މިދިޔަ އަހަރުގެ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށްގެން ދިން ޓެރެރިސްޓް ހަމަލާގެ ވަށައިގެންވާ ކަންކަން ބެލުމަށްވުރެ އިސްކަންދެނީ ރައީސް ނަޝީދު ސިޔާސީ މަސައްކަތުން އެކަހެރި ކުރުމުގެ މަސައްކަތް ކުރުމަށް ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
ވައްޑެ މިހެން ވިދާޅުވީ ރައީސް ނަޝީދަށް ދިން ނުރައްކާތެރި ޓެރެރިސްޓު ހަމަލާއަށް މިއަދު އެއްއަހަރު ފުރިފައިވާއިރު، ގިނަ ކަންބޮޑުވުންތަކެއް މިހަމަލާއާއި ގުޅިގެން ރައީސް ނަޝީދުގެ އާއިލާއާއި، ވެރިކަން ކުރާ މައި ޕާޓީ އެމްޑީޕީއާއި، މަޖިލީހުންވެސް ފާޅުކޮށްފައިވަނިކޮށެވެ.
މެއި މަހުގެ 6 ވަނަ ދުވަހު ރައީސް ނަޝީދަށް ހަމަލާދިނީ އެމަނިކުފާނުގެ ގެކޮޅުން ނުކުމެވަޑައިގެން ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ. އެ ހަމަލާ ދީފައިވަނީ ރޭޒަރު ފުށް އަޅާފައިވާ ބޮމެއް ގޮއްވާލައިގެންނެވެ. ރައީސް ނަޝީދަށް ދިން ހަމަލާގައި އޭގެ 11 އެތިކޮޅު ނަޝީދު ހަށިކޮޅުން ޑޮކްޓަރު ވަނީ ނަގާފައެވެ. އަދި ނަޝީދުގެ އިތުރުން އެ ހަމަލާގައި އެމަނިކުފާނުގެ ތިން ބޮޑީގާޑުންނާއި މަގުމަތިން ދިޔަ ދިވެއްސަކާއި އިނގިރޭސިވިލާތުގެ މީހަކަށްވެސް އަނިޔާވިއެވެ.
މިހަމަލާއާއި ގުޅިގެން ހުރި ކަންބޮޑުވުންތައް ފާޅުކޮށް، ވައްޑެ ވިދާޅުވީ ހަަމަލާއަށް އަހަރެއް ވެގެންދިޔައި އިރުވެސް މިހަމަލާގެ ވަށައިގެންވާ ކަންކަން ބެލުމަށް އިސްކަންދީފައިވާ ތަނެއް ނުފެނުނުކަމަށެވެ. އޭގެ ބަދަލުގައި މިހާތަނަށް މިވީ އަހަރެއްހާ ދުވަހުގެ ތެރޭގައި ކުރެވުނުހާވެސް ކަމަކީ ރައީސް ނަޝީދު ސިޔާސީ މަސައްކަތުން އެއްފަރާތްކޮށް، ބާކީ ކުރުމަށް ކުރަންޖެހޭ މަސައްކަތް ކުރުމަށް ކަމުގައި ވައްޑެ ވިދާޅުވިއެވެ.
ރައީސްނަޝީދު އަވަހާރަކޮށްލަން ދިން ބޮމުގެ ހަމަލާއަށް 1 އަހަރު. އިންސާފު ހޯދައިދީ، ހަމަލާގެ ވަށައިގެންވާ ކަންކަން ބެލުމުގައި މުޅި ދައުލަތް ފަހަތުފަޔަށް ބުރަވެފައި. ބާރުހުރި ބޭފުޅުން ބާރަށް ކުރާހާވެސްކަމަކީ އެމަނިކުފާނު ސިޔާސީ މަސައްކަތުން އެކަހެރިކޮށް ބާކީކުރެވޭތޯ ކުރާ މަސައްކަތް.
– ވައްޑެ ވިދާޅުވިއެވެ.
ދީނީ ގޮތުން ހައްދުފަހަަނައަޅާފައިވާ ފިކުރުގެ ބަޔަކު ރައީސް ނަޝީދު އަވަހާރަކޮށްލަން ދިން ހަމަލާއަށް އަހަރު ދުވަސް ފުރުމާ ގުޅިގެން މަޖިލީހުން ނެރުނު ބަޔާނުގައި ވަނީ އެ ހަމަލާ ދިންކަމަށް ތުހުމަތުކުރެވޭ ފަރާތްތަކުގެ ޝަރީއަތް ލަސްވުމަކީ ކަންބޮޑުވާކަމެއްކަމަށެވެ.
މަޖިލީހުގެ ނައިބް ރައީސް އީވަ ވެސް ވަނީ މިކަންބޮޑުވުން ތަކުރާރު ކުރައްވައި އިނގިރޭސި ބަހުން ބަޔާނެއްވެސް ނެރެފައެވެ. އީވާގެ ބަޔާނުގައި ވިދާޅުވީ ހަމަލާގެ ތަހުގީގާއި އެ ހަމަލާ ދިނުމުގައި ހިމެނޭ މީހުން ޝަރީއަތްތައް ލަސްވުމުގެ ސަބަބުން ރާއްޖޭގެ އެންމެ ބޮޑު ސިޔާސީ ޕާޓީގެ ލީޑަރުގެ ހައިސިއްޔަތުން ނަޝީދަށް އެމަނިކުފާނު އެންމެ ގަޔާވާ މަސައްކަތް ކަމުގައިވާ، ރައްޔިތުންނާ ބައްދަލުވެ އުޅުމަށް ހުރަސްއެޅި، ސެކިއުރިޓީ ކޯޑަންއެއްގެ ފަހަތުގައި ދިރިއުޅެން މަޖުބޫރުވެފައިވާކަމަށް ވިދާޅުވެފައެވެ.
އަދި މަޖިލިސް ރައީސްގެ ހައިސިއްޔަތުން ވެސް އަދާކުރައްވަން ޖެހޭ ޒިންމާތަކަށް އެކަމުގެ ސަބަބުން އަސަރުކުރާކަމަށް އީވާ އެ ބަޔާނުގައި ވިދާޅުވިއެވެ. އީވާ އިތުރަށް ވިދާޅުވީ، ތަހުގީގާއި ޝަރީއަތްތަކުގައި ހުރި މައްސަލަތަކުގެ ސަބަބުން ހަމަލާގައި ދެން ހިމެނޭ މީހުންނަށް ފިލަން ފަސޭހަވެ ނުވަތަ ބިރަކާ ނުލާ މުޖުތަމައުގައި ދިރިއުޅެން ވެސް ފުރުސަތު ލިބިގެންދާކަމަށެވެ.
އޭގެ އިތުރުން ވެސް އީވާ ވަނީ ހަމަލާދިނުމުގައި އަމަލީ ގޮތުން ބައިވެރިވި މީހުން ހައްޔަރުކޮށްފައިވީ ނަމަވެސް ހަމަލާ ދޭން ސްޕޮންސާކުރި ނުވަތަ ފައިސާ ދީ ފަންޑުކުރި މީހުން، ހަމަލާދޭން ވިސްނުވައިދިން މީހުން އަދި އެހެން ގޮތްގޮތުން ވެސް އެހީތެރިވެދިން މީހުން ހޯދިފައި ނުވާތީ އެކަމާ ކަންބޮޑުވުން ފާޅުކޮށްފަ އެވެ. ހަމަލާއަށް ފަންޑުކުރި މީހުން ނުހޯދޭތީ ނަޝީދުގެ އާއިލާއިން ވެސް ވަނީ ކަންބޮޑުވުން ފާޅުކޮށްފައެވެ.
