އިދިކޮޅު ފަރާތްތަކުން ރާއްޖޭގައި ހިންގަމުންދާ އިންޑިއާ އައުޓް ހަރަކާތް ދެން ކުރިއަށް ނުގެންދެވޭނެ ކަމުގައި ރައީސްއޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.

އޭނާ މިހެން ވިދާޅުވީ އިންޑިއާ އައުޓް ހަރަކާތަކީ ޤއުމީ ސަލާމަތަށް ނުރައްކާއޮތް ހަރަކާތެއްކަމަށް ޤައުމީ ސަލާމާތާބެހޭ މަޖިލީހުން ނިންމުމާއި ގުޅިގެންނެވެ. އެކަން ހުއްޓުވުމަށް ރައިސްގެ ގަރާރަކުން އިދާރާތަކަށް އެންގި އެންގުމާއި ގުޅިގެން ދައުލަތުގެ މީޑިއާގައި ވާހަކަފުޅު ދައްކަވަމުން އަލީ ޒާހިރު ވިދާލުވީ، މިފަދަ ފިޔަވަޅެއް އަޅަންޖެހުނީ ޚިޔާލް ފާޅު ކުރުމާއި، އެއްވެ އުޅުމުގެ މިނިވަންކަމަށް ހުރަސް އެޅުމަށް ނޫންކަމަށް އޭނާ ވިދާޅުވިއެވެ. މިކަމުގެ ސަބަބުން ދޭދޭ ޤައުމުތަކާއި، ޚާއްސަކޮށް އަވަށްޓެރި އިންޑިއާއާއި އޮތް ގުޅުމަށް ބޮޑެތި އަސަރުތަކެއް ކުރާނެ ކަމެއްކަމަށާއި މި ހަރަކާތަކީ އަޑީގައި ނުރައްކާތެރި އެޖެންޑާއެއް އޮތް ހަރަކާތެއްކަމަށް ގިނަ މައުލޫމާތުތަކެއް ލިބިފައިވާކަމަށް އަލީ ޒާހިރު ވިދާޅުވިއެވެ.

ރާއްޖެއަކީ ބައިނަލް އަޤުވާމީ ގިނަ މުއާހަދާތަކާއި، އެއްބަސްވުންތަކުގައި ސޮއިކޮށް ޑިމޮކްރަޓިކް ހަމަތަކުގެ މަތީން އުޅޭ ޤައުމެއްކަން އަލީ ޒާހިރު ފާހަގަކުރެއްވިއެވެ. އެއްބަސްވުންތަކުގައި ރާއްޖެއަށް އަންނަ ބޭރުގެ އެކި ޤައުމުތަކުގެ މީހުންނަށް އިޚުތިރާމު ކުރުމާއި، އެމީހުންނަށް ދޭންޖެހޭ ފުރިހަމަ ރައްކާތެރިކަން ކަށަވަރު ކޮށް ދިނުމަކީ ރާއްޖެ ބައިވެރިވެފައިވާ މުއާހަދާތަކާއި، ރާއްޖޭގައި ހެދިފައިވާ ޤާނޫނުތަކުންވެސް ކަށަވަރު ކޮށްދޭ ހައްގެއްކަމަށެވެ.

އަވަށްޓެރި އިންޑިއާ ކަމުގައި ވީނަމަވެސް، އެހެން ޤައުމެއް ކަމުގައި ވީނަމަވެސް ވަކި ޤައުމަކާއި ވަކި ނަސްލަކާއި، މެދުގައި އެބާވަތުގެ ނަފްތަރެއް އުފައްދައި، މީސްމީހުންގެ ފުރާނައަށާއި، އަދި ދިރިއުޅުމަށް އޭގައިން ދަރިވާ ހިސާބަށް ކަންކަން ގެންދިއުމަކީ އެއީކީ ބަލައިގަނެވޭނެ ކަމެއް ނޫންކަން އަދި ފަރާތްތަކަށް މިފުރުސަތު ނުދެއްވާނެކަން މިއަދު ޔަގީން ވެގެން މިދިޔައީ.

– އަލީ ޒާހިރު ވިދާޅުވިއެވެ.

އަލީ ޒާހިރު ވިދާޅުވީ ސަރުކާރުން މިކަމުގައި ގެންގުޅުއްވާ ސިޔާސަތުތަކާއި، ރައީސްގެ ނިންމެވުމާއި ގުޅިގެން ޤައުމުތަކުން މަރުހަބާ ކިޔާނެކަމަށެވެ. ޤަރާރުގައިވެސް ޔަގީންކަން ދެއްވާފައިވަނީ އެއްވެ އުޅުމާއި ޚިޔާލްފާޅު ކުރުމުގެ މިނިވަންކަން ޤާނޫނުގެ ތެރެއިން އެންމެ ފުންމިނަށް ލިބޭނެ ގޮތަށް ކަމަށެވެ. މާލެ އަކީ ކޮންމެ ކޮންމެ ތަނެއްގައި މުޒާހަރާކޮށް އެއްވެ އުޅުން މަނާ ތަންތަން ކަނޑައަޅާފައިވާ ތަނަކަށް ވީނަމަވެސް، ސަރުކާރުން އެފުރުސަތު ދީފައިވާކަމަށެވެ. ނަމަވެސް ވަކި އެޖެންޑާއެއް ހާސިލް ކުރުމަށް ޤައުމުގެ އަމާންކަން ގެއްލޭ ހިސާބަށް ދިއުމުން އެފުރުސަތު ދެވެން ނޯންނާނެކަމަށް އަލީ ޒާހިރު ވިދާޅުވިއެވެ.

ވަކި ޝިއާރެއްގައި ވަކި ބެނާއެއްގެ ދަށުން ވަކި މަޤުސަދެއްގައި، ވަކި އެޖެންޑާއެއްގައި، ވަކި ކަމެއް ހާސިލް ކުރުމަށް އެކަން ރޭވިގެން ފެށި ހިސާބުން އެކަމަށް ހުއްޓުމެއް މިގެނައީ. އެއީ އަޅުގަނޑުމެން ބައިވެރިވެފައިވާ ބައިނަލް އަގުވާމީ މުއާހަދާތަކުގައިވާ ހަމަތަކާއި އުސޫލުތަކުގެ ތެރެއިން. މިކަން ބައިނަލް އަގުވާމީ މުޖުތަމައުން ބަލައި ގަންނާނެ. މީގެ ކުރިން މިކަމަށް ދޫދެވިފައިވާ މިންވަރަށް މިހިސާބުން މިމުމަކަށް މިއައީ.

– އަލީ ޒާހިރު ވިދާޅުވިއެވެ.

މިސަރުކާރުން ވެރިކަމާއި ހަވާލުވިފަހުން ރާއްޖެއިން ގެންގުޅޭ ހުރިހާ ޤައުމަކާއިވެސް ގުޅިގެން މަސައްކަތް ކުރުމުގެ ސިޔާސަތުގެ ދަށުން ބައިނަލް އަގުވާމީ މަސްރަހުގައި ރާއްޖެ ދަނީ ބޮޑެތި ކާމިޔާބީ ހޯދަމުންނެވެ. އެގޮތުން ބައިނަލް އަޤުވާމީ މުހިންމު މަޤާމުތަކާއި، ރަން ވަނަތަށް އެކި ދާއިރާތަކުން ރާއްޖެއަށް ލިބެމުންދާކަން އަލީ ޒާހިރު ވަނީ ފާހަގަކޮށްފައެވެ.