ރާއްޖޭގެ ޚާރިޖީ ސިޔާސަތުގައި އިސްކަންދޭނީ އިންޑިއާއަށް ކަމަށާއި "ބިން ފޭރުމަށް" ޗައިނާއަށް ޖާގައެއް ނެތްކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އިންޑިއާގެ ނިއުދިއްލީގައި އޮންނަ ހަތް ވަނަ ރައިސިނާ ޑައިލޮގްގައި ބައިވެރިވެވަޑައިގަތުމަށް ނަޝީދު މިވަގުތު ހުންނެވީ އިންޑިއާގައެވެ. ރައިސިނާ ޑައިލޮގްއަކީ އިންޑިއާގެ އެކްސްޓާނަލް އެފެއާޒް މިނިސްޓްރީއާއި އޮގްޒާވާ ރިސާޗް ފައުންޑޭޝަން ގުޅިގެން ކޮންމެ އަހަރަކު ބާއްވާ ބައިނަލްއަގުވާމީ ކޮންފަރެންސްއެކެވެ.

އިންޑިއާގެ ފޮރިން ސެކްރެޓަރީ ޝިޔަމް ސަރަން ދެއްވި ލެކްޗަރެއްގައި ބައިވެރިވެވަޑައިގެން ނަޝީދު ވަނީ ޗައިނާގެ "ބޮލުގައި" ބޮޑެތި ތުހުމަތުތަކެއް އަޅުވައިފައެވެ. އެގޮތުން ޗައިނާ އިން އުޅެނީ ރާއްޖެ އަށް "ހުދުމުހުތާރު ވެރިކަމެއް" ގެނައުމަށް ކަމަށް ވެސް ތުހުމަތު ކުރައްވާފައިވެއެވެ.

ނަޝީދު ވިދާޅުވީ ދިވެހިން ބޭނުން ވަނީ އިންޑިއާއާއެކު ގުޅުން އިތުރަށް ވަރުގަދަ ކުރުމަށް ކަމަށެވެ. ނަޝީދު ވަނީ ރާއްޖެއާ ޗައިނާއާ ދެމެދު އޮތް ގުޅުމަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ޗައިނާގެ މަޝްރޫއުތަކަކީ "ދަރަނީގެ ދަންތުރަ"ތަކެއް ކަމަށާއި، އޭގެ މަގުސަދަކީ "ބިން ފޭރުން"ކަމަށް ވިދާޅުވާ ވާހަކަ ތަކުރާރު ކުރެއްވިއެވެ.

ބިން ފޭރުމަށް ފަހިވާ ގޮތަށް ހެދި ގާނޫނުތައް އަޅުގަނޑުމެން އުވާލައިފިން. އެކަމަކުވެސް ހަގީގަތް އަދިވެސް ބަދަލެއް ނުވޭ. ޗައިނާގެ ސަރުކާރުގެ ކުންފުނިތަކަށް ބޮޑެތި އުމްރާނީ މަޝްރޫއުތައް ދީފައި އެބަހުރި.

– ނަޝީދު ވިދާޅުވިއެވެ.

ނަޝީދު ވިދާޅުވީ އެ ޕްރޮޖެކްޓްތަކުގެ އަގު އާދަޔާޚިލާފަށް ބޮޑު ކަމަށާއި، އެހެން ހަދަނީ ގަސްދުގައި ދަރަނިވެރި ކުރުވަން ކަމަށެވެ. މީގެ އިތުރުން އެ މަނިކުފާނު ވަނީ ޗައިނާއިން ބޭނުންވަނީ ރާއްޖޭގައި ޑިކްޓޭޓާޝިޕެއް ގާއިމުކުރުމަށް ކަމަށް ވެސް ތުހުމަތު ކުރައްވާފައެވެ.

ރައީސް ނަޝީދު މި މޭރުމުން ވާހަކަ ދައްކަވާފައި މިވަނީ އިދިކޮޅު ފަރާތްތަކުން އިސްވެ ހިންގާ "އިންޑިއާ އައުޓް" ކެމްޕޭނުގެ ފޯރި ގަދަވެފައިވާ ދަނޑިވަޅެއްގައެވެ. މީގެ ހަފުތާއެއް ކުރިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އެ ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ނިންމާ ގަރާރެއް ނެރުއްވާފައެވެ.

އެކިއެކި ޝިއާރުގެ ދަށުން ވަކިވަކި ގައުމުތަކާ މެދު ނަފްރަތު އުފެއްދުމަށް ރާވައިގެން ހިންގާ ހަރަކާތްތައް ހުއްޓުވުން، މި ނަމުގައި ރައީސް ނެރުއްވި ގަރާރަކީ ގާނޫނާ ޚިލާފު ގަރާރެއް ކަމަށް ބުނެ އިދިކޮޅު ފަރާތްތަކުން ވަނީ މިހާރު އެ މައްސަލަ ސިވިލް ކޯޓަށް ހުށަހަޅާފައެވެ.

ނަޝީދު ވިދާޅުވި ގޮތުގައި ރާއްޖެ އިން އަބަދު ވެސް އިސް ކުރާނީ "އިންޑިއާ ފަސްޓް ޕޮލިސީ" ކަމަށެވެ. އަދި ޗައިނާ އިން ރާވަމުންދާ ރޭވުންތައް ހާސިލްވިޔަ ނުދެއްވާނެ ކަމަށް އެމަނިކުފާނު ވިދާޅުވިއެވެ.