އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި އެމްޑީޕީގެ ރިޔާސީ ޕްރައިމަރީ ކާމިޔާބުކޮށް، ރައީސްކަމަށް އާދެވޭނެ ކަމުގެ އުންމީދު ބޮޑުކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވެފައިވަނީ އެމަނިކުފާނު ރިޔާސީ އިންތިޚާބުގައި ވާދަކުރައްވާނެކަމަށާއި، އަދި އެމްޑީޕީގެ ޕްރައިމަރީގައި ވާދަ ކުރައްވާނެކަން އެމަނިކުފާނުގެ އާއިލީ ބޭފުޅެއްކަމަށްވާ، އަދި މަޖިލީހުގެ ނައިބް ރައީސް އީވާ އިއުލާން ކުރައްވާފައި ވަނިކޮށެވެ.

އިންޑިއާގެ ޓީވީ ޗެނަލެއް ކަމަށްވާ "ވިއޮން" އަށް ދެއްވި އިންޓަވިއުއެއްގައި ނަޝީދު ވިދާޅުވީ، ރިޔާސީ އިންތިހާބަށް އެމްޑީޕީގެ ޕްރައިމަރީގައި ވާދަކުރައްވާނެ ކަމަށް އަބަދުވެސް ވިދާޅުވަމުންދާ ކަމަށެވެ. އެގޮތުން ރިޔާސީ އިންތިޚާބަށް ނުކުންނަވާނެ ކެންޑިޑޭޓެއް ކަނޑައެޅުމަށް ޕްރައިމަރީއެއް އޮންނަ ކަން ފާހަގަކުރެއްވިއެވެ.

ނަޝީދު ވިދާޅުވި ގޮތުގައި އެމްޑީޕީގެ ތެރެއިން ރިޔާސީ ކެންޑިޑޭޓަކު ކަނޑައެޅުމުގެ އިހްތިޔާރު ޕާޓީގެ މެމްބަރުންނަށް ލިބެއެވެ. އަދި ރިޔާސީ ކެންޑިޑޭޓަކު ކަނޑައެޅުމަށް އެމްޑީޕީ ތެރޭގައި ބާއްވާ އިންތިހާބުގައި ކުރިމަތިލައްވާނެ ކަމުގެ ޔަގީން ކަން ވެސް އެމަނިކުފާނު ވަނީ ދެއްވައިފައެވެ.

ޕްރައިމަރީގައި އަންނަ އަހަރު ވާދަކުރައްވާނެކަމަށް އަޅުގަނޑު އަބަދުވެސް މިދަނީ ދަންނަވަމުން. ވާދަކޮށް ކާމިޔާބު ވާނެ ކަމުގެ އުންމީދު އެބަައޮތް. ޕާޓީ ބޭނުންވާނަމަ އަޅުގަނޑު ކުރިމަތިލާނަން. ޕާޓީއަށް ފައިދާހުރި ކޮންމެ ކަމެއް އަޅުގަނޑު ކުރާނަން.

– ނަޝީދު ވިދާޅުވިއެވެ.

އެމްޑީޕީގެ ޗެއަޕާސަން އިންތިހާބަކީ ރައީސް ނަޝީދާއި ގުޅުމެއްް ނެތް އިންތިހާބެއް ކަމަށް ގަބޫލުކުރުމަކީ "ވަހުމެއް"ކަން ފާހަގަކުރައްވާ އީވާ ވިދާޅުވެފައިވަނީ، 2023ވަނަ އަހަރުވެސް ބޭނުންވަނީ އެމްޑީޕީގެ ވެރިކަމެއް ރާއްޖޭގައި ބާއްވަން ކަމަށާއި، އެ އިންތިހާބުގައި ރަައީސް ނަޝީދު ކުރިމަތިލައްވާނެ ކަމަށެވެ. އިންތިޚާބުގައި ވާދަކުރެއްވުމާ ގުޅޭ ގޮތުން މީގެ ކުރިން ނަޝީދާ ސުވާލު ކުރުމުން އެމަނިކުފާނު ވިދާޅުވެފައި ވަނީ 2023 ވަނަ އަހަރު ރާއްޖޭގައި ރިޔާސީ އިންތިޚާބެއް ނޯންނާނެ ކަމަށެވެ. އޭގެ ބަދަލުގައި ރާއްޖޭގައި އޮންނާނީ ބޮޑުވަޒީރަކު އިންތިޚާބު ކުރުމަށް އާއްމު އިންތިޚާބެއް ކަމަށް ނަޝީދު ވިދާޅުވެފައި ވެއެވެ.

ހަމަ މިއާއެކު ވަނީ ރައީސް ޞާލިހާއި ވާދަ ނުކުރައްވާނެކަމަށްވެސް ނަޝީދު ވަނީ ވިދާޅުވެފައެވެ. ނަޝީދު ވިދާޅުވެފައިވަނީ ރައީސް ޞާލިހާއި ވާދަ ކުރައްވަން ޖެހިއްޖެނަމަ އެއިންތިޚާބެއްގައި ވާދަ ނުކުރައްވާނެކަމަށް ވިދާޅުވެފައެވެ. ނަމަވެސް މިހާރު އެމްޑީޕީގެ އެތެރޭގެ ކަންކަން ހިނގަމުންދާގޮތުން ރައީސް ނަޝީދު އެމްޑީޕީގެ ރިޔާސީ ޓިކެޓް ރައީސް ޞާލިހަށް ދޭނެކަމަށް ނުބެލެއެވެ.

އަންނަ މަހުގެ 14 ވަނަ ދުވަހު ބާއްވާ އެމްޑީޕީގެ ޗެއާޕާސަން އިންތިޚާބަކީ އެމްޑީޕީގެ ރިޔާސީ ޓިކެޓަށް ވާނެ ގޮތެއްވެސް ސާފުވާނެ އިންތިޚާބެއްކަމަށް ގިނަ ބަޔަކު ދެކެއެވެ.