ފެނަކަ އެމްޑީ ސައީދުއަކީ ފާޓު ފުޅާކޮށް އުޅުއްވާ އެމްޑީއެއްކަމަށާއި، މަގާމުގެ ޝަރުތުތައްވެސް ފުރިހަމަ ނުވަނީސް އެމްޑީކަމަށް ވަޑައިގެންފައިވާ ބޭފުޅެއްގެ މަގާމް މުޅި އުމުރުރަށް ދެމި އޮންނާނެތޯ ވިދާޅުވެ، ތިނަދޫ އުތުރު ދާއިރާގެ ކުރީގެ މެމްބަރު ސައުދުﷲ ހިލްމީ، ފެނަކަ ކޯޕަރޭޝަންގެ އެމްޑީ އަހުމަދު ސައީދަށް ބަހުގެ ހަމަލާތަކެއް ރައްދު ކުރައްވައިފިއެވެ.
ސައުދުﷲ ހިލްމީ ފެނަކަ އެމްޑީ އަހުމަދު ސައީދަށް ބަހުގެ ހަމަލާތަކެއް ރައްދު ކުރައްވާފައިވަނީ، ޔޫތު މިނިސްޓަރު އަހުމަދު މަހުލޫފް ފެނަކައަށް ކުރެއްވި ޒިޔާރަތަކާއި ގުޅޭގޮތުން އޭނާގެ ފޭސްބުކްގައި ކުރެއްވި ކޮމެންޓަކަށް މަހުލޫފް ދެއްވި ޖަވާބަށް ރައްދު ދެއްވަމުންނެވެ. ސައުތު އޭޝިއަން ޓީޓީ މުބާރާތަށް ކުންފުނިތަކުގެ ބައިވެރިވުން އިތުރު ކުރުމަށް، މަހުލޫފު ކުންފުނިތަކުގެ އެމްޑީންނާއެކީ ބާއްވަމުން ގެންދަވާ ބައްދަލުވުންތަކުގެ ތެރެއިން، ފެނަކަ އެމްޑީ ސައިދާއެކީ އޮތް ބައްދަލުވުމުގެ ފޮޓޯއަކަށް ކޮމެންޓް ކުރައްވަމުން ސައުދުﷲ ވިދާޅުވެފައިވަނީ، އެ ބައްދަލުވުމުގައި މިނިސްޓަރަކީ ކާކުކަން ސާފު ނުވާކަމުގައެވެ.
ސައުދު މި ކޮމެންޓަށް ޖަވާބު ދެއްވަމުން މިނިސްޓަރު މަހުލޫފު ވިދާޅުވެފައިވަނީ، ވަޒީރުކަމަކީ މާދަމާވެސް ގެއްލިދާނެ މަގާމެއް ކަމަށާއި، އެހެންކަމުން މާބޮޑަށް ވަޒީރުވެގެން އުޅުމަކީ ރަގަޅުކަމެއް ނޫން ކަމުގައެވެ. އަދި ފެނަކައަށް ވަޑައިގެންނެވީ ސައުތު އޭޝިއަން ޓީޓީ މުބާރާތަށް ކުންފުނިތަކުގެ ބައިވެރިވުން އިތުރު ކުރުމަށް ކަމަށެވެ. އަދި އެކަމަށް ފެނަކައިން ދޭ އެއްބާރުލުމަށް ޝުކުރު އަދާކުރާ ކަމުގައެވެ.
ކްރައިޓީރިއާ ބަދަލު ކޮށްގެން ހޯދާ އެމްޑީ ކަމަކީ، މުޅި އުމުރަށް އޮންނާނެ ކަމެއް؟ އޭނަ މީހުންނަށް އަނިޔާ ދޭން އެމަގާމުގައި އުމުރަށް ހުންނާނެ؟
އަހުމަދު ސައީދު ފެނަކައިގެ އެމްޑީކަމަށް އައްޔަން ކުރައްވާފައިވަނީ އެމަގާމަށް ޝަރުތު ފުރިހަމަ ނުވަނީސްކަމަށް އިޝާރާތް ކުރައްވަމުން ސައުދުﷲ ހިލްމީ ވިދާޅުވެފައި ވެއެވެ.
ފޭސްބުކް ޕޯސްޓުގައި، މަހުލޫފަށް ޖަވާބު ދެއްވަމުން ސައުދުﷲ ހިލްމީ ވިދާޅުވެފައި ވަނީ، މިނިސްޓަރު ކަންވެސް، ރައީސްކަންވެސް، ނައިބު ރައީސްކަންވެސް ﷲގެ މިންވަރުފުޅުން ލިބެންވީމާ ލިބޭނެކަން އޭނާއަށް އޮތީ ސަރުކާރުގެ އިސްބޭފުޅުންގެ ކިބައިން ވަރަށް ރަގަޅަށް އެގިފައި ކަމުގައެވެ. އަދި އެކަންކަން ލިބުނީމަ މާޒީ ހަނދާން ނެތޭކަންވެސް އޭނާއަށް އިގޭނޭކަން މަހުލޫފަށް ރަގަޅަށް އެގިވަޑައިގަންނަވާނޭ ކަމަށްވެސް ސައުދުﷲ ހިލްމީގެ ފޭސުބުކް ޕޯސްޓުގައި އޭނާ ލިޔުއްވާފައި ވެއެވެ.
ސައުދުﷲ ހިލްމީއަކީ، ރައީސް ޔާމިންގެ ސަރުކާރުގައި، ގޮޑި ގެއްލުނުކަމަށް ކަނޑައެޅި 12 މެމްބަރުންގެ ތެރޭގައި ހިމެނިވަޑައިގެންނެވި މެމްބަރެކެވެ. އަދި އޭރު، އެސަރުކާރުން އޭނާގެ ވިޔަފާރި ކުންފުޏަށް އެވާޑްކޮށްފައިހުރި ގިނަ ޕްރޮޖެކްޓަތައްވެސް ވަކިކޮށްފައި ވެއެވެ. އަދި ޖެހިގެން އައި ރިޔާސީ އިންތިޚާބުގައި ސައުދުﷲ ހިލްމީ މަސައްކަތް ކުރައްވާފައިވަނީ ރައީސް އިބުރާހިމް މުހައްމަދު ސާލިހު ތާއީދު ކުރައްވައިގެންނެވެ.
