މަސްވެރިކަން ކުރަން އުޅުމުގެތެރޭގައި ދޯންޏަކުން ކަނޑަށް ވެއްޓުނު މީހަކަށް މިޔަރެއް ހަމަލާދީފިއެވެ.
އެމްއެންޑީއެފް އިން ބުނީ، ޅ.އަތޮޅު މާފިލާފުއްޓާ ދިމާލު ބޭރުން މަސްވެރިކަން ކުރަމުން ދިޔަ ދޯންޏަކުން މީހަކު ކަނޑަށް ވެއްޓުނު ވަގުތު އެމީހާއަށް މިޔަރެއް ހަމަލާ ދިނުމުން އެކަން ދޯނިން ކޯސްޓްގާޑަށް އަންގާފައިވާކަމަށެވެ.
އެހެންކަމުން އެމްއެންޑީއެފް ނޮދަން އޭރިޔާ ކޯސްޓްގާޑް ސްކޮޑްރަންއިން ޅ.އަތޮޅު ހޮސްޕިޓަލްގެ ޓީމަކާއިއެކު މިހާރު ދަނީ އެދޯނި ކައިރިއަށް ދަތުރުކުރަމުންދާކަމަށާއި، އެމީހާގެ ހާލު ސީރިއަސް ނޫންކަމަށް ދޯނީގެ ކެޕްޓަން މައުލޫމާތުދޭކަމަށް އެމްއެންޑީއެފް އިން ބުންޏެވެ.
މިހާރު ރާއްޖޭގެ ކަނޑުގެ ސަރަހައްދުތަކުގައި މިޔަރު ގިނަވެ މަސްވެރިކަން ކުރުމަށް އުނދަގޫވާކަމަށް މަސްވެރިން އަންނަނީ ބުނަމުންނެވެ. އެންމެ ބޮޑަށް މިވާހަކަ ދައްކަނީ ސޯޝަލް މީޑިއާގެ ޕްލެޓްފޯމްތަކުގައެވެ. އަދި މިޔަރު ހިފައި މަދުކުރުމަށްވެސް ބައެއް ފަރާތްތަކުން ގޮވާލައެވެ.
ނަމަވެސް މިޔަރަކީ ރާއްޖޭގައި ޤާނޫނުން ހިމާޔަތްކޮށްފައިވާ ދިރުމެކެވެ. ފިޝަރީސް މިނިސްޓްރީން ބުނީ މިޔަރުގެ އާބާދީ ބެލުމަށް ހެދި ދިރާސާތަކުން މިޔަރު އިތުރުވިކަން އަދި އެނގެން ނެތްކަމަށެވެ. މިޔަރުގެ އާބާދީ އިތުރުވުމަށް ސާވޭ ކުރި މެރިން ރިސާޗްއިން ބުނީ 2020 ވަނަ އަހަރާ 2021 ވަނަ އަހަރު މިޔަރުގެ އާބާދީ އިތުރުވަމުން އަންނަ މިންވަރު ދެނެގަތުމަށް ހެދި ސާވޭއިން އެކަން ފާހަގަވެފައި ނުވާކަމަށެވެ. އެހެންކަމުން މިޔަރުގެ މަސްވެރިކަން ހުޅުވާލެވޭނީ އާބާދީ އެވަރަށް އިތުރުވެއްޖެކަން ޔަޤީންކަމާއިއެކު އެނގިގެންކަމަށް މިނިސްޓްރީން ބުންޏެވެ.
One Response
ޑަދިރަާސަާކުރިމިީހުންކަޑަން އެންލަާލިީ މަާއެގެެޭނެ މިއަރުމަދުތޮވިީގިނަވިީ މިީރަގަލުކަމެންދިރަާސަާކޮލަން އަވަސްކުރަންވިީ