ސްޕެނިޝް ލީގުގައި ރޭ ކާޑިޒް އިން ބާސެލޯނާ ބަލިކޮށްފިއެވެ.
ބާސެލޯނާގެ އަމިއްލަ ދަނޑުގައި ރޭކުޅުނު މެޗު 1-0 އިން ކާމިޔާބު ކުރީ ކާޑިޒް އިންނެވެ. ބާސެލޯނާގެ ދަނޑުގައި ރޭ ކާޑިޒުން ޖެހި ހަމައެކަނި ގޯލު ކާމިޔާބުކުރީ މެޗުގެ 48 ވަނަ މިނިޓްގައި ލޫކަސް ޕެރޭޒްއެވެ. ބާސެލޯނާ އޭރިއާތެރެއިން އެ ޓީމުގެ ޑިފެންޑަރުންނާއި ގޯލްކީޕަރު ޓާ ސްޓެގެން ކައިރިން ލިބުނު ފުރުސަތެއްގައި ޕެރޭޒް ވަނީ ގޯލަށް ބޯޅަ ވައްދާލައިފައެވެ.
މެޗުގެ އިތުރު ވަގުތުގެ ފަހު މިނިޓް ނިމެންދެން ބާސެލޯނާ އިން ލަނޑެއް ޖެހޭތޯ މަސައްކަތް ކުރި ނަމަވެސް ކާމިޔާބެއްނުވިއެވެ. ބާސެލޯނާގެ އެރިކް ގާސިއާ އާއި ޕިއޭ އެމެރިކް އޮބާމަޔަން ޖެހި ބޯޅަތައް ކަޑިޒްގެ ކީޕަރު ޔެރެމިއަސް ލެޑެސްމާ ވަނީ މަތަކޮށްފައެވެ.
ސްޕެނިޝް ލީގުގައި ބާސެލޯނާ އިން ކުޅުނު 15 މެޗަށް ފަހު ފުރަތަމަ ފަހަރަށް ބަލިވިއިރު، ބާސެލޯނާ މި ވަގުތު ދެ ވަނައިގައި އޮތީ އެއް ވަނައިގައި އޮތް ރެއާލް މެޑްރިޑަށް ވުރެ 15 ޕޮއިންޓް ފަހަތުގައެވެ. ރެއާލަށް 32 މެޗުން 75 ޕޮއިންޓް ލިބިފައިވާއިރު، ބާސެލޯނާގެ އޮތީ 31 މެޗުން 60 ޕޮއިންޓެވެ. ތިން ވަނައިގައި އޮތް ސެވިއްޔާ އާއި ހަތަރެއްގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑަށް ވެސް ވަނީ 32 މެޗުން 60 ޕޮއިންޓް ލިބިފައެވެ.
ރެލިގޭޝަނުން ސަލާމަތްވާން މަސައްކަތް ކުރަމުން އަންނަ ކާޑިޒް މިރޭގެ ތިން ޕޮއިންޓާ އެކު އޮތީ ލީގުގެ 16 ވަނައިގައެވެ. އެއީ 32 މެޗުން 31 ޕޮއިންޓް ހޯދައިގެންނެވެ.
