ކުރިއަށް އޮތް އެމްޑީޕީގެ ޗެއާރޕާސަންގެ އިންތިޚާބްގައި، ޖޭޕީގެ އެއްވެސް ޝަޢުގުވެރިކަމެއް ނެތް ކަމުގައި ޖުމްހޫރީޕާޓީގެ ލީޑަރުގެ ޕޮލިޓިކަލް އެޑްވައިޒަރު އިލްހާމް އަހުމަދު ވިދާޅުވެއްޖެއެވެ.
އިލްހާމް މިހެން ވިދާޅުވީ މިހާރު އޮތް ކޯލިޝަން ސަރުކަރަކީ ވިލާ ޝިޕިންގެ ޑެސްކެއް ކަމުގައި ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު ބޮންޑޭ ވިދާޅުވެ ދެއްކެވި ވާހަކަތަކާއި ގުޅިގެންނެވެ. ޤާސިމަށް މުޚާތަބުކޮށް އެމްޑީޕީގެ ބައެއް ފަރާތްތަކުން ދަނީ ޗެއާޕާސަން އިންތިޚާބަށްވެސް ޤާސިމްގެ ނުފޫޒު ފޯރުވަމުންދާކަމުގެ ތުހުމަތު ކުރަމުންނެވެ.
މިތުހުމަތުތަކުގެ ރައްދުގައި އިލްހާމް ވިދާޅުވީ، ޖުމްހޫރީ ޕާޓީގެ ލީޑަރާއި، ޕާޓީއަކީވެސް ހުރިހާ ސިޔާސީ ޕާޓީއަކަށްވެސް މަރުހަބާ ކިޔާނެ ޕާޓީއެއްކަމަށެވެ. ވަކިވަކި ކަންކަމުން މިސާލު ނަންގަވަމުން އިލްހާމް ވިދާޅުވީ ބަރުލަމާނީ ނިޒާމާއިމެދު އެމްޑީޕީގެ ބައެއް ބޭފުޅުން އުޅުއްވި ދުވަސްވަރު އެމްޑީޕީގެ ރައީސް މުހައްމަދު ނަޝީދު ޤާސިމްއާއި ބައްދަލު ކުރަން އެދުމުންވެސް މަރުޚަބާ ކިޔާފައިވާކަމަށެވެ.
ތީ މައްސަލައަކީ. ބަރުލަމާނީ ނިޒާމްގެ ވާހަކަ ދައްކަން ރައީސް ނަޝީދު ވަޑައިގެންނެވީމަވެސް އޮނަރަބުލް ޤާސިމް އިބްރާހިމް ވަރަށް އިހްތިރާމާއި އެކު ރައީސް ނަޝީދަށް މަރުހަބާ ކިއުއްވި. އެމްޑީޕީގެ ޗެއާރޕާސަންގެ އިންތިޚާބްގައި، ޖޭޕީގެ އެއްވެސް ޝަޢުގުވެރިކަމެއް ނެތް.
– އިލްހާމް ވިދާޅުވިއެވެ.
އިލްހާމް މިހެން ވިދާޅުވެފަވަނީ، ބަރުލަމާނީ ނިޒާމު ގެނައުމަށް މިދިޔަ އަހަރު ރައީސް ނަޝީދު ކުރެއްވި މަސައްކަތުގައި އަމިއްލަފުޅަށް ދަތުރު ހަދައިގެން ޤާސިމްއާއި ބައްދަލު ކުރެއްވުމަށް ކުރެއްވި ދަތުރުފުޅާއި ގުޅިގެންނެވެ. ރައީސް ނަޝީދުގެ މިބައްދަލުވުމާއި ގުޅިގެން ރައީސް ނަޝީދަށް ތާއީދުކުރާ އެމްޑީޕީގެ ގިނަ ބައެއްގެ ތާއީދާއި އިޚްތިރާމު ވަނީ ޤާސިމްއަށް ލިބިވަޑަިއގެންފައެވެ. ނަމަވެސް މިއަދު ފައްޔާޟާއި ޤާސިމް ބައްދަލުކުރުމުން ނަޝީދަށް ތާއީދު ކުރާ ބޭފުޅުންނަށް އެކަން ކަމަކު ނުދިޔައެވެ.
ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބުގައި މިނިސްޓަރ ފައްޔާޟުގެ ޓީމުން މިއަދު ވަނީ އދ.މާމިގިއްޔަށް ގޮސްފައެވެ. މިދަތުރުގައި އެޓީމުން ވަނީ ޤާސިމްވެސް ރަށުގައި އުޅުއްވާތީ ޤާސިމްއާއިވެސް ބައްދަލު ކޮށްފައެވެ. މިފޮޓޯ ސޯޝަލް މީޑިއާގައި މިއަދު ވަރަށް ބޮޑަށް ވަނީ ދައުރުވެފައެވެ. ޚާއްސަކޮށް އިންތިއަށް ތާއީދު ކުރާ ބޭފުޅުން ގެންދަވަނީ މިފޮޓޯ ދައުރުކޮށް، މިއީ އެހެން ޕާޓީތަކުގެ ނުފޫޒު އެމްޑީޕީ އިންތިޚާބުގައި އޮތްކަން ހާމަވާ ކަމެއްކަމަށް ބުނަމުންނެވެ.
އެމްޑީޕީގެ ޗެއާޕާސަން އިންތިޚާބު މިމަހުގެ 14 ވަނަ ދުވަހު ބޭއްވުމަށް ހަމަޖެހިފައިވާއިރު، މިއިންތިޚާބުގައި އިކޮނޮމިކް މިނިސްޓަރ ފައްޔާޟު ސަރުކާރުގެ ނުފޫޒާއި ބާރުގެ ބޭނުން ކުރާކަމަށް އިންތިގެ ޓީމުން ދަނީ ތުހުމަތު ކުރަމުންނެވެ. އަދި ކަން ބެލުމަށް އެމްޑީޕީގެ ކަމާއިބެހޭ ކޮމެޓީއަށް ހުށަހެޅުުން ނިންމާފައިވަނީ، އިންތިޚާބަށް ނުފޫޒު ފޯރުވާކަމަށެވެ.
ނަމަވެސް ފައްޔާޟުގެ ޓީމުން ވަނީ މިއީ ކަނޑައެޅިގެން ދޮގުވާހަކަތަކެއްކަމަށް ބުނެފައެވެ. މިއިންތިޚާބުގެ ވާދަވެރިކަން ބޮޑުވެފައިވަނީ މިއީ ކުރިއަށް އޮތް ރިޔާސީ އިންތިޚާބުގައި އެމްޑީޕީން ނެރޭނެ ކެނޑިޑޭޓެއްވެސް ސާފުވާނެ އިންތިޚާބަކަށް ވުމުންނެވެ.
