މޯލްޑިވްސް މީޑިއާ ކައުންސިލް އެމްއެމްސީގެ ރައީސް ޝަހުބާން ފަހުމީއަށް ވެސް މަނީ ލޯންޑަރިންގެ ތުހުމަތު ކޮށްފިއެވެ.
ޝަހުބާނަކީ ފުލުހުން މަނީ ލޯންޑަރިންގެ ތުހުމަތު ކޮށްފައިވާ އަލްހާން ފަހުމީގެ ކޮއްކޮއެވެ.
ޝަހުބާންގެ މައްޗަށް މަނީ ލޯންޑަރ ކުރި ކަމުގެ ތުހުމަތު ކޮށްފައި އަލްހާނާއި އާއިލާގެ ހިއްސާ އޮންނަ "ކިންގްސް ކެޕިޓަލް ހޯލްޑިންގްސް" އިން ފޮރެކްސް ޓްރޭޑު ކުރަމުން އަންނަ މައްސަލައިގައެވެ.
މި މައްސަލައިގެ ތަހުގީގަށް ބަޔާން ނެގުމަށް ބުދަ ދުވަހު ޝަހުބާން ފުލުހަށް ހާޒިރު ވުމަށް އޭނާއަށް ވަނީ ޗިޓު ފޮނުވާފައެވެ. އަދި އަލްހާނަށް ވެސް މި ތުހުމަތުކޮށްފައި ވާއިރު، އަލްހާން ފުލުހަށް ހާޒިރުވާން އަންގާފައި ވަނީ އަންގާރަ ދުވަހުއެވެ.
ފުލުހަށް ހާޒިރުވުމަށް އަންގައި ފޮނުވާފައިވާ ޗިޓުގައި ބުނެފައިވަނީ ރާއްޖޭގެ މާލީ ސެކިއުރިޓީގެ ގާނޫނާއި ގަވައިދުތަކާ ހިލާފަށް އިންވެސްޓްމަންޓް ސްކީމެއް ތައާރަފްކޮށް މަކަރާއި ހީލަތުން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާކޮށްފައިވާ ކަމުގެ ތުހުމަތު އެ ކުންފުނީގެ މައްޗަށް ކުރެވޭ ކަމަށެވެ.
ކިންގްސް ކުންފުނިން ކުރަމުން ދިޔަ ވިޔަފާރިއަކީ އިންވެސްޓްމަންޓް ސްކީމެއްގެ ސިފަތައް ހުރި ވިޔަފާރިއަކަށްވެފައި އަޑިނޭނގޭ ޕޮންޒީ ސްކީމެއްގެ ގޮތުގައި އެ ސްކީމް ހިންގަމުން ދިއުމާ ގުޅިގެން ރާއްޖޭގެ ބޭންކިން ނިޒާމުގެ ތެރެއިން އެ ވިޔަފާރި ހުއްޓުވައި، އެ މައްސަލަ ފުލުހުންނާއި ކަމާގުޅޭ އިދާރާތަކުން ދަނީ ތަހުގީގު ކުރަމުންނެވެ.
