މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑެ) އެމްޑީޕީގެ ޗެއާޕާސަންގެ މަޤާމަށް ވާދަކުރާ ފައްޔާޟު އިސްމާއިލަށް ފުރައްސާރަ ކުރި މައްސަލަ، ފައްޔާޟުގެ ކެމްޕެއިން ޓީމުން ކުށްވެރިކޮށްފިއެވެ.
ކެމްޕެއިންގައި ފައްޔާޟު އަތޮޅު ތެރޭގެ ރަށްތަކަށް ވަޑައިގެން ޖޯއްޔެއްގައި އޮތް މީހަކާއި ވާހަކަ ދައްކަން މަޑު ކޮށްލައިގެން ހުރި ފޮޓޯއެއް ހިއްސާކޮށް ބޮންޑޭ ވަނީ ކެމްޕެއިނަށް ވަޑައިގަންނަވާއިރު، މީހާ ސާފުތާހިރުވެ ހުންނަން ޖެހޭކަމަށެވެ. މަޖިލީހުގެ ކޮމިޓީތަކަށް ޖިންސާއި ޓީސާޓު ލައިގެން އަނގަފުރެންދެން ފޯއް އަޅައިގެން ވަނުމާ ދެކޮޅަށް ފާޑު ކިޔާ އެކަން ވެސް ވާނީ މިހާރު ހުއްޓުވާފަވާކަމަށް ބޮންޑޭ ވަނީ ވިދާޅުވެފައެވެ.
މިލަވެ ހަރުއަރާފައިވާ ޖިންސެއްލައިގެން އަބަދު އުޅުމަކީ އަދި ގޭބިސީތަކަށް ވަނުމަކީ އެމްޑީޕީ މެމްބަރުން ބަލައިގަންނާނެ ކަމެއްނޫނެވެ. ސާފުތާހިރު ކަމުގެ ނަމޫނާ ދައްކާން ކޮންމެ މެމްބަރަކު ވެސް ބޭނުންވާނެއެވެ. މަޖިލީހުގެ ކޮމިޓީތަކަށް ޖިންސާއި ޓީސާޓު ލައިގެން އަނގަފުރެންދެން ފޯއް އަޅައިގެން ވަނުމާ ދެކޮޅަށް ފާޑު ކިޔާ އެކަން ވެސް ވާނީ މިހާރު ހުއްޓުވާފައެވެ. ދައުލަތު އިސްމަގާމުތަކުގައި ތިބޭ މީހުން ނަމޫނާ ވާންޖެހޭނެއެވެ.
– ބޮންޑޭ ވިދާޅުވިއެވެ.
މިލަވެ ހަރުއަރާފައިވާ ޖިންސެއްލައިގެން އަބަދު އުޅުމަކީ އަދި ގޭބިސީތަކަށް ވަނުމަކީ އެމްޑީޕީ މެމްބަރުން ބަލައިގަންނާނެ ކަމެއްނޫނެވެ . ސާފުތާހިރު ކަމުގެ ނަމޫނާ ދައްކާން ކޮންމެ މެމްބަރަކު ވެސް ބޭނުންވާނެ އެވެ . #InthiAaEku pic.twitter.com/btt7r7HCeh
— Ibrahim Rasheed (@BondeM4) May 7, 2022
ބޮންޑޭގެ ވާހަކަތައް ކުށްވެރިކޮށް ފައްޔާޟުގެ ކެމްޕެއިން މެނޭޖަރ އިބްރާހިމް ވަހީދު (އިބުރޭ) ވިދާޅުވީ މިނިސްޓަރ ފައްޔާޟަށް ފުރައްސާރަ ކުރި ކުރުމަކީ ބަލައި ގަނެވޭނެ ކަމެއް ނޫންކަމަށެވެ. އަދި މިކަން އެންމެ ހަރުކަށި އިބާރާތުން ކުށްވެރިކުރާކަމަށް އިބުރޭ ވިދާޅުވިއެވެ.
ވާދަވެރި ކެނޑިޑޭޓެއްގެ ކެމްޕެއިން ޓީމްގެ މެމްބަރުން އެމްޑީޕީ ހިންގާލަން ކެނޑިޑޭޓަށް ފުރައްސާރަ ކުރުން، އެމްޑީޕީ ހިންގާލަން ކެމްޕެއިން ޓީމުގެ ފަރާތުން ކުށްވެރި ކުރަން.
– އިބްރޭ ވިދާޅުވިއެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބު އޮންނާނީ މިމަހުގެ 14 ވަނަ ދުވަހުއެވެ. އިންތިޚާބުގެ ކެމްޕެއިންގެ އެންމެ ފަހު ހަރަކާތްތައް ކުރިއަށްދާއިރު، ދެފަރާތުންވެސް ދަނީ ބަހުގެ ހޫނު ހަމަލާތައް ބަދަލު ކުރަމުންނެވެ.
