ބޮލީވުޑްގެ އެންމެ ކާމިޔާބު އެއް ބަތަލާ ކަމަށްވާ ދީޕިކާ ޕަޑުކޯން މީގެ ހަތަރު އަހަރުކުރިން ކައިވެނިކޮށްފައި ވިޔަސް، އެ ކައިވެންޏަށް އަދި ދަރިއަކު ލިބިފައެއް ނުވެއެވެ.
މަޝްހޫރު އެކްޓަރު ރަންވީރު ކަޕޫރާ އިނދެގެން އުޅޭ ދީޕިކާ މިހާތަނަށް ކުއްޖަކު ނުހޯދާ ހުރީ ކޮން ސަބަބަކާހެދި ކަން ނޭނގުނަސް، އޭނާއަކީ ކުދިން ބޭނުންވާ މީހެއްކަން މީގެކުރިން ވަނީ ހާމަކޮށްފައެވެ.
ކުރިން މެގަޒިނަކަށް ދިން އިންޓަވިއުއެއްގައި 35 އަހަރުގެ ބަތަލާ ބުނި ގޮތުގައި، އޭނާއާއި އޭނާގެ ކޮއްކޮ ބޮޑުވެގެން އައިއިރު އެމީހުންގެ މައިންބަފައިންނަކީ ވަޒީފާތައް އަދާކުރަމުންދިޔަ މީހުން ކަމުގައި ވިޔަސް ދަރިންނަށް ދޭންޖެހޭ ލޮތްބާއި އަޅާލުން ފުރިހަމައަށް ދިނެވެ.
View this post on Instagram
އެހެންކަމުން، ރަންވީރާއެކީ ކޮންމެވެސް ދުވަހަކުން އާއިލާއެއް ބިނާކުރާއިރު އެދެމީހުންނަށް ވެސް ހަމަ އެފަދައިން ދަރިންނަށް އަޅާލެވޭނެ ކަމަށް އުންމީދުކުރާ ކަމުގައި ދީޕިކާ ވަނީ ބުނެފައެވެ.
ދީޕިކާ ހޯދަން ބޭނުންވަނީ ކިތައް ކުދިންތޯ އެ އިންޓަވިއުގައި ސުވާލުކުރުމުން އޭނާ ބުނީ 3 ކުދިން ކަމަށެވެ. އަދި އެކުދިންނާއެކު އުފާވެރި އާއިލާއެއްގައި ދިރިއުޅެން ބޭނުންވާ ކަމަށާއި، ފިލްމުތަކުގެ ޝޫޓިންއަށް ދާއިރު ކުދިން ގޮވައިގެން ދާނެ ކަމުގައި ބުނެފައިވެއެވެ.
ކޮންމެއަކަސް، ދީޕިކާ އެހެން ބުނެފައި އޮތަސް އެކަން ހަގީގަތަކަށް ވާނީ ކޮން ދުވަހަކުން ކަމެއް ނޭނގެއެވެ. ސަބަބަކީ މިހާރުވެސް އޭނާ ދަނީ ވަރަށް ބުރަކޮށް މަސައްކަތް ކުރަމުންނެވެ.
