ރައީސް ސާލިހުގެ ވެރިކަމުގައި، އެމަނިކްފާނުގެ ތިމާގެފުޅު ގާތް ބޭބޭފުޅުން އެކިއެކި މަގާމްތަކުގައި ތިއްބަވާތަން އެބަ ފެނޭ ކަމަށާއި، އެއީ ދެރަކަމެއް ކަމުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅު ވެއްޖެއެވެ.

ނަޝީދު މިހެން ވިދާޅުވެފައިވަނީ، އެމްޑީޕީގެ މިހާރު ކުރިޔަށްދާ ޗެއަރޕާރސަން އިންތިޚާބު ނިމި، އެ ޕާރޓީއަށް ޗެއަރޕާސަންއެއް އިންތިޚާބު ކުރުން މިއަދު ކުރިޔަށް ދަނިކޮށް، ދިވެހި ޗެނަލްއިން ގެނެސް ދިނުމަށް ހަމަޖަހިފައިވާ، އަދި އެޗެނަލްއިން މިހާރު އިސްތިހާރު ކުރަން ފަށާފައިވާ ނަޝީދުގެ ޚާއްސަ އިންޓަވިއުގައެވެ.

ތަންކޮޅެއް ގިނައިން ރައީސުލްޖުމްހޫރިއްޔާއާއި ތިމާގެފުޅުން، ގާތް ބައެއް ބޭފުޅުން އެކިއެކި މަގާމްތަކުގައި ތިއްބަވާތަން އެބަ ފެނޭ. ދެން އެއީ ދެރަކަމެއް.

މި އިންޓަރވިއުގައި ނަޝީދު ވިދާޅުވެފައި ވެއެވެ.

Havaasaa: EXCLUSIVE INTERVIEW w/ Speaker of the Parliament @MohamedNasheed | Saturday | 14th May 2022 | 14:30 | only on DHIVEHI CHANNEL #Medianet121 #DhiraaguTV1017 pic.twitter.com/ylyhtVVBJD

— Dhivehi Channel (@DhivehiChannel) May 13, 2022

ދިވެހި ޗެނަލް މިހާރު ޓްރެއިލަރ ދައްކަން ފަށާފައިވާ ނަޝީދުގެ މި އިންޓަވިއު ގެނެސް ދިނުމަށް ހަމަޖެހިފައިވަނީ މިއަދު 14:30 ގައިކަމަށް އެ ޓީވީ ޗެނަލްއިން ކޮށްފައިވާ ޓުވީޓުގައި ލިޔެފައި ވެއެވެ.

މިހާރު އާންމުކޮށް އިސްތިހާރު ކުރަން ފަށާފައިވާ މި ޓެރެއިލަރއިން އެގެން އިންނަ ގޮތުގައި، މި އިންޓަވިއުގައި ނަޝީދުވަނީ 6 މޭގެ ޓެރަރިސްޓު ހަމަލާގެ އިތުރުން، ރައީސް ސާލިހުގެ ސަރުކާރުގައި، ރައީސް ސާލިހުގެ ތިމާގެ ބޭފުޅުން ގިނަ ކަމަށް ވިދާޅުވެ އެކަމަށްވެސް ފާޑު ވިދާޅުވެފައެވެ. އަދި އޭގެ އިތުރުން މިހާރު އިދިކޮޅު ޕީޕީއެމްއިން ކުރިޔަށް ގެންދާ "އިންޑިއާ އައުޓު" ކެމްޕޭނާ ގުޅޭގޮތުންވެސް މި އިންޓަވިއުގައި ނަޝީދުވަނީ ވާހަކަ ދައްކަވާފައެވެ.

އެހެންނަަމެވެސް، އެމްޑީޕީގެ މެމްބަރުން ވޯޓަލަމުންން ދާއިރު، ދިވެހި ޗެނަލްއިން ދެއްކުމަށް ހަމަޖެހިފައިވާ މިއިންޓަވިއުގައި، ކުރިޔަށްދާ ޗެއަރޕާސަން އިންތިޚާބާއި ގުޅޭގޮތުން ނަޝީދު ސީދާ ވަހަކަ ދައްކަވާފައިވާކަމެއް ސާފުވާކަށް ނެތެވެ.

މިއަދު ނަޝީދު އިންޓަވިއު ދެއްވުމަށް ހަމަޖެހިފައިވާއިރު، ނަޝީދުގެ ތާއީދާއެކީ މިއިންތިޚާބުގައި ވާދަކުރަމުންދަނީ، ރައްޔިތުންގެ މަޖިލިހުގެ މާފަންނު އުތުރު ދާއިރާގެ މެމްބަރު، އަދި ނަޝީދުއާއި ގާތް ގުޅުމެއް އޮންނަ، އިމްތިޔާޒު ފަހުމީއެވެ. ނަޝީދު މީގެ ކުރިން ވަނީ، މި އިންތިޚާބުގައި ތާއީދު ކުރައްވަނީ ނަޒާހަތްތެރި ކެނޑިޑޭޓަކަށް ކަމަށް ވިދާޅުވެ، އިމްތިޔާޒު ފަހުމީހަށް އެމަނިކްފާނުގެ ތާއީދު އޮތްކަންވެސް ހާމަ ކުރައްވާފައެވެ. ރައީސް ސާލިހުގެ ތާއީދާއެކީ އިންތިޚާބުގައި ވާދަކުރަމުންދަނީ، ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލެވެ.

އެމްޑީޕީގެ އެންމެ އިސް ދެ ލީޑަރުންގެ މެދުގައި ވާދަވެރިކަން ބޮޑުވެފައިވާ މިއިންތިޚާބުގެ ވޯޓުލުން ކުރިޔަށް ދަނިކޮށް، ނަޝީދުގެ ޚާއްސަ ޓީވީ އިންޓަވިއުއެއް ގެނެސް ދިނުމަށް ހަމަޖެހިގެން ދިއުމުގެ ކަންބޮޑުވުން އެމްޑީޕީގެ ބައެއް މެމްބަރުން ގެންދަނީ ފާޅު ކުރަމުންނެވެ. ބައެއް މެމްބަރު ތުހުމަތު ކުރާ ގޮތުގައި މިއީ އިންތިޚާބަށް ނުފޫޒު ފޯރުވުމަށް ގެނެސްދޭ ޚާއްސަ އިންޓަވިއުއެކެވެ.

އެމްޑީޕީގެ ޗެއަރޕާސަންގެ އިންތިޚާބުގެ ކެމްޕޭން ވާދަވެރިކަން ބޮޑުވެ، މި ކެމްޕޭންގައި ދެފަރާތުންވެސް ވަނީ އެއްބަޔަކު އަނެއްބަޔަކަށް ވަގަށްގޮވާ، ރާބިއުމާއި ޒިނޭގެ ތުހުމަތުވެސް އެއްބަޔަކު އަނެއްބައެއްގެ ބޮލުގައި އަޅުވާފައެވެ.

އެމްޑީޕީގެ ޗެއަރ ޕާރސަންއަކު އިންތިޚާބު ކުރުމަށް އެޕާޓީގެ މެމްބަރުން މިއަދު ވޯޓު ލާން ނިކުންނައިރު، މިނިވަން އިންސާފުވެރި އިންތިޚާބެއް ބޭއްވުމަށް ފުރުސަތު ދިނުމަށް ޕާޓީގެ ސެކެޓްރިއޭޓުންވަނީ ޕާޓީގެ އެންމެހާ މެމްބަރުންނަށް ގޮވާލާފައެވެ. އަދި ދެ ކެނޑިޑޭޓުންވެސް ވަނީ، މިއީ އެމްޑީޕީގެ މުސްތަގުބަލާއި އެތައް ގޮތަކުން ގުޅި ލާމެހިގެންދާ އިންތިޚާބަކަށް ވެގެން ދާއިރު، މިއިންތިޚާބުގައި ގިނަ ބަޔަކު ވޯޓު ލުމަށާއި އަދި ވިސްނުންތެރިކަމާއެކު ވޯޓު ދިނުމަށް ގޮވާލައްވާފައެވެ.