުން ބާތިލުކޮށް އެ ތަން އަތުލާފައެވެ. ސަރުކާރުން އެއްބަސްވުން ބާތިލުކުރީ އެއްބަސްވުމާއި އެއްގޮތަށް އެތަނުގައި އިންޓަރނޭޝަނަލް ސްކޫލެއް ހިންގަމުން ނާންނަކަމަށް ބުނެއެވެ. އެއްބަސްވުން ބާތިލުކުރުމުން މާލޭހައި ޕްރައިވެޓް ލިމިޓެޑުން އެ މައްސަލަ ސިވިލްކޯޓަށް ހުށައެޅިއެވެ. އެކޯޓުން ނިންމާފައިވަނީ ދައުލަތުން އެއްބަސްވުން ބާތިލުކުރީ ގޯސްކޮށްކަމަށެވެ. ދަށުކޯޓްގެ މި ނިންމުމަށް ހައިކޯޓުންވެސް ވަނީ ތާއިދުކޮށްފައެވެ.
ދެ ކޯޓުންވެސް މައްސަލަ ނިންމާފައިވަނީ ލިބުނު ގެއްލުމުގެ ބަދަލު ހޯދުމަށް ވަކި ދައުވާކުރެވޭނެކަމަށް ނިންމުމަށްފަހުއެވެ. އެއްބަސްވުމާއި ހިލާފަށް ތަން އަތުލުމުން އިތުރު ތަނެއް ހޯދާ ކުރަންޖެހުނު ހަރަދުގެ ގޮތުގައި މާލޭހައި ޕްރައިވެޓް ލިމިޓެޑުން ވަނީ ބަދަލެއްގެ ގޮތުގައި 18,012,500ރ. (އަށާރަ މިލިއަން ބާރަހާސް ފަސްސަތޭކަ ރުފިޔާ) ހޯދަން ދައުވާކޮށްފައެވެ. އެ މައްސަލައިގައި މިމަހުގެ 19 ވަނަ ދުވަހު ސިވިލްކޯޓުގެ ޑިސްޕިއުޓް ރިޒޮލިއުޝަން ޑިވިޝަނުން ނިންމި ނިންމުގައިވަނީ މަންދު ކޮލެޖް، އެ ޢިމާރާތުން ބޭރުކޮށްލުމުގެ ސަބަބުން، ވަގުތުން ވަގުތަށް ކޮލެޖްގެ ކިޔެވުން ކުރިއަށް ގެންދިއުމަށް ތަނެއް ހޯދާ، ތަން ހިންގުމުގެ އާލާތް ހޯދައި، ކުލިދައްކައި ހެދުމަށް މިއަހަރުގެ މާރިޗު މަހުގެ ނިޔަލަށް ސީދާ ލިބިފައިވާ ގެއްލުމުގެ ބަދަލެއްގެ ގޮތުގައި 15,012,500ރ. (ފަނަރަ މިލިއަން ބާރަހާސް ފަސްސަތޭކަ ރުފިޔާ) ދެއްކުމަށް އެޑިއުކޭޝަން މިނިސްޓްރީން އެއްބަސްވެފައިވާކަމަށެވެ.
މިއާއެކު ދެފަރާތުގެ ދެމެދުގައި އެއްބަސްވި ގޮތުގެ މަތިން މާލޭހައި ޕްރައިވެޓް ލިމިޓެޑަށް -/15,012,500ރ. (ފަނަރަ މިލިއަން ބާރަހާސް ފަސްސަތޭކަ ރުފިޔާ) ދައުލަތުން އެއް މަސްދުވަހުގެ ތެރޭގައި ސިވިލް ކޯޓަށް ދައްކައި ޚަލާޞް ކުރުމަށް ކޯޓުން ހުކުމް ކޮށްފައިވެއެވެ.
