ޔުއެފާ ކަޕް (ޔޫރޮޕާ ލީގު)، ޗެމްޕިއަންސް ލީގު އަދި ކޮންފަރެންސް ލީގުގެ ފައިނަލަށް ދަތުރުކުރި ފުރަތަމަ ކޯޗަކަށް މޮރީނިއޯވެއްޖެއެވެ.
ކޮންފަރެންސް ލީގުގެ ސެމީ ފައިނަލް ދެ ވަނަ ލެގުގައި ރޭ ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އިން ވަނީ 1-0 އިން އިންގްލެންޑްގެ ލެސްޓާ ސިޓީ ބަލިކޮށްފައެވެ. އެގްރިގޭޓަށް ބަލާއިރު، ރޯމާ ކުރިހޯދީ 2-1 އިންނެވެ.
ލެސްޓާ ކޮޅަށް ރޭ ރޯމާގެ ހަމައެކަނި ގޯލު ޖެހީ އިނގިރޭސި ފޯވާޑް ޓެމީ އަބްރަހަމްއެވެ. ކޮންފަރެންސް ލީގުގައި އަބްރަހަމް ވަނީ ނުވަ ގޯލު ޖަހައިފައެވެ. ކޯނަރަކުން ރޯމާގެ ކެޕްޓަން ލޮރެންޒޯ ޕެލެގްރީނީ ނެގި ހުރަސް އަބްރަހަމް ވަނީ ބޮލުން ގޯލަށް ފޮނުވާލައިފައެވެ.
ލެސްޓާ އިން ގޯލެއް ޖެހޭތޯ ގިނަ މަސައްކަތްތަކެއް ކުރި ނަމަވެސް ކާމިޔާބެއްނުވިއެވެ. ރޯމާގެ ގޯލުގައި ހުރި ޕޯޗުގީސް ކީޕަރު ރުއީ ޕެޓްރީޝިއޯ ހާސްކޮށްލެވޭ ވަރުގެ ހަމަލާއެއް ލެސްޓާ ކުޅުންތެރިންނަށް ފޮނުވާނުލެވުނެވެ.
ރޯމާ ގޮވައިގެން ކޮންފަރެންސް ލީގުގެ ފައިނަލަށް ގޮސް މޮރީނިއޯ ވަނީ ރެކޯޑެއް ގާއިމްކޮށްފައެވެ. އޭނާ އަކީ ތަފާތު ހަތަރު ކްލަބެއް ޔޫރަޕްގެ ފައިނަލަށް ގެންގޮސްދިން ފުރަތަމަ ކޯޗެވެ. މޮރީނިއޯ ވަނީ ޕޯޓޯ ގޮވައިގެން ޔުއެފާ ކަޕާއި ޗެމްޕިއަންސް ލީގުގެ ފައިނަލުގައި ވާދަކޮށްފަ އެވެ. އިންޓަ މިލާނާ އެކު ޗެމްޕިއަންސް ލީގުގެ ފައިނަލެއްގައި ކުޅުނުއިރު، މެންޗެސްޓާ ޔުނައިޓެޑް ޔޫރޮޕާ ލީގުގެ ފައިނަލަކަށް ގެންގޮސްދިނެވެ. އަދި މިހާރު މި ވަނީ ރޯމާ ގޮވައިގެން ކޮންފަރެންސް ލީގު ފައިނަލުން ފުރުސަތު ހޯދައިފައެވެ.
ފެޔަނޫޑާއި ރޯމާ ކުޅޭ ކޮންފަރެންސް ލީގު ފައިނަލް އޮންނާނީ މި މަހު 25 ވަނަ ދުވަހު އަލްބޭނިއާގެ ޓިރާނާގައެވެ. ފައިނަލުގައި ރޯމާއާއި ވާދަ ކުރާނީ ފެޔަނޫޑާ އާއިއެވެ.
