ރަޝިއާގެ ފޮރިންގ މިނިސްޓަރ ސާރގޭ ލާވްރޯވް، "އެޑޮލްފް ހިޓްލަރގެ ގައިގައި ހުރީ "ޔަހޫދީ ލޭ" ކަމަށް ވިދާޅުވުމާއި ގުޅިގެން އިސްރާއީލާއި ރަޝިއާއާއި ނުތަނަވަސްކަން އުފެދިފައި ވަނިކޮށް، އިސްރާއީލުގެ ކުލީ ސިފައިން، ޔޫކުރެއިންގެ އަސްކަރިއްޔާގެ ކަނާތު ފިޔައިގެ އަޒޯވް ރެޖިމެންޓާއެކީ އެގައުމުގައި ހަނގުރާމަ ކުރަމުންދާ ކަމުގައި ރަޝިއާއިން ތުހުމަތު ކޮށްފިއެވެ.
"އިސްރާއީލުގެ ކުލީ ސިފައިންދަނީ، އަޒޯވް ހަނގުރާމަވެރިންނާއެކީ ކޮނޑާ ކޮނޑު ޖައްސައިގެން ޔޫކުރެއިންގައި ހަނގުރާމަ ކުރަމުން،" ރަޝިއާގެ ފޮރިންގ މިނިސްޓްރީގެ ތަރުޖަމާން، މާރިއާ ޒަކަރޯވާ ކްރެމްލިންއަށް ތާއީދުކުރާ ސްޕުންޓިކް ރޭޑިއޯގައި ވާހަކަ ދައްކަވަމުން ވިދާޅުވެފައި ވެއެވެ.
ޔޫކުރެއިންގެ އަޒޯވް ހަނގުރާމަވެރިންނަކީ، 2014ވަނަ އަހަރު ރަޝިއާއިން ޔޫކުރެއިންގެ ކްރައިމިއާ ހިފުމާއި ގުޅިގެން ރަޝިއާއާއި ދެކޮޅަށް ހަތިޔާރު ނެގި ހަނގުރާމަވެރިން ތަކެކެވެ. އަދި އެއަށްފަހު މި ހަނގުރާމަވެރިންދަނީ، ޔޫކުރެއިންގެ އިރުމަތީ ޑޮމްބަސް ރީޖަންގައި ރަޝިއާއިން ތާއީދުކުރާ ހަނގުރާމަވެރިންނާއި ހަނގުރާމަ ކުރަމުންނެވެ. ފަހުން މި ހަނގުރާމަވެރިންވަނީ ޔޫކުރެއިންގެ އަސްކަރިއްޔާގެ ކޮމާންޑް ކޮންޓްރޯލްގެ ދަށުން ހަގުރާމަ ކުރަން ފަށާފައެވެ.
މީގެ އިތުރުން، ފެބްރުއަރީ 24ވަނަ ދުވަހު ރަޝިއާއިން ޔޫކުރެއިންއަށް ހަމަލާ ދޭންފެށިފަހުން މި ހަގުރާމަވެރިން ރަޝިއާއާއި ދެކޮޅަށް ހަގުރާމަ ކުރަމުންދަނީވެސް ޔޫކުރެއިންގެ އަސްކަރިއްޔާއާއި އެކީއެވެ.
އަދި މިހަގުރާމަވެރިންގެ ބައެއް ސިފައިންނަކީ، މިހާރު ރަޝިއާގެ ބާރުގެދަށަށް ގޮސްފައިވާ ޔޫކުރެއިންގެ މަރިއޮޕޯލްގެ ދިފާއުގައި ހަނގުރާމަކުރަމުން ދާ ފައުޖުގައި ހިމެނޭ ހަގުރާމަވެރިންނެވެ. މީގެތެރޭގައި ހިމެނޭ ބައެއް ހަގުރާމަވެރިން މިހާރުތިބީ، އެމީހުންގެ ބާރުގެ ދަށުގައިވާ، މަރިއަޕޯލްގެ ހަމައެކަނި ސަރަހައްދު ކަމުގައިވާ، އަޒޮވްސްޓާލް ސްޓީލް ޕްލާންޓުގެ އެތެރޭގައި ތާށިވެފައެވެ.
ފާއިތުވެދިޔަ ހަފްތާގައި، ރަޝިއާގެ ފޮރިންގ މިނިސްޓަރ ސާރގޭ ލާވްރޯވް، ހިޓްލަރގެ ގައިގައި ހުރީ ޔަހޫދީ ލޭ ކަމުގައި ވިދާޅުވުމާއި ގުޅިގެން އިސްރާއީލުންވަނީ ނުރުހުން ފާޅުކޮށް، މިއީ "މާފް ނުކުރެވޭނޭ ހައިރާން ކުރުވަނިވި،" ވާހަކައެއް ކަމުގައި ބުނެ، މިއީ ތާރީޚް އޮޅުވާލުން ކަމުގައި ބުނެފައެވެ.
