ހުސްވެފައިވާ ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރު ކަމަށް ވަގުތު ހަމަވިއިރު ކުރިމަތިލީ އިދިކޮޅު ޕީޕީއެމްއާއި، އެމްއެންޕީން ކަމަށް އިލެކްޝަނުން ބުނެފިއެވެ.
އިލެކްޝަންގެ އޮފިޝަލަކު ވިދާޅުވީ ވިލިމާލޭ ދާއިރާގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ހުސްވެފައިވާ ގޮޑިއަށް ކުރިމަތިލުމަށް ހުޅުވާލި މުއްދަތު މިއަދު މެންދުރު 12 ޖެހުމާއި ހަމައަށް ހަމަވިއިރު، ކުރިމަތި ލާފައިވަނީ ދެ ކެނޑިޑޭޓަކުކަމަށެވެ. އެއީ އިދިކޮޅު ޕީޕީއެމްއާއި، އެމްއެންޕީންކަމަށެވެ.
ޕީޕީއެމްގެ ފަރާތުން މިއިންތިޚާބުގައި ވާދަކުރަނީ ފާތިމަތު ނާޒިމާއެވެ. އެމްއެންޕީން ވާދަކުރަނީ އަމިނަތު ޝީޒާއެވެ.
މިއިންތިޚާބުގައި ވެރިކަން ކުރާ މައި ޕާޓީ އެމްޑީޕީން ކެނޑިޑޭޓް ނެރުމަށް ހުޅުވާލީވެސް އިއްޔެ ހަވީރުއެވެ. މިއަދަށް މުއްދަތު ހަމަވިއިރު، އެމްޑީޕީން މިއިންތިޚާބުގައި ކެނޑިޑޭޓަކު ކުރިމަތިލާފައި ނުވެއެވެ.
ވިލިމާލެ ދައިރާގެ ޑަބްލިއުޑީސީ ގެ ބައި އިލެކްޝަން ބޭއްވުމަށް ހަމަޖެހިފައި ވަނީ އަންނަ މަހުގެ 16 ވަނަ ދުވަހަށެވެ. ކުރިން ހަމަޖެއްސީ އަންނަ މަހުގެ 14 ވަނަ ދުވަހަށެވެ. އެތާރީހު ބަދަލުކުރީ ކުރިން އިންތިހާބު ބާއްވަން ހަމަޖެއްސި ދުވަހު އެމްޑީޕީގެ ޗެއާޕާސަން ހޮވުމުގެ އިންތިހާބު އެދުވަހު އޮންނާތީއެވެ.
ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްުރާ ކޮމެޓީގެ މެމްބަރުކަމުގެ ގޮނޑި ހުސްވެފައިވަނީި ކުރިން އެމަގާމުގައި ހުރި އައިމިނަތު އީމާން ނިޔާވުމުގެ ސަބަބުންނެވެ. އީމާން ނިޔާވެފައިވަނީ މިދިޔަ ފެބްރުއަރީ މަހު ހިނގި ނުރައްކާރެތި އެކްސިޑެންޓެއްގައި ލިބުނު އަނިޔާތަކަށް ފަރުވާ ދެމުންދަނިކޮށް އޭޑީކޭ ހޮސްޕިޓަލުގައެވެ.
