ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީންގެ ނުސީދާ ރައްދެއް އެމްޑީޕީގެ ރައީސް މުހައްމަދު ނަޝީދަށް ދެއްވައިފިއެވެ.

އަކްރަމް ކަމާލުއްދީން އެމްޑީޕީ މާލެ ދާއިރާގެ ރައީސްކަމަށް ވާދަކުރުމުން، އޭނާ އިންތިޚާބު ވިޔަ ނުދިނުމަށް އެންމެ ބޮޑަށް މަސައްކަތް ކުރެއްވި އެއް ބޭފުޅަކީ ރައީސް ނަޝީދެވެ. ރައީސް ނަޝީދު ވަނީ ރާއްޖޭގެ ވެރިކަމުގެ ނިޒާމު ބަދަލު ކުރުމަށް މީގެ ދުވަސްކޮޅެއް ކުރިން ވަރަށް ބޮޑަށް މަސައްކަތް ކޮށްފައެވެ. ނަމަވެސް ރައީސް ޞާލިހުވެސް އަދި މަޖިލީހުގެ އެއްބާލުންވެސް މިކަމުގައި ނަޝީދަށް ލިބޭ ގޮތެއް ނުވެއެވެ.

ބަރުލަމާނީގެ ކަންކަމަށްފަހު މިހާރު އެމްޑީޕީގެ އެތެރޭގެ އިންތިޚާބުގައި ފައްޔާޟު ކަޓުވާލައި، އިމްތިޔާޒު ފަހުމީ ޗެއާޕާސަންގެ މަޤާމަށް ގެނައުމަށް ރައީސް ނަޝީދު ގެންދަވަނީ މަސައްކަތް ކުރައްވަމުންނެވެ. އަކްރަމް ވަނީ ރައީސް ނަޝީދު ކުރައްވާ މަސައްކަތްތަކަށް އިޝާރާތް ކުރައްވާ މިއަދު ނުސީދާ ރައްދެއް ދެއްވާފައެވެ. އަކްރަމް ވިދާޅުވީ ރާއްޖޭގެ ރައްޔިތުން ބަރު ލަމާނީ ބޭނުން ނުވާކަމަށެވެ. އެހެން ކަމުން ދެން އެހެން ކަމަކާއި އުޅުން މާ ރަނގަޅުވާނެކަމަށް އަކްރަމް ވަނީ ވިދާޅުވެފައެވެ

މި ރާއްޖޭގެ ރައްޔިތުން "ބަރު" ބޭނުމެއް ނުވޭ. ވީމާ އެހެން ކަމަކާ ދެން އުޅުނިޔާ މާ ރަނގަޅުވާނެ.

– އަކްރަމް ކަމާލުއްދީން ނުސީދާކޮށް ރައީސް ނަޝީދަށް ދެއްވި ރައްދެއްގައި ވިދާޅުވިއެވެ.

މި ރާއްޖޭގެ ރައްޔިތުން ބަރު ބޭނުމެއް ނުވޭ. ވީމާ އެހެން ކަމަކާ ދެން އުޅުނިޔާ މާ ރަނގަޅުވާނެ.

— Akram Kamaludeen (@Akramkdeen) April 24, 2022

އަކްރަމް ވަނީ މީގެ ކުރިންވެސް އެކި ފަހަރު މަތީން ރައީސް ނަޝީދަށް ބަހުގެ ހަމަލާތައް ދެއްވާފައެވެ. މީގެ ކުރިންވެސް ސަރުކާރުގެ އެކި ކަންކަމަށް ނަޝީދު ފާޑުވިދާޅުވެ ވާހަކަ ދައްކަވަމުން ގެންދެވި ދުވަސް ވަރެއްގައި އަކްރަމް ވަނީ އުތުރު ކޮރެއާގެ ރައީސް އެޤައުމު ހިންގާގޮތަށް ޕާޓީއެއް ނުހިންގޭނެކަމަށް ވިދާޅުވެފައެވެ.

އަކްރަމް މިހެން ވިދާޅުވެފައިވާއިރު، އުތުރު ކޮރެއާގެ ޒައީމް ކިމް ޖޮން އުން އަކީ ދުނިޔޭގެ އެންމެ ޚުދުމުހުތާރުކޮށް ވެރިކަން ކުރާ ލީޑަރުގެ ގޮތުގެ ދުނިޔެ ސިފަކުރައްވާ ބޭފުޅެކެވެ. އުތުރު ކޮރެއާއާއި އަޅާކިއުއްވާ އަކްރަމް ފާޑުވިދާޅުވިއިރު، އެމްޑީޕީގެ ތެރޭގައި ރައީސް ނަޝީދު ގެންގުޅުއްވާ ބައެއް ސިޔާސަތުތަކަށް އެޕާޓިގެ ބައެއް މެންބަރުން ފާޑު ވިދާޅުވަމުން ގެންދެއެވެ.