ބޮލީވުޑްގެ އެންމެ މަަގުބޫލު އޮންސްކްރީން ޖޯޑުގެ ގޮތުގައި މަޝްހޫރު ދެ ތަރިން ކަމުގައިވާ ޝާހްރުކް ޚާނާއި ކާޖޮލް އަނެއްކާވެސް އެކުގައި ފިލްމަކުން ފެނިދާނެ ކަމަށް ޚަބަރުތައް ބުނެފިއެވެ.
ހަތް އަހަރު ފަހުން މި ދެތަރިން އެކުގައި ފެނިގެން ދަނީ ކަރަން ޖޯހަރް ޑައިރެކްޓްކުރާ "ރޮކީ އޯރް ރާނީ ކީ ޕްރޭމް ކަހާނީ" އިން ކަމަށް ޚަބަރުތައް ބުނެއެވެ. މި ފިލްމަކީ އާލިއާ ބަޓާއި ރަންވީރު ސިންގާއެކު ކަރަން ހަދާ ފިލްމެކެވެ.
މި ދެތަރިން އެކުގައި ފެނުނު ނަމަވެސް އެއީ ހާއްސަ ފެނިލުމަކަށް ނޫނީ ނުވާނެއެވެ. ޝާހާއި ކާޖޮލް ފެނިގެން ދާނީ ލަވަ އަކުން ކަމެއް ނުވަތަ ވަކި ހާއްސަ މަންޒަރަކުން ކަމެއް އެއީ އަދި ޖަވާބު ނުލިބޭ ސުވާލެކެވެ.
ކަރަންއަކީ ޝާހްރުކާއި ކާޖޮލްގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ 2010ގެ "މައި ނޭމް އިޒް ޚާން" އާއި 2001ގެ "ކަބީ ހުޝީ ކަބީ ޢަމް" އަދި 1998ގެ "ކުޗް ކުޗް ހޯތާ ހޭ" ގެ ޑައިރެކްޓަރެވެ.
މި ޖޯޑު އެކީގައި އެންމެ ފަހުން ކުޅުނު ފިލްމަކީ 2015 ވަނަ އަހަރު ރޯހިތު ޝެއްޓީގެ "ދިލްވާލޭ" އެވެ. ނަމަވެސް ހީކުރިވަރުގެ ތަރުހީބެއް އެ ފިލްމަށް ލިބިގެން ގޮސްފައެއް ނުވެއެވެ.
