އެމްޑީޕީ ރައީސް އެމްޑީޕީ ސަރުކާރަށް ބަވާ ވަރަށްވުރެ މިސަރުކާރު މާކާމިޔާބު ކަމުގައި ރައްޔިތުންގެ މަޖިލީހުގެ ކޮމަންޑޫ ދާއިރާގެ މެންބަރު މުހައްމަދު ރާޝިދު ވިދާޅުވެއްޖެއެވެ.

ރާޝިދު މިހެން ވިދާޅުވީ އެމްޑީޕީއަށް މިހާރު އޮތް އެންމެ ރަނގަޅު ގޮތަކީ ވެރިކަމުގެ ކޯލިޝަނުން ވަކިވެ، ފެތެމުންދާ ސަރުކާރާއި ފެޔަށް ޖެހުން ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެ އެމްޑީޕީ ވަޓްސްއަޕް ގްރޫޕްގައި ދެއްކެވި ވާހަތަކާއި ގުޅިގެންނެވެ. ނަޝީދު ވިދާޅުވީ، މިހާރު އޮތް ވެރިކަމަކީ އެމްޑީޕީގެ އެކަނި ވެރިކަމެއް ނޫންކަމަށެވެ. މިސަރުކަރަށް އެމްޑީޕީގެ އާންމު މެމްބަރުން ބޭނުންވި ކަންކަން ހާސިލް ނުކޮށް ދެވުނުއިރު، ފެތެމުންދާ ސަރުކާރެއްގައި ތިބުމުގެ މާނައެއް ނެތްކަމަށް ރައީސް ނަޝީދު ވިދާޅުވިއެވެ.

ނަޝީދުގެ ވާހަތަކަށް ރައްދު ދެއްވަމުން މިއަހަރު މަޖިލީހަށް އިންތިޚާބުވެ ވަޑައިގެންނެވި ރާޝިދު ވިދާޅުވީ މިއީ ކުރިއަށް އޮތް ރިޔާސީ އިންތިޚާބުގައި އެމްޑީޕީ ބަލި ކުރުމަށް އިދިކޮޅުން އުކާނެ ދުނި ދަނޑިތަކާއި، ކުޅޭނެ ކާޑުތައް ތައްޔާރުކޮށް، ލިޔެދީ ހިންގާ ބޮޑު ޖަރީމާއެއް ކަމަށެވެ. އެމްޑީޕީގެ ރައީސަށް ނަޝީދު ހުންނަވައިގެން ސަރުކާރާއި ދިމާލަށް މިފަދަ ތުހުމަތު ކުރާ ވަރަށްވުރެ ސަރުކާރު މާކާމިޔާބު ކަމަށް ރާޝިދު ވިދާޅުވިއެވެ.

މިފެންނަނީ 2023 ގައި އެމްޑީޕީ ބަލި ކުރުމަށް އިދިކޮޅުން އުކާނެ ދުނި ދަނޑިތަކާއި، ކުޅޭނެ ކާޑުތައް ތައްޔާރުކޮށް، ލިޔެދީ ހިންގާ ބޮޑު ޖަރީމާއެއް! މިފަދަ އަމަލުތައް ވަގުތުން ހުއްޓާލާ! އެމްޑީޕީ ރައީސް އެމްޑީޕީ ސަރުކާރަށް ބަވާ ވަރަށްވުރެ މިސަރުކާރު މާ ކާމިޔާބު.

– ރާޝިދު ވިދާޅުވިއެވެ.

ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބާއި ގުޅިގެން ރައީސް ނަޝީދާއި، ރައީސް ޞާލިހަށް ތާއީދު ކުރާ މެމްބަރުންގެ މެދުގައި ދަނީ ބަހުގެ ހޫނު ހަމަލާތައް ބަދަލު ކުރެވެމުންނެވެ. މިއިންތިޚާބަކީ މިނިސްޓަރ ފައްޔާޟާއި، މެމްބަރު އިންތިޔާޒުގެ މެދުގައި އޮތް އިންތިޚާބަކަށް ވީނަމަވެސް މިއީ އެމްޑީޕީގެ ރިޔާސީ ޓިކެޓާއިމެދު ރައީސް ނަޝީދާއި، ރައީސް ޞާލިހު ކުރައްވާ ހަނގުރާމައިގެ ފެށުންކަމަސް ގިނަ ބަޔަކު ދެކެއެވެ.

މިއިންތިޚާބުގެ މަންޒަރުތައް މިހާރު ފެންނަ ގޮތުން އިންތިޚާބު ކާމިޔާބު ކުރާނެކަމަށް ބެލެވެނީ މިނިސްޓަރ ފައްޔާޟު އިސްމާއިލެވެ. އިންތިޚާބުގެ ވާދަވެރިކަން ބޮޑުވާ ވަރަކަށް އެމްޑީޕީގެ ރައީސް ނަޝީދު ގެންދަވަނީ ސަރުކާރަށް އެކި ތުހުމަތުކުރަމުންނެވެ. އެމްޑީޕީގެ ގައުމީ މަޖިލީހުގެ މެންބަރުންނަށް ހާއްސަ ވަޓްސްއެޕް ގުރޫޕަށް ފޮނުވި މެސެޖެއްގައި ރައީސް ނަޝީދު ވިދާޅުވެފައިވަނީ އެމަނިކުފާނުގެ ނަޒަރުގައި އެމްޑީޕީއަށް ރައްޔިތުންގެ ވޯޓްގެ 50 ޕަސެންޓް ހޯދުން ވަރަށް އުނދަގޫ ވާނެ ކަމަށެވެ. އެ މިންވަރަށް ތާއީދު ހޯދޭވަރަށް ވުރެ މާ ގިނަ ގޯސްތައް ހަދާފައިވާ ކަމަށް ވިދާޅުވިއެވެ. އަދި އެ ގޯސްތައް އެއް ބަޔަކު ގަބޫލު ނުކުރާ ކަމަށްވެސް ވިދާޅުވިއެވެ.