ކޮރަޕްޓް ވަޒީރުން ލައިގެން ރައީސް އިބްރާހީމް މުޙައްމަދު ޞާލިޙަށް ރައްޔިތުން ދެވަނަ ދައުރެއް ނުދޭނެކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.
އެމްޑީޕީގެ އެތެރޭގެ ޗެއަރޕާސަން އިންތިޚާބާއި ގުޅިގެން ވާދަވެރިކަން ބޮޑުވެ ޚިޔާލުތަފާތުވުން ވަނީ އުފެދިފައެވެ. އެމްޑީޕީ ޗެއަރޕާސަންކަމަށް ވާދަކުރައްވާ އިމްތިޔާޒް ފަހުމީގެ ޓީމުން، އިކޮނޮމިކް މިނިސްޓަރ ފައްޔާޒަށް ކުރައްވާ ތުހުމަތުތަކަކީ ކޮރަޕްޝަންގެ ތުހުމަތުތަކެކެވެ. ރައީސް ނަޝީދުވެސް ވަނީ މި ސަރުކާރުގެ ކޮރަޕްޝަންގެ މައްސަލަތައް ނުބަލާހާ ހިނދު އެމްޑީޕީއަށް 2023 ނުލިބޭނެކަމަށް ވިދާޅުވެފައެވެ.
ޗެއަރޕާސަންކަމަށް ވާދަކުރައްވާ ފައްޔާޒަށް ފާޑުވިދާޅުވެ ބޮންޑެ ވިދާޅުވީ، އެމްޑީޕީގެ އެންމެން ވެސް ރަޢީސް އިބްރާހީމް މުޙައްމަދު ޞާލިޙް ދެވަނަ ދައުރަކަށް ހޮވަން ބޭނުންވާކަމަށެވެ. ނަމަވެސް ކޮރަޕްޓް ވަޒީރުން ލައިގެން ދެވަނަ ދައުރެއް ރައްޔިތުން ނުދޭނެކަމަށާއި، ލަންކާގައި ވެސް ދިމާވެގެން އުޅެނީ މި މައްސަލަކަމަށް ބޮންޑެ ވިދާޅުވިއެވެ.
ބޮންޑެ މިހެން ވިދާޅުވެފައި މިވަނީ، އަންނަ އަހަރުގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިޙް ވާދަކުރައްވައި ވެރިކަމުގެ ދެ ވަނަ ދައުރެއް އެމަނިކުފާނަށް ހޯއްދަވައިދެއްވަން ބޭނުންވާ ކަމަށް ވިދާޅުވުމާއި ގުޅިގެންނެވެ. ވެރިކަމުގެ ދެ ވަނަ ދައުރެއް ފުރިހަމަ ކުރައްވާ މަންޒަރު ދެކެވަޑައިގަތުމަކީ އުއްމީދެއް ކަމަށް ފައްޔާޒް ވިދާޅުވިއެވެ.
ފައްޔާޒް މިހެން ވިދާޅުވެފައިވާއިރު، އެމްޑީޕީގެ ރައީސް އަދި މަޖިލީހުގެ ރައީސް ނަޝީދު ބޭރުގެ ނޫހަކަށް ދާދިފަހުން ވިދާޅުވެފައި ވަނީ ޕާޓީން އެދޭ ނަމަ ރިޔާސީ ޕްރައިމަރީގައި ވާދަކުރައްވާނެކަމަށެވެ. މިގޮތަށް އެމަނިކުފާނު ވިދާޅުވީ ރިޔާސީ އިންތިހާބުގައި އެމަނިކުފާނު ވާދަކުރައްވާނެ ކަމަށް މަޖިލީހުގެ ނައިބު ރައީސް އީވާ އަބްދުﷲ އެމްޑީޕީގެ ޗެއާޕާސަން ކަމަށް އިމްތިޔާޒް ފަހުމީ (އިންތި)އަށް ތާއީދު ހޯދުމުގެ ކެމްޕޭންގައި ވާހަކަ ދައްކަވަމުން ވިދާޅުވެފައި ވަނިކޮށެވެ.
