އެމްޑީޕީގެ ރައީސް މުހައްމަދު ނަޝީދު އަވަހާރަ ކޮށްލުމަށްދިން ޓެރެރިސްޓު ހަމަލާ ފޮރުވުމަށްޓަކައި، ވެރިކަން ކުރާ މައި ޕާޓީ އެމްޑީޕީގެ ސަރުކާރަަށް ތާއީދު ކުރާ މެމްބަރުން ކުރައްވަމުންދާކަމަށް ތުހުމަތުކޮށް، ނަޝީދުގެ ވަރުގަދަ ރައްދެއް ދެއްފައިފިއެވެ.

މެއި މަހުގެ 6 ވަނަ ދުވަހު ރައީސް ނަޝީދަށް ހަމަލާދިނީ އެމަނިކުފާނުގެ ގެކޮޅުން ނުކުމެވަޑައިގެން ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ. އެ ހަމަލާ ދީފައިވަނީ ރޭޒަރު ފުށް އަޅާފައިވާ ބޮމެއް ގޮއްވާލައިގެންނެވެ. ރައީސް ނަޝީދަށް ދިން ހަމަލާގައި އޭގެ 11 އެތިކޮޅު ނަޝީދު ހަށިކޮޅުން ޑޮކްޓަރު ވަނީ ނަގާފައެވެ. އަދި ނަޝީދުގެ އިތުރުން އެ ހަމަލާގައި އެމަނިކުފާނުގެ ތިން ބޮޑީގާޑުންނާއި މަގުމަތިން ދިޔަ ދިވެއްސަކާއި އިނގިރޭސިވިލާތުގެ މީހަކަށްވެސް އަނިޔާވިއެވެ.

ނަޝީދަށް ދިން ހަމަލާއަށް އެއް އަހަރު ވެގެންދިޔަ އިރުވެސް ސަރުކާރުން މިކަމަށް މާބޮޑު އިޖާބައެއް ނުދޭކަމަށް ރައީސް ނަޝީދަށް ތާއީދުކުރާ މަޖިލިސް މެމްބަރުން ދަނީ ވިދާޅުވަމުންނެވެ. މިކަން އެންމެ ބޮޑަށް ހޫނުވީ މަޖިލިސް ނައިބް ރައީސް އީވާއާއި އެމްޑީޕީގެ ކުރީގެ ޗެއާޕާސަން ހަސަން ލަތީފް ދައުލަތުގެ މީޑިއާގައި ދެއްކެވި ވާހަތަކާއި ގުޅިގެންނެވެ.

މިވާހަތައް ހޫނުވުމުން މިރޭ އެމްޑީޕީގެ މަޖިލިސް މެމްބަރުން ހިމެނޭ ވަޓްސް އަޕް ގްރޫޕުގައި ރައީސް ނަޝީދު ވަނީ ހެންވޭރު ދެކުނު ދާއިރާގެ މެމްބަރު ހުސެއިން ޝަމީމް (އަނދުން ހުސެއިން) އަތުގައި އެ މަނިކުފާނުގެ ލޭ ހޭކިފައިވާ ކަމަށެވެ.

ތިޔަ ބޭފުޅުންގެ އަތުގައި ހޭކިފައި ތިޔަވަނީ އަޅުގަނޑުގެ ލޭ.

ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، އެމަނިކުފާނަށް ދިން ހަމަލާގެ ރޭވެންތައް ފޮރުވުމުގައި ސަރުކާރަށް މެމްބަރު ހުސެއިން ވާގިވެރިވާ ކަމަށެވެ. މި ވާހަކަތަކާއި ގުޅިގެން ރައީސް ނަޝީދަށް ރައްދު ދެއްވައި އަނދުން ހުސެއިން ވިދާޅުވީ، ރައީސް ނަޝީދު މިވަގުތު ހުންނެވީ މާ ބޮޑަށް ކޯފާވެފައި ކަމަށެވެ. އެ މެސެޖަށް ރައްދު ދެއްވައި ރައީސް ނަޝީދު ވިދާޅުވީ، އަނދުން ހުސެއިންގެ އަތް ބެލުމުން އެ މަނިކުފާނުގެ ލޭ ފެންނާނެ ކަމަށެވެ.

އަޅުގަނޑުގެ ލެޔަކީ ކެރަފާ ދަނޑިކޮށީގެ ލޭ. އޭގައި އަސަރު ހުންނާނެ.

– ނަޝީދު ދާޅުވިއެވެ.

މި ތުހުމަތުތަކާއި ގުޅިގެން އަނދުން ހުސެއިން ވަނީ އޭނާގެ ނަން ތަހުގީގު ރިޕޯޓާއި އިންކުއަރީ ރިޕޯޓްގައި އޮތްތޯ ސުވާލު ކުރައްވާފައެވެ. ރައީސް ނަޝީދަށް ދިން ހަމަލާއާއި ގުޅިގެން ބޮޑެތި ތުހުމަތުތަކެއް ސަރުކާރަށް ތާއީދުކުރާ މެމްބަރުން (ރައީސް ޞާލިހަށް ތާއީދު ކުރާ މެމްބަރުން) އަށް ނަޝީދު މިރޭ ކުރައްވާފައިވާއިރު، މިހަމަލާގައި ސަރުކާރުގެ އެއްވެސް އަތެއް ވާކަމެއް މިހާތަނަށް ކުރި ތަހުގީގުން ހާމަވެފައި ނުވެއެވެ.

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ޝަރީޢަތް ދިގުލައިގެންދާނަމަ، ޖިނާއީ އަދުލުގެ ނިޒާމަށް ކުރާ އިތުބާރަށް ނޭދެވޭ އަސަރުކުރާނެކަމަށް މި ހަމަލާގެ ޝަރީއަތް ހިނގާ ނުހިނގާގޮތް ބެއްލެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޢައްޔަންކުރައްވާފައިވާ ޚާއްޞަ މަންދޫބު، އައްބާސް ފާއިޒުވެސް ވަނީ ވިދާޅުވެފައެވެ.

އައްބާސްގެ ބަޔާނުގައި ރައީސް ނަޝީދަށް ދިން ޙަމަލާގެ ތަޙުޤީޤުކުރުމާއި ދަޢުވާއުފުލުމުގެ މަރުޙަލާގެ ޓައިމްލައިނާ އެއްގޮތަށް ޝަރީޢަތްތައް ކުރިއަށްނުދާތީ އެކަމުގެ ކަންބޮޑުވުންވެސް ވަނީ ފާޅުކުރައްވާފައެވެ. އަދި މި ޝަރީޢަތްތައް އިތުރު ލަސްތަކެއްނުވެ ކުރިއަށްގެންދިއުމަށްވެސް ވަނީ ގޮވާލައްވާފައެވެ.

މިފަދަ މުހިއްމު ޝަރީޢަތެއް ލަސްވުމަކީ، ޖިނާއީ ޢަދުލުގެ ނިޒާމާ މެދު އޮންނަ އިތުބާރު ކުޑަވެ، ނޭދެވޭ އަސަރު ފޯރާނެ ކަމެއްކަމަށް އޭނާ ވިދާޅުވިއެވެ. އަދި މި ކަންބޮޑުވުންތައް އުއްތަމަ ފަނޑިޔާރާއި، ޖުޑީޝަލް ސަރވިސް ކޮމިޝަންގެ މެންބަރުންގެ ސަމާލުކަމަށް ގެނެސްފައިވާނެކަމަށްވެސް އައްބާސް ނެރުއްވި ބަޔާނުގައި ވިދާޅުވެފައިވެއެވެ.