މީހަކު ވިހައިގެން ފުރަތަމަ ފަސްދުވަހު ވަރަށް ގަދަޔަށް ލޭއައެވެ. އެހެންނަމަވެސް ދެން ލޭ އަންނަނީ ދުވާލަކު ތިއްކެއް ވަރަށެވެ. ވީމާ، ނަމާދާއި ރޯދައިގާ ކަންތައް ކުރަންވީ ގޮތް އަންގަވާލަ ދެއްވުން އެދެމެވެ؟
الحمد لله والصلاة والسلام على رسول الله وعلى آله وصحبه، أما بعـد
ވިހެއުމާއި ގުޅިގެން އަންނަ ލެޔަކީ ނިފާސްކަމުގެ ލެޔެވެ. ނިފާސްގެ އެންމެ ކުޑަމިން ކަނޑައެޅިފައެއް ނުވެއެވެ. ނިފާސްގެ އެންމެ ދިގު މިންވަރަކީ 40 ދުވަހެވެ. މިއީ ޢިލްމުވެރިންގެ ރައުޔު ތަކުގެ ތެރެއިން އެންމެ ރާޖިޙް ރައުޔެވެ.
ޙައިޟު ނިފާސް އިން ޠާހިރުވެއްޖެކަން އެގޭނެ ދެގޮތެއް ވެއެވެ. އެއީ:
- ލޭ ކެނޑުމަށްފަހު ހުދު ކުލަޔެއްގެ ފެނެއް ފޭބުން.
- ލޭތައް ހިކުން. އެގޮތުން ކުރިމަތީ ފަރާތަށް ކަފަބުރެއް ފަދަ އެއްޗެއް ކޮއްޕާލައިގެން ބެލިނަމަވެސް ލޭގެ އެއްވެސް އަޘަރެއް އަދި ރީނދޫ ކުލަޔެއްގެ އަޘަރެއްވެސް ފެންނަން ނެތުން.
މިދެންނެވި ދެޢަލާމާތް ތަކުގެ ތެރެއިން ޢަލާމާތެއް ފެނިއްޖެނަމަ، ނަމާދުކޮށް ރޯދަ ހިފާ ހަދަންވީއެވެ. ލޭކެނޑި އެހެން ނަމަވެސް މުޅިން ލޭ ނުހިކޭނަމަ، އޭގެ މާނައަކީ ނިފާސްގެ ލޭ ނުކެނޑުމެވެ. ސާޅީސް ދުވަހަށްވުރެ އިތުރުވެއްޖެނަމަ ބެލެވޭނީ އިސްތިޙާޟާ ކަމަށެވެ. ނަމަވެސް ޙައިޟު ގެ މުއްދަތާއި ދިމާވެއްޖެނަމަ ބެލެވޭނީ ޙައިޟު ކަމަށެވެ. والله أعلم
