އަޤުޞާ މިސްކިތުގެ ދިފާޢުގައި މުސްލިމު އުންމަތް ތެދުވަންޖެހޭ ކަމުގައި ދީނީ އިލްމުވެރިޔާ އަދި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޑރ.ޝަހީމް މިހެން ވިދާޅުވީ ފަލަސްތީންގެ ރައްޔިތުން ރޭގެ ފަތިސް ނަމާދު ގަޑީގައި އަލް އަގްސާ މިސްކިތުގައި ތިއްބާ އިސްރާއީލް ސިފައިން ވަދެ މިސްކިތަށް ބޮޑެތި ގެއްލުންތަކެއް ދީ މީހުންނަށް ހަމަލާ ދިނުމުން އެކަން ހަރުކަށި އިބާރާތުން ކުށްވެރި ކުރައްވައި ކުރެއްވި ޓުވީޓެއްގައެވެ.

ޑރ.ޝަހީމް ވިދާޅުވީ މި ހަރުކަށި، ލާއިންސާނީ އަމަލާއި ދެކޮޅަށް މުޅި އިސްމާލީ އުއްމަތް ތެދުވާން ޖެހޭކަމަށެވެ. އިޒްރާއިލްގެ މިއަމަލަކީ ބައިނަލްއަޤުވާމީ ޤާނޫނާއި މުޢާހަދާތަކާ ޚިލާފު އަމަލުތަކެއް ކަމަށާއި، މިކަމާއި ދެކޮޅަށް މުސްލިމް އުއްމަތް ތެދުވާންޖެހޭކަމަށް ޑރ.ޝަހީމް ވިދާޅުވިއެވެ.

އަލްމަސްޖިދުލް އަޤުޞާގެ ތެރެއަށް އިޒްރެއިލްގެ ސިފައިން ވަދެ ހިންގަމުންދާ އަނިޔާވެރި ޢުދުވާނީ ޢަމަލުތަށް ކުއްވެރިކޮށް، އަޤުޞާ މިސްކިތުގެ ދިފާޢުގައި މުސްލިމު އުންމަތް ތެދުވަންޖެހޭ. އިޒްރެއިލްގެ ޢަމަލުތަކަކީ ބައިނަލްއަޤުވާމީ ޤާނޫނާއި މުޢާހަދާތަކާ ޚިލާފު ޢަމަލުތަކެއް.

– ޑރ.ޝަހީމް ވިދާޅުވިއެވެ.

ފަލަސްތީނާއި އިސްރާއީލްގެ މީޑިއާތަކުން ރިޕޯޓް ކުރާ ގޮތުގައި އިސްރާއީލް ސިފައިން މިސްކިތަށް ވަނީ ފަތިސް ނަމާދު ނިމުނު ގަޑީގައެވެ. މި ހަމަލާތަކުގައި ޒަހަމްވި ފަލަސްތީން ރައްޔިތުންގެ އަދަދު މިހާރު ވަނީ 213 އަށް އަރާފައެވެ.

ކޮންމެ އަހަރެއްގެވެސް ރަމަޟާން މަހުގައި ފަލަސްތީނުގެ މުސްލިމު ރައްޔިތުންނަށް އިސްރާއިލްގެ ހައްދު ފަހަނައާޅާފައިވާ ޖަމާއަތުން ބޮޑެތި އަނިޔާތައްކޮށް ދުއްތުރާ ކުރެއެވެ. އެގޮތުން މިސްކިތްތަކުގައި ނަމާދު ކުރުމަށާއި، މުސްލިމުންނަށް ދީނީ އެކި އަޅުކަންތައް ކުރުމަށް ހައްދު ފަހަނައަޅާފައިވާ އިސްރާއީލުން ހުރަސް އަޅައެވެ.