ރޯދަ އަށް ހުރެ ގަބުރުސްތާނަށް ޒިޔާރަތް ކުރުމަކީ ހުއްދަ ކަމެއްތޯ؟
الحمد لله، والصلاة والسلام على رسول الله، صلى الله عليه وسلم، وبعد
ރޯދަ އަށް ހުރެ ގަބުރުސްތާނަށް ޒިޔާރަތް ކުރުން މަނާ ކުރާނެ ދަލީލެއް ނެތެވެ. ގަބުރުސްތާނަށް ޒިޔާރަތް ކުރުމަށް އަމުރު ކުރައްވާ ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘް ކުރައްވާފައިވެއެވެ. (ألا فزوروها، فإنها تذكر الموت) މާނައަކީ: "ދަންނާށެވެ. ތިޔަބައިމީހުން ގަބުރުސްތާނަށް ޒިޔާރަތް ކުރާހުށި ކަމެވެ. ހަމަކަށަވަރުން އެއީ މަރު ހަނދާން ކޮށްދޭ ކަމެކެވެ." މިއިން ދޭހަކޮށްދެނީ ހުރިހާ ވަގުތެއްގައިވެސް ގަބުރުސްތާނަށް ޒިޔާރަތް ކުރެވޭނެ ކަމެވެ. ވަކި ވަގުތެއް ޚާއްޞަ ކުރެވިފައި ނުވާ ކަމެވެ.
عن أبي هريرة قال : قال رسول الله صلى الله عليه وسلم لأصحابه : " مَن أصبح منكم اليوم صائما فقال أبو بكر : أنا ، قال : فمن تبع منكم اليوم جنازة ؟ فقال أبو بكر: أنا ، قال: هل فيكم من عاد مريضاً ؟ قال أبو بكر : أنا ، قال : هل فيكم من تصدق بصدقة ؟ فقال أبو بكر : أنا ، قال : ما اجتمعن في امرئ إلا دخل الجنة " رواه مسلم މާތް ﷲ ރުއްސުންލެއްވި އަބޫ ހުރައިރާގެ ކިބައިން ރިވާވެގެން ވެއެވެ. ކީރިތި ރަސޫލާ ޞައްލަﷲ ޢަލައިހި ވަސައްލަމަ އެކަލޭގެފާނުގެ ޞަޙާބީންނަށް ޙަދީޘް ކުރެއްވިއެވެ. "ތިޔަބައިމީހުން ކުރެ މިއަދު ރޯދަވެރިއެއްގެ ގޮތުގައި ހެނދުނު ކުރީ ކާކުތޯއެވެ؟" އަބޫބަކުރު ރަޟިޔަﷲ ޢަންހު ވިދާޅުވިއެވެ. "ތިމަންނާއެވެ." ޙަދީޘް ކުރެއްވިއެވެ. "ތިޔަބައިމީހުން ކުރެ މިއަދު ޖަނާޒާ އެއްގައި ބައިވެރިވީ ކާކުތޯއެވެ؟" އަބޫބަކުރު ރަޟިޔަﷲ ޢަންހު ވިދާޅުވިއެވެ. "ތިމަންނާއެވެ." ޙަދީޘް ކުރެއްވިއެވެ. "ތިޔަބައިމީހުން ކުރެ މިއަދު ބަލިމީހަކަށް ޒިޔާރަތް ކުރީ ކާކުތޯއެވެ؟ އަބޫބަކުރު ރަޟިޔަﷲ ޢަންހު ވިދާޅުވިއެވެ. "ތިމަންނާއެވެ." ޙަދީޘް ކުރެއްވިއެވެ. "ތިޔަބައިމީހުން ކުރެ މިއަދު ޞަދަގާތެއް ކުރީ ކާކުތޯއެވެ؟" އަބޫބަކުރު ރަޟިޔަﷲ ޢަންހު ވިދާޅުވިއެވެ. "ތިމަންނާއެވެ." ޙަދީޘް ކުރެއްވިއެވެ. "ތިޔަބައިމީހުން ކުރެ މީހަކު މިދެންނެވި ކަންތައް އެއްދުވަހާ ކޮށްފިނަމަ ސުވަރުގެ ވަންނަ ހުއްޓެވެ."
މިއިން ދޭހަކޮށްދެނީ ރޯދަ އަށް ހުރެގެން ގަބުރުސްތާނަށް ޒިޔާރަތް ކުރެވިދާނެ ކަމެވެ. والله أعلم
