އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ރަމަޟާން މަހުގެ އިނާޔަތް ދިނުމަށްޓަކައި، ލާމަރުކަޒީ ޤާނޫނަށް އިސްލާހު ހުށަހެޅުމަށް ލޯކަލް ގަވަރުމެންޓް އޮތޯރިޓީން ނިންމައިފިއެވެ.
އެލްޖީއޭއިން މިގޮތަށް ނިންމާފައިވަނީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ރަމަޟާން މަހުގެ އިނާޔަތު ފައިސާ ނުދޭތީ އެކަން ހައްލު ކުރުމަށް ކ. އަތޮޅު ކައުންސިލްގެ ރައީސް މުހައްމަދު ނިމާލް އެލްޖީއޭއަށް ހުށަހެޅި މައްސަލާގައި ބަހުސް ކުރުމަށް ފަހުއެވެ.
ނިމާލް ވަނީ މިމައްސަލާގައި ބޯޑުން ނިންމި ނިންމުމަށް މަރުހަބާ ވިދާޅުވެފައެވެ. އަދި އަންހެނުންގެ ކޮމެޓީތަކުގެ މެމްބަރުންނަށް ލިބެންޖެހޭ ހައްގުތައް ކަށަވަރު ކޮށް ދިނުމުގައި ކުރަންޖެހުނު ކޮންމެ ކަމެއް ކުރައްވާނެކަމަށް ނިމާލް ވަނީ ވިދާޅުވެފައެެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ މެމްބަރުންނަށް ރަމަޟާން މަހުގެ އިނާޔަތު ފައިސާ ހޯދައި ދިނުމަށް އަޅުގަނޑު ހުށަހެޅި މައްސަލަ މިއަދު ބޯޑުގައި އެޖެންޑާ ކުރެވި، މަޝްވަރާ ކުރެވުނު. މިކަމުގައި ޓަކި ޖެހި ފުރަތަމަ ދޮރު ހުޅުވިގެން މިދިޔައީ އަންހެނުންގެ ކޮމެޓީތަކަށް އުންމީދު ގެނެދީފަ. އެހައްޤު ހޯދައި ދިނުމަށް އަޅުގަނޑު ހުންނާނަން.
– ނިމާލް ވިދާޅުވިއެވެ.
މިއަދު ބޭއްވި ލޯކަލް ގަވަރުމެންޓް އޮތޯރިޓީގެ ބޯޑު ބައްދަލުވުމުގައި ނިމާލް ހުށަހެޅި މިމައްސަލާގައި ނިންމާފައިވަނީ އަންހެނުންގެ ކޮމެޓީތަކުގެ މެމްބަރުންނަށް ރަމަޟާން މަހުގެ އިނާޔަތް ދިނުމަށްޓަކައި، ލާމަރުކަޒީ ޤާނޫނަށް އިސްލާހު ގެނައުމަށް ހުށަހެޅުމަށެވެ. ޤާނޫނަށް އިސްލާހު ގެންނަން ފާސްވީ ބައްދަލުވުމުގައި ބައިވެރިވި މެމްބަރުންގެ އިއްތިފާގުންނެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުން ގެންނެވި އިސްލާހާއެކު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މަސްޢޫލިއްޔަތުތައް ވަނީ ބަޔާންކޮށްފައެވެ. އެގޮތުން އެ ކޮމިޓީގެ މަސްޢޫލިއްޔަތުތަކުގެ ތެރޭގައި, ރަށުގެ ނުވަތަ ސިޓީގެ ތަރައްޤީގެ ކަންކަމުގައާއި ކައުންސިލުން ދެމުންގެންދާ ރަށްވެހިކަމުގެ ޚިދުމަތްތަކާ ބެހޭގޮތުން ކައުންސިލަށް ލަފާ ދިނުމާއި, އިންސާނީ ޙައްޤުތައް ރައްކާތެރިކުރުމަށް މަސައްކަތްކުރުމާއި, ރަށުގެ ނުވަތަ ސިޓީގައި ދީނީ ހޭލުންތެރިކަން އިތުރުކުރުމަށް މަސައްކަތްކުރުން ހިމެނެއެވެ.
