ހުކުރު މިސްކިތް މަރާމާތު ކުރުމުގެ ނަމުގައި އެއް އަހަރު އެ މިސްކިތް ބަންދުކޮށްގެންކުރި މަސައްކަތް ބަލާނެކަމަށް ޕީއެންސީގެ ނައިބު ރައީސް އަދި މާލެ ސިޓީކައުންސިލްގެ ހުޅުމާލެ ދާއިރާގެ މެންބަރު އިބްރާހީމް ޝުޖާޢު ވިދާޅުވެއްޖެއެވެ.
ޝުޖާޢު މިހެން ވިދާޅުވީ އިންޑިއާގެ އެހީގައި ރާއްޖޭގައި އިހުގެ ބުދު ދީނުގެ އާސާރުތައް ބަލަހައްޓާވާހަކަ ދެކެވެމުންދާ ދަނޑިވަޅެއްގައެވެ. ނަމަވެސް ސަރުކާރުން ވަނީ އެކަން ދޮގުކޮށްފައެވެ. ސަރުކާރުންވަނީ އިންޑިއާގެ އެހީގައި ކުރިއަށްދަނީ ހުކުރު މިސްކިތް މަރާމާތު ކުރުމުގެ މަސައްކަތްކަމަށް ވިދާޅުވެފައެވެ.
ޝުޖާޢު ވިދާޅުވީ، ހުކުރު މިސްކިތް 1 އަހަރު ވަންދެން ބަންދުކޮށްގެން ކުރި އެއްވެސް މަސައްކަތެއް ނެތްކަމަށާއި، މަސްތުވާތަކެތީގެ ހާއްޔަކަށް އެތަންވެ، އެކަމުގެ ޝަކުވާ ރައްޔިތުން ކުރާކަމަށެވެ. ބަންދުކޮށްގެން ކުރީ ކޮން މަސައްކަތެތީވެސް ޝުޖާޢު ސުވާލުކުރެއްވިއެވެ.
މިސްކިތެއް މަރާމާތަށް 1 އަހަރު ހޭދަވި ޤައުމެއް ދުނިޔޭގަ މިނޫނީ ނެތް!ސަރުކާރުން ހަދަނީ ހުސް ދޮގު.އުޅެނީ އިންޑިޔާ ސަރުކާރުގެ ހީލަތްތެރި ރޭވުންތައް ފޮރުވަން.ހުކުރު މިސްކިތް މަރާމާތު ކުރިގޮތް އަޅުގަނޑުމެން ބަލާނަން.މުންނާރު ތާހިރު ކުރީވެސް އަޅުގަނޑުމެން ހަޅޭލަވާގެން.????????♂️2/2
— Ibrahim Shujau (@IbrahimShujaau) May 7, 2022
ޝުޖާޢު ވިދާޅުވީ، މިސްކިތެއް މަރާމާތަށް 1 އަހަރު ހޭދަވި ޤައުމެއް ދުނިޔޭގަ މިނޫނީ ނެތްކަމަށެވެ. ސަރުކާރުން ހަދަނީ ހުސް ދޮގުކަމަށް ތުހުމަތުކުރައްވާ ޝުޖާޢު ވިދާޅުވީ ސަރުކާރުން އުޅެނީ އިންޑިޔާ ސަރުކާރުގެ ހީލަތްތެރި ރޭވުންތައް ފޮރުވަންކަމަށެވެ. ހުކުރު މިސްކިތް މަރާމާތު ކުރިގޮތް ބަލާނެކަމަށް ޝުޖާޢު ވިދާޅުވިއެވެ.
އިންޑިއާގެ އެހީގައި މިވަގުތު ރާއްޖޭގައި ކުރެވޭ އެންމެ ބޮޑު ހެރިޓޭޖް މަސައްކަތަކީ މާލޭ ހުކުރު މިސްކިތުގެ އާބަތުރަ ފިލުވުމުގެ މަސައްކަތް ކަމަށް ސަރުކާރުން ބުނެފައިވެއެވެ.
