ވެރިކަން ކުރާ އެމްޑީޕީގެ ލީޑަރޝިޕުގައާއި، ސިޔާސީ މަސައްކަތުގައި ތިބި އަންހެން ކަނބަލުންނަށް ބޮޑެތި ތުހުމަތުކޮށް، ހަނގާކުރުމަކީ ބަލައި ގަނެވޭނެ ކަމެއްނޫންކަމަށް އެމްޑީޕީގެ އަންހެނުންގެ ރޫހުގެ ރައީސްކަމަށް ވާދަ ކުރައްވާ ރޮޒޭނާ އާދަމް ވިދާޅުވެއްޖެއެވެ.
އޭނާ މިހެން ވިދާޅުވީ މިމަހުގެ 14 ވަނަ ދުވަހު އޮންނަ އެމްޑީޕީގެ ޗެއާޕާސަން އިންތިޚާބުގައި އެންވާރުމެންޓް މިނިސްޓަރ ޝައުނާގެ ތާއީދު އިކޮނޮމިކް މިނިސްޓަރ ފައްޔާޟު އިސްމާއިލަށް ކުރަން ނިންމުމާއިއެކު ޝައިނާއަށް ކުރަމުންދާ ތުހުމަތުތަކާއި ދޮގު އިލްޒާމުތަކާއި ގުޅިގެން ކުރެއްވި ޓުވީޓެއްގައެވެ.
ރޮޒޭނާ ވިދާޅުވީ އެމްޑީޕީގެ ލީޑަރޝިޕްގައި މިހާރުވެސް ތިބީ މަދު އަންހެން ބޭފުޅުންތަކެއްކަމަށެވެ. އަދި ސިޔާސީ ކަންކަމުގައި އިސްކޮށް އުޅެނީ މަދު އަންހެންނުންތަކަށްވާއިރު، އެމީހުންނަށް އެމްޑީޕީ ތެރެއިން ދިމާކޮށް، ބޮޑެތި ދޮގު ތުހުމަތު އެޅުމަކީ ސިޔާސީ ގޮތުން އަންހެނުންނަށް އޮތް ބާރުވެރިކަން ނައްތާލުމަށް ކުރާ ކަމެއްކަމުގައި ރޮޒޭނާ ވަނީ ވިދާޅުވެފައެވެ.
އެމްޑީޕީގެ ލީޑަރޝިޕްގައި ތިއްބެވީ ވަރަށް މަދު އަންހެން ބޭފުޅުން. އެބޭފުޅުންނަށް ޚާއްސަކޮށް ޕާޓީގެ ތެރެއިން މި ގޮތަށް ހަނގާކޮށް ދޮގު ތުހުމަތުކޮށް އަބުރު ކަތިލުމަކީ ސިޔާސީ ދާއިރާއަށް އަންހެނުން ނެރުމަށް އެޅޭ ވަރަށް ބޮޑަށް ހުރަހެއް. މިކަން ހަރުކަށި އިބާރާތުން ކުށްވެރިކުރަން.
– ރޮޒޭނާ ވިދާޅުވިއެވެ.
މާލޭގެ ކުރީގެ މޭޔަރ ސިފާ މުހައްމަދު އެޑްމިންއަކަށް އިންނަވާ އެމްޑީޕީގެ އަންހެނުން ރޫހުގެ ވަޓްސްއަޕް ގުރޫޕެއްގައި ޝައުނާގެ މައްޗަށް ކޮރަޕްޝަނުގެ ބޮޑެތި ތުހްމަތުތަކެއް ކޮށްފައިވެއެވެ. އަދި ޝައުނާއަކީ ކޮރަޕްޓް މީހެއްކަމަށް އަންހެނުންުގެ ރޫހުގައި ލިޔެފައިވާ މީހާ ވަނީ ބުނެފައެވެ.
ފާތިމަތު ޝިޔާމާ ނަމަކަށް ކިޔާ މީހާ ބުނެފައިވަނީ މިނިސްޓަރ ޝައުނާގެ ކޮރަޕްޝަންގެ ލައްކަ ވާހަކަ އެބަހުރިކަމަށެވެ. އޭގެ ތެރެއިންވެސް ތިލަފުށީގައި ހިންގާ ކުނި ނައްތާލުމުގެ ޕްރޮޖެކްޓުން މިނިސްޓަރ ޝައުނާ 3 މިލިޔަން ޑޮލަރު ކަޓުގެ ގޮތުގައި ނަގާފައިވާކަމަށް އޭނާ ވިދާޅުވިއެވެ. އަދި ޝައުނާ އަށް ލިބޭ މުސާރައާއި ނުބައްދަލު ޚަރަދު މިހާރުވެސް ކުރަމުންދާކަމަށާއި، އެގޮތުން ހުޅުމާލެއިން ފްލެޓެއްވެސް ބައްލަވައިގެންފައިވާކަމަށް އޭނާ ވަނީ ބުނެފައެވެ.
ޝައުނާއަށް ކޮރަޕްޝަންގެ ތުހަމަތު ކުރަން ފަށާފައިވަނީ އިއްޔެ އޭނާ މިނިސްޓަރ ފައްޔާޟަށް ތާއީދުކުރަން ނިންމި ހިސާބުންނެވެ. އޭނާ ފައްޔާޟަށް ތާއީދު ކުރަން ނިންމުމުން ރައީސް ނަޝީދުވެސް ވިދާޅުވެފައިވަނީ، ޝައުނާގެ ނިންމުމަކީ އަމިއްލަ މަޤާމުގެ ދިފާއުގައި ނިންމެވި ނިންމުމެއްކަމަށެވެ.
