ދުނިޔޭގައި މިވަގުތު ހުރި އެންމެ މުއްސަދި މަހުޖަނު އެލޮން މަސްކު، ސޯޝަލް މީޑިއާ ޕްލެޓްފޯމް ޓުވިޓަރ ގަތުމަށް ހުށަހަޅުއްވައިފިއެވެ.
މަޝްހޫރު ޓެލްސާ ކުންފުނީގެ ސީއީއޯ މަސްކު ޓުވިޓަރ ގަތުމަށް ހުށަހަޅުއްވާފައިވާކަން ހާމަވެގެން ގޮސްފައި މިވަނީ، ކުރިން ހަމަޖެހިފައި އޮތްގޮތަށް، ޓުވިޓަރގެ ޑައިރެކްޓަރުންގެ ބޯޑުގައި އޭނާ ހިމެނިވަޑައި ނުގަންނަވާނޭކަމަށް ފާއިތުވެދިޔަ ހަފްތާގެ ބުރާސްފަތި ދުވަހު އޭނާ ވިދާޅުވެފައި ވަނިކޮށެވެ.
ޓުވިޓަރ ގަންނަން ހުށަހަޅުއްވަމުން އޭނާ ވިދާޅުވެފައިވަނީ، ސޯޝަލް މީޑިއާ ޕްލެޓްފޯމު ޓުވިޓަރއިން ލިބެންހުރި ހަގީގީ މަންފާ ދެނެގަނެގަތުމުގެ ގާބިލްކަން ހުރީ އޭނާގެ ކިބައިގައި ކަމަަށާއި، އެކަމަށް އެންމެ އެކަށީގެންވާ މީހާއަކީ އޭނާ ކަމުގައެވެ.
ގިނަ ބަޔަކަށް ހައިރާންކަން ގެނުވި މިޚަބަރު އާންމު ކުރައްވަމުން މަސްކު ވަނީ، ކޮންމެ ޝެއަރއަކަށް 54.20 ޑޮލަރު އޭނާ ދައްކަވާނެ ކަމަށެވެ. މި އަދަދަށް ބަލާއިރު، ޓުވިޓަރ ގަތުމަށް އޭނާ ހުށަހަޅުއްވާ އަގަކީ ޖުމްލަ 40 ބިލިއަން އެމެރިކާ ޑޮލަރެވެ.
ދާދިފަހުން ވަނީ، މަސްކުއަކީ ޓުވިޓަރގެ އެންމެ ބޯޑު ޝެއަރ ހޯލްޑަރކަން ހާމަވެގެން ގޮސްފައެވެ. އޭނާ ވިދާޅުވެފައި ވާގޮތުގައި ޓުވިގަތުމަށް އޭނާ ހުށަހަޅުއްވާފައިވާ އޮފަރ ޓުވިޓަރ އިން ބަލައި ނުގެންފިނަމަ، ޝެއަރ ހޯލްޑަރއެއްގެ ގޮތުގައި ހުރުމާމެދު އޭނާ ވިސްނަވާނެއެވެ.
ޓުވިޓަރ ކުންފުނިން އެމެރިކާގެ ފައިނޭންޝަލް ރެގިއުލޭޓަރއަށް ހުށަހަޅުއްވާފައިވާ ކަރުދާސްތަކުން ވަނީ، އޭނާ ޓުވިޓަރއާއެކު ކުރާ ވިޔަފާރިއަކީ ދެމެދުގައި ސިއްރު ކުރެވިފައިވާ ވިޔަފާރީގެ މުޢާމަލާތުތަކަށް ހެދުމަށް ބޭނުންވާކަމަށް، ފާއިތުވި ހަފްތާ ބަންދުގައި ޓުވިޓަރގެ ބޯޑަށް އޭނާ ހުށަހަޅުއްވާ ކޮށްފައިވާ ޓެކްސް އަދި ވޮއިސް މެސެޖުތައް ހާމަވެފައެވެ.
ޓުވިޓަރ ބޯޑުގައި އިންނެވުމަށް އޭނާއަށް ދައުވަތު ދީފައިވި ނަމަވެސް، މިހަފްތާގެ އާދީއްތަ ދުވަހު ޓުވިޓަރއިން ބުނެފައިވަނީ، ބޯޑުގައި ނީންނެވުމަށް މަސްކު ނިންމަވާފައި ވާކަމުގައެވެ.
I made an offer https://t.co/VvreuPMeLu
— Elon Musk (@elonmusk) April 14, 2022
ފައިނޭންޝަލް ރެގިއުލޭޓަރއަށް ހުށަހަޅުއްވާފައިވާ ކަރުދާސްތަކުގަވާ މެސެޖުތަކުގައި މަސްކު ވިދާޅުވެފަިވަނީ، އޭނާގެ ހުށަހެޅުއްވުމަކީ، "ދެކޮޅަށް ދަމާގޮތަށް" ވާހަކަ ދައްކަން ހުށްހަޅުއްވާފައިވާ ހުށަހެޅުމެއް ނޫންކަމުގައެވެ. "މިއީ ބޮޑު އަގެއް، ކަލޭމެންގެ ޝެއަރ ހޯލަޑަރުން ވަރަށް ގަޔާވާނެ މިއަގަށް،" މަސްކުގެ މެސެޖުގައި ވެއެވެ.
އަދި އޭނާ ވިދާޅުވަނީ އޭނާގެ މި ހުށަހެޅުން ޓުވިޓަރއިން ގަބޫލު ނުކޮށްފިނަމަ އޭނާއަށް ޖެހިވަޑައިގަންނަވާނީ، ޓުވިޓަރ ކުންފުނީގައި އޮތް އޭނާގެ ޝެއަރ ވިއްކަވާ ލައްވާށެވެ. "މިއީ ދައްކާ ބިރެއް ނޫން، ގެންނަން ބޭނުންވާ މި ބަދަލާއެކު މެނުވީ، މިއީ ފައިދާހުރި އިންވެސްޓްމަންޓަކަށް ވެގެނެއް ނުދޭ،" މަސްކު އިތުރަށް ވިދާޅުވެފައި ވެއެވެ.
އެމެރިކާގެ ސެކިއުރިޓީސް އެންޑް އެކްސްޗޭންޖު ކޮމިޝަންގައި ހުރި ލިޔެކިޔުންތަކުން އެގެން ހުރި ގޮތުގައި، މަސްކު ވިދާޅުވެފައިވަނީ، ޓުވިޓަރގައި އޭނާ އިންވެސްޓު ކޮށްފައިވަނީ، "ޓުވިޓައަކީ، ޚިޔާލުފާޅު ކުރުމުގެ މިނިވަންކަން ދުނިޔޭގައި ފަތުރާ ނަގަހައްޓާ ޕްލެޓްފޯމަކަށް ހެދުމުގެ ފުރުސަތު އިންތިހާއަށް އޮތުމާއެކު، ޚިޔާލު ފާޅުކުރުމަކީ ޑިމޮކްރަސީ ދެމިއޮތުމަށް ކޮންމެހެންވެސް މުހިންމު ކަމަށް ވާތީ" ކަމުގައެވެ.
"އެހެންނަމަވެސް އިންވެސްޓްމަންޓު ކުރުމަށްފަހު އަހަރެންނަށް އެގިގެން ހިގައްޖެ، މިހާރު ކުންފުނި އޮތް ބައްޓަމުގައި ކުރިއަރައިގެންވެސް ނުދާނެކަން، އަދި މަގުސަދުވެސް ހަސިލް ނުވާނެކަން. ޓުވިޓަރ އެބަޖެހޭ ޕްރައިވެޓް ކުންފުންޏަކަށް ބަދަލުވާން."
"ޓުވިޓަރގައި އެބަހުރި އާދަޔާ ޚިލާފު ފުރުސަތުތައް، މިފުސަތުތައް ހޯދައި ގަނެވޭނެ މީހަކީ އަހަރެން،" އޭނާ އިތުރަށް ވިދާޅުވެފައި ވެއެވެ.
ޓުވިޓަރއިން ބުނެފައިވަނީ، މަސްކުގެ މިހުށަހެޅުއްވުމާމެދު އެކުންފުނީގެ ބޯޑުން ވިސްނާ، ކުންފުންޏާއި ޝެއަރ ހޯލްޑަރުންނަށް އެންމެ ފައިދާހުރި ނިންމުމެއް ނިންމާނެއެވެ.
ފޯބްސް މެގަޒިންއިން ހާމަކޮށްފައިވާ ގޮތުގައި، އަމިއްލަ ބައިތުލްމާލުގައި 219 އެމެރިކާ ޑޮލަހުރި އެލޮން މަސްކުއަކީ މިހާރު ދުނިޔޭގައި ހުރި އެންމެ މުއްސަދި މަހުޖަނެވެ.
