ވެރިކަން ކުރާ މައި ޕާޓީ އެމްޑީޕީގެ ޗެއަރ ޕަރސަން ހޮވުމަށް ބޭއްވި އިންތިޚާބު ގިނަބަޔަކު ސިފަކުރީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ކުރިމަތިލުމެއްގެ ގޮތުގައެވެ. އެގޮތުން އެމްޑީޕީގެ މެމްބަރުންގެ ތެރޭގައި އެންމެ ތަޢީދު ބޮޑު ލީޑަރަކީ ކޮބައިކަމާމެދު ކުރެވޭ ސުވާލުގެ ޖަވާބު މި އިންތިޚާބުގެ ނަތީޖާއިން އެނގިގެންދާނެ ކަމަށް ގިނަބަޔަކު ދިޔައީ ބުނަމުންނެވެ.

ޕާޓީގެ އާ ޗެއާޕާސަން ކަމުގެ މަގާމަށް ވާދަކުރެއްވީ އިކޮނޮމިކް މިނިސްޓަރު ފައްޔާޒު އިސްމާއިލާއި މަޖިލިސް މެންބަރު އިމްތިޔާޒު ފަހުމީ އެވެ. މީގެ ތެރޭން ފައްޔާޒަށް ރައީސް އިބްރާހިމް މުޙައްމަދު ސޯލިހުގެ ތާއިދު އޮތްއިރު, އިމްތިޔާޒު ނުކުމެވަޑައިގަތީ ޕާޓީގެ ރައީސް, ރައީސް މުހައްމަދު ނަޝީދުގެ ތާއިދާއެކުގައެވެ.

ފާއިތުވެދިޔަ، ދެ މަހެއްހާ ދުވަހުގެ ތެރޭގައި ކުރެވިގެންދިޔަ ކެމްޕޭނުން އެއް ފެކްޝަނުން އަނެއް ފެކްޝަނަށް ކުރި ތުހުމަތުތަކާއި، ދިން ބަހުގެ ހަމަލާތަކާއި، އަދި އޭގެ އިތުރުން، ކެމްޕޭންގެ ވާދަވެރިކަން އޮތް ގޮތަށް ބަލާއިރު، މި އިންތިޚާބުގެ ވާދަވެރިކަން ކެމްޕޭންތަކުގެ އާންމު ހަމަތަކާއި އުސޫލުތައް ފަހަނައަޅާ ޒާތީ ވެގެން ގޮސްފައިވާ މަންޒަރުވެސް ވަރަށްވެސް ރަގަޅަށް ވަނީ ތަމްސީލުވެގެން ގޮސްފައެވެ.

އަދި އޭގެ އިތުރުން، މި އިންތިޚާބު ފާހަގަވެގެން ދިޔައީ، އެމްޑީޕީ ބައިބައިވެފަ އޮތް އޮތުން އެތައް ގުނައަކަށް އިތުރުކޮށްދީ، އެޕާޓީގެ އެތެރޭގައި އުފެދިގެން ގޮސްފައިވާ ދެފެކްޝަންގެ ދުރުކަން އިތުރަށް ފުޅާ ކޮށްދިން އިންތިޚާބަކަށްވެސް މެއެވެ. މީގެތެރޭގައި، ޕާޓީގެ ޕާލަމެންޓްރީ ގުރޫޕްގެ މެމްބަރުންގެ ތެރޭގައި އޮތް ވާދަވެރިކަން ބޮޑުވެ، އެއްބަޔަކު އަނެއް ބައެއްގެ ބޮލުގައި ރާލާއި ބަނގުރާ ބޯކަމުގެ ތުހުމަތުތަކާއި، ޒިނޭގެ ތުހުމަތަށް ދަންދެން އަޅުވަމުން ދިޔަތަންވެސް ވަނީ ފެނިގެން ގޮސްފައެވެ.

ފައްޔާޒު އިންތިޚާބު ކާމިޔާބު ކުރެއްވީ ބޮޑު ތަފާތަކުން

ވެރިކަން ކުރާ މައި ޕާޓީ އެމްޑީޕީގެ ޗެއަރ ޕަރސަން ހޮވުމަށް ބޭއްވި އެޕާޓީގެ އެތެރޭގެ އިންތިހާބު އިކޮނޮމިކް މިނިސްޓަރު ފައްޔާޒު އިސްމާއިލް ކާމިޔާބު ކުރައްވާފައި ވަނީ ބޮޑު ތަފާތަކުންނެވެ. އެގޮތުން ވަގުތީ ނަތީޖާތައް ދައްކާގޮތުން ފައްޔާޒުވަނީ 28000 އަށްވުރެ ގިނަ ވޯޓު ހޯއްދަވާފައެވެ. މިއީ ވޯޓުލީ މެމްބަރުންގެ 58 އިންސައްތައެވެ. އިންތިއަށް ލިބިވަޑައިގެންނެވީ ގާތްގަނޑަކަށް 20800 ވޯޓެވެ. އެއީ ވޯޓުލީ މެމްބަރުންގެ 42 އިންސައްތައެވެ. މި އިންތިޚާބުގައި ޖުމްލަ 94،211 މެމްބަރުންނަށް ވޯޓު ލުމުގެ ޝަރުތު ހަމަވާކަމަށް އެޕާޓިން ވަނީ ބުނެފައެވެ. އިންތިހާބުގައި ވޯޓުލުމަށް ޖުމުލަ 272 ވޯޓު ފޮށި ބަހައްޓާފައިވެއެވެ.

އިންތިޚާބުގެ ނަތީޖާ ނުކުމެގެން މިދިޔަ ގޮތުން ސާފުވި އެންމެ ބޮޑު އެއް ކަމަކީ ރާއްޖޭގެ އެކި ކަންކޮޅުތަކުގައި ރައީސް ނަޝީދަށް އޮތް ތާޢީދު ފަނޑުވެގެން ދިޔަކަން ކަމަށް ސިޔާސީ މަޝްރަހު ދިރާސާކުރާ ފަރާތްތަކުން ގެންދަނީ ބުނަމުންނެވެ.

އެގޮތުން ކުރިން ބެލެވިފައި އޮތީ އަތޮޅުތެރޭގެ ރަށްރަށުން ސަރުކާރު ނުވަތަ ރައީސް ޞާލިޙްގެ ފެކްޝަނަށް ކާމިޔާބު ހޯދުނު ނަމަވެސް މާލެއާއި، ގިނަ ބޮޑެތި ސިޓީތަކާއި ރަށްރަށުން ރައީސް ނަޝީދުގެ ފެކްޝަނަށް ބޮޑު ކުރިއެރުމެއް ލިބޭނޭ ކަމަށެވެ. ނަމަވެސް މި ހީތަކާއި ޚިލާފަށް މާލޭގެ ބައެއް ފޮށިތަކުންވެސް ފައްޔާޒު ވަނީ ކުރި ހޯއްދަވާފައެވެ. މާލޭގެ ފޮށިތަކުގެ ތެރެއިން އިމްތިޔާޒު ފަހުމީއަށް ކުރި ލިބިގެންދިޔަ ފޮށިތަކުންވެސް، ދެއްކުނު ތަފާތު އާދަޔާ ޚިލާފަށް ކުޑަކަން މިފުރުސަތުގައި ފާހަގަ ކޮށްލާން ޖެހެއެވެ. އަދި މީގެ އިތުރުން، ބޮޑެތި އެހެން އާބާދީތަކުންވެސް ފައްޔާޒު ވަނީ ބޮޑު ކާމިޔާބެއް ހޯއްދަވާފައެވެ.

ވޯޓީ މުލި ދުވަހުވެސް އިންތިހާއަށް ބޮޑު ޕްރެޝަރަކަށް ވެޓިފައިވާ ކަމަށް ތަމްސީލުވެގެން ދިޔަ، އިންތިގެ ކެމްޕޭން ޓީމުގެ އިސް މެމްބަރުން ގެންދެވީ، އިއްތިޚާބުގެ ވޯޓުލުން ކުރިއަށް ދިޔަ ވަގުތުތަކާއި ވޯޓުލުން ނިމުމާއި ގާތްވުމާއެކުވެސް އެކިއެކި ޝަކުވާތައް ފެންމަތިކޮށް ކަންބޮޑުވުން ފާޅުކުރިތަނެވެ. އެގޮތުން ވޯޓުލުން ނިމުމާއި ގާތްވެފައި ވަނިކޮށް އިންތިގެ ފަރާތުން ވަނީ ގިނަ ޝަކުވާތަކެއް ހުށަހަޅާފައެވެ.

އެހެންނަަމަވެސް، އިންތިޚާބު ނިމި، ވޯޓު ގުނާ، ނަތީ އިއުލާން ކުރެވިގެން ދިޔައިރު، އިންތިޚާބު އޮޅުވާލައިގެން، ނުވަތަ ވޯޓަށް މަކަރު ހަދައިގެން އިންތިޚާބު ކާމިޔާބު ކުރެވޭ ވަރަށްވުރެ، ފައްޔާޒަށް ލިބިގެންދިޔަ ވޯޓުގެ އަދަދު ފެނިގެން ދިޔައީ އެތައް ގުނައެއް މަތިކޮށެވެ. ގިނަ ބަޔަކަށް ހީކުރެވިފައިވާ ވަރަށްވުރެ ތަފާތު މާ ބޮޑެވެ. ތަޖީ ނުކުމެގެން ދިޔައީ، އަލުން ވޯޓު ފޮށިތަކެއް ގުނައިގެން، އަލުން ވޯޓުތަކެއް ލައިގެން ނަތީޖާއަށް ބަދަލެއް އަތުވެދާނޭ މިންވަަރށްވުރެ މާ ތަފާތު ބޮޑުކަމުގައި މިފުރުސަތުގައި ފާހަގަ ކޮށްލާން ޖެހެއެވެ.

މި ނަތީޖާއާއެކު ސިޔާސީ މަޝްރަހު ދެން އެނބުރޭނީ ކިހިނެތް؟

ނިމިގެން މިދިޔަ އިންތިޚާބުގެ ވާދަވެރިކަން ގުޅިފައި އޮތީ ކުރިޔަށް އޮތް 2023ގެ ރިޔާސީ އިންތިޚާބާއެވެ. އޭގެ މާނައަކީ، މިއިންތިޚާބުގެ ނަތީޖާ ސީދާގޮތެއްގައި ގުޅި، ލާމެހިފައި އޮތީ، 2023ގައި އެޕާޓީގެ ރިޔާސީ ޓިކެޓު ލިބޭ ބޭފުޅެއް ކަނޑައެޅުމަށް ނިންމާންޖެހޭ މުހިންމު، ގިނަ ނިންމުންތަކާއެވެ.

އެމްޑީޕީއަށް މިހާމުހިންމު އިންތިޚާބެއް ކުރިއަށް ދަނިކޮށް ދެން ފާހަގަވީ އަނެއްކަމަކީ އިންތިޚާބު ހިނގަމުން ދަނިކޮށް ރާއްޖޭގެ ޓީވީ ޗެނަލެއް މެދުވެރިކޮށް ރައީސް ނަޝީދު ދެއްކެވި ވާހަކަފުޅުތަކެވެ. އެގޮތުން ކުރިއަށް އޮތް 2023 ގެ ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވާދަކުރައްވާނެ ކަމަށް ދެކެވަޑައިނުގަންނަވާ ކަމަަށް ރައީސް ނަޝީދު ވަނީ ވިދާޅުވެފައެވެ. އެގޮތުން އެމްޑީޕީގެ ރިޔާސީ ކެނޑިޑޭޓު ކަނޑައަޅާނީ ޕާޓީގެ އާންމު މެމްބަރުން ކަމަށާއި، އެކަމަށް ބޭއްވޭ ޕްރައިމަރީގައި ވާދަކުރައްވާނެ ކަމަށް ރައީސް ނަޝީދު ވަނީ ވިދާޅުވެފައެވެ. ހަމައެފަދައިން ރައީސް ޞާލިޙް އެ ޕްރައިމަރީއަށް ނުކުމެވަޑައިގަންނަވާނެ ކަމަށް ދެކެވަޑައިނުގަންނަވާ ކަމަަށް ތަކުރާރުކޮށް ނަޝީދު މި އިންޓަރވިއުގައި ވިދާޅު ވެފައި ވެއެވެ.

އެހެންނަމަވެސް ނަޝީދުގެ މި ވާހަކަފުޅުތައް ރައީސް ޞާލިޙް ވަނީ ވަގުތުން ދޮގުކުރައްވާފައެވެ. ރައީސް ޞާލިޙް ވިދާޅުވީ ރިޔާސީ އިންތިޚާބުގައި ވެސް ނޫނީ ޕާޓީގެ ޕްރައިމަރީގައި ވެސް ވާދަކުރެއްވުމާ ގުޅޭގޮތުން އެއްވެސް މަޝްވަރާއެއް ރައީސް ނަޝީދާއި ކުރައްވާފައި ނުވާނެކަމަށެވެ. އަދި އެމްޑީޕީގެ ޕްރައިމަރީގައިވެސް އަދި ރިޔަސީ އިންތިޚާބުގައިވެސް ވާދަ ނުކުރަން ނުނިންމާކަމަށް، ނަޝީދަށް ރައްދު ދެއްވަމުން ރައީސް ޞާލިޙް ވިދާޅުވިއެވެ. އަދި އެފަދަ އެއްވެސް ކަމަކާ އެއްވެސް ފަރާތަކާ މަޝްވަރާ ނުކުރައްވާ ކަމަށްވެސް ރައީސް ވިދާޅުވިއެވެ.

ޕާޓީގެ ޗެއަރ ޕަރސަންކަމަށް ހޮވިވަޑައިގެންނެވި ފައްޔާޒާއި ރައީސް ޞާލިޙަށް ތާޢީދު ކުރައްވާ ބޭފުޅުން އަބަދުވެސް ވިދާޅުވަމުން ގެންދަވަނީ ރައީސް ޞާލިޙަށް ވެރިކަމުގެ ދެވަނަ ދައުރެއް ދެއްވަން ޖެހޭކަމަށެވެ. ނަމަވެސް ނަޝީދުގެ ފެކްޝަނުން އަބަދުވެސް ވަކާލަތު ކުރަމުންދަނީ ޕާޓީގެ ރިޔާސީ ކެނޑިޑޭޓު ކަނޑައަޅާނީ ޕާޓީގެ ޕްރައިމަރީން ކަމަށެވެ. ދެން ކުރެވޭ އަނެއް ސުވާލަކީ ރައީސް ނަޝީދު ވިދާޅުވާހެން ޕްރައިމަރީއެއް ބޭއްވި ކަމުގައި ވީނަމަވެސް ނަޝީދަށް ރިޔާސީ ޓީކެޓް ކަށަވަރު ކުރެވޭނެ ތޯއެވެ. އަދި، ރިޔާސީ ނިޒާމް އޮންނަ ގިނަ ގައުމުތަކުގައި އަމަލުކުރާ އުސޫލުން، އެއް ޕާޓީއަކުން ހުންނަވާ ރައީސަށް ޕްރައިމަތީއަކާ ނުލާ ޓިކެޓް ދޭއުސޫލުން، ކުރިޔަށް އޮތް ދައުރުގެ އެމްޑީޕީގެ ރިޔާސީ ޓިކެޓް ޕްރައިމަރީއަކާ ނުލާ ރައީސް ސާލިހަށް ލިބެން ޖެހޭނެކަމަށް އެމްޑީޕީގެ އިސް ބައެއް ފަރާތްތަކުން ވަލާލާތު ކުރައްވާ ކުރެއްވުން ކާމިޔާބު ވެދިއުމަށް މި ނަތީޖާއިން ފޯރުކޮށްދޭނީ ކިހާވަރެއްގެ އެހީތެރިކަމެއް ތޯއެވެ.

އަދި، އެމްޑީޕީގެ ނިމިދިޔަ ޗެއަރޕާސަން އިންތިޚާބުގެ ނަތީޖާއިން ޖަވާބު ލިއްބައިދޭ އިސްވެ ދެންނެވުނު ގިނަ ސުވާލުތަކުގެ މައްޗަށް ކުރެވޭ އެންމެ މުހިންމު ސުވާލަކީ، އިންތިހާއަށް ބައިބައިވެސް، ދެކޮޅުވެރިކަމުން އަލިފާން އަދިވެސް އަދަމުންދާ، ޕާޓީގެ އެތެރޭގެ ފިތުނަ، މިނަތީޖާއިން އިތުރަށް ބޮޑުވެ ފުޅާވެގެން ދާނެކަމަށް ކުރެވެމުންދާ ހީތަކެވެ.

ނަމަވެސް ޗެއަރ ޕަރސަން ހޮވުމުގެ އިންތިޚާބުން ސާފުކޮށް ފެންނަން އޮތް ހަގީގަތަކީ މިއީ ރައީސް އިބްރާހީމް މުޙައްމަދު ޞާލިޙް ހޯއްދެވި ކާމިޔާބެއްކަމެވެ. މިނަތީޖާއިން، 2023ގެ އެމްޑީޕީގެ ރިޔާސީ ޓިކެޓާއި އެއް ފިޔަވަޅު ކައިރިއަށް ރައީސް ސާލިހު ފިޔަވަޅު އަޅުއްވައިފި ކަމެވެ. ޕާޓީގެ އެތެރޭގެ ކޮންޓްރޯ އެމަނިކްފާނު ނަންގަވައިފި ކަމެވެ.

އަދި މިނަތީޖާއަށްފަހު އެންމެ ބޮޑަށް ސާފުވާން އޮތް އެއް ކަމަކީ ޕާޓީގެ މިވަގުތުގެ ހާލަތެވެ. ޕާޓީގެ ޕާލަމެންޓްރީ ގުރޫޕްގެ މެޖޯރިޓީވެސް އޮތީ އިބުރާހިމް މުހައްމަދު ސާލިހުގެ އަތްޕުޅުގައެވެ. ގައުމީ މަޖިލިހުގެ ސާފު މެޖޯރިޓީވެސް އޮތީ ރައީސް ސާލިހުއަށެވެ. އަދި މިހާރު އެމްޑީޕީ އިދާރީ އޮނިގަޑުވެސް އޮތީ ރައީސް ސާލިހުގެ ފުރިހަަ ކޮންޓްރޯލުގައެވެ.