ވިހެއުމުގެ ދެދުވަސް ނުވަތަ ތިންދުވަސް ކުރިން އަންހެނުންގެ ކުރިމަތީ ފަރާތުން އަންނަ ފެނާއި ލޭގެ ޙުކުމަކީ ކޮބައިތޯ؟ މިފަދަ ތަކެތި އައުމުން ނަމާދާއި ރޯދަ ދޫކޮށްލަން ޖެހޭނެތޯ؟
الحمد لله والصلاة والسلام على رسول الله وعلى آله وصحبه، أما بعـد
މާބަނޑު އަންހެނުންގެ ކުރިމަތީ ފަރާތުން އަންނަ ތަކެތީގެ ޙާލަތްތައް ތިރީގައި މިވަނީއެވެ.
- ވިހެއުމުގެ ދެދުވަސް ނުވަތަ ތިންދުވަސް ކުރިން ބަނޑުގައި ރިހުމާއި އެކު ކުރިމަތީ ފަރާތުން އައިސްފައިވަނީ ލޭ ކަމުގައިވަނީނަމަ، އެއީ ނިފާސްގެ ލެޔެވެ. ނަމަވެސް މިމުއްދަތަކީ ނިފާސްގެ މުއްދަތުގެ ތެރޭގައި ގުނޭނެ މުއްދަތެއް ނޫނެވެ. މިނޫން ގޮތަކަށް އައި ލެޔެއްނަމަ އެއީ ފަސާދަ ލެޔެކެވެ. އޭގެ ސަބަބުން ނަމާދާއި ރޯދަ ދޫކޮށްލާކަށް ނުޖެހޭނެއެވެ.
- ކުރިމަތީ ފަރާތުން ނިކުމެފައިވަނީ ފެން ކަމަށް ވަނީނަމަ، އެއީ ރަޙިމް އިން ނިކުންނަ ޞާފު ފެނެކެވެ. އޭގެ ސަބަބުން ވުޟޫ ގެއްލޭނެއެވެ. އެއީ ނިފާސް އެއް ނޫނެވެ. ވީމާ، ނަމާދާއި ރޯދަ ހިފޭނެއެވެ.
ފަޟީލަތުއް ޝައިޚް މުޙައްމަދު ޞާލިޙުލް ޢުޘައިމީނާއި ސުވާލު ކުރެވުނެވެ. ވިހެއުމުގެ ތިންދުވަސް ކުރިން ބަނޑުގައި ރިހުމަކާއި އެކު ކުރިމަތީ ފަރާތުން ފެންތަކެއް ފޭބިއެވެ. މިއީ ނިފާސަށް ވާނެތޯއެވެ؟
ޖަވާބުގައި ވިދާޅުވިއެވެ. "މިއީ ނިފާސެއް ނޫނެވެ. ސަބަބަކީ ނިފާސަކީ ލެޔެކެވެ. ފެނެއް ނޫނެވެ. އަދި ނިފާސް ކަމުގައިވާނީވެސް ވިހެއުމުގެ ދޭއް ނުވަތަ ތިންދުވަސް ކުރިން ރިހުމަކާއި އެކު އައުމުންނެވެ. ނަމަވެސް ވިހެއުމުގެ އެތައް ޒަމާނެއް ކުރިން ލޭ އަޔަސްވެސް އެއީ ނިފާސް ކަމުގެ ލެޔެއް ނޫނެވެ. ސަބަބަކީ ނިފާސް ކަމުގެ ލެޔަކީ ވިހެއުމުގެ ދޭއް ނުވަތަ ތިންދުވަސް ކުރިން ރިހުމަކާއި އެކު ނިކުންނަ، ނުވަތަ ވިހެއުމުގެ ތެރޭގައި ނުވަތަ ވިހެއުމަށްފަހު އަންނަ ލެޔެވެ. ކުރިމަތީ ފަރާތުން އަންނަ ފެނަކީ ނިފާސެއް ނޫނެވެ." والله أعلم
